Geeshsha Mexaafa
Mazamure Maxaafa 115
Abeet GODAWU!
Nu gishshas gidontta
ne siiqo gishshassinne
ne ammaneteththa gishshas
ne sunththaa bonchcha.
Kawoteththati ays,
«Istta Xoossi awan dizee?» gizoo?
Nu Xoossay salon dees;
izi ba dosidayssa ubbaa ooththees.
Gido attiin istta eeqa xoossati
birappenne worqqafe
asa kushen oosettidayta.
Isttas doonay dees shin
haasayettenna;
ayfeykka dees shin demmettenna.
Isttas hayththi dees shin siyettenna;
siidheykka dees shin singettenna.
Isttas kushey dees shin
bochchettenna;
tohoykka dees shin
hemettettenna;
istta poorandey
cenggurs kessenna.
Istta medhdhizaytinne
isttan ammanettizayti
ubbay istta mala gidetto.1
Intteno Isra7eele asatoo!
GODAAN ammanettite!
Izi inttes gondallenne
inttena maaddizaade.
Intteno Aaroone zereththatoo!
GODAAN ammanettite!
Izi inttes gondallenne
inttena maaddizaade.
Intteno GODAAS yayyizaytoo!
GODAAN ammanettite!
Izi inttes gondallenne
inttena maaddizaade.
GODAY nuus qoppees;
izi nuna anjjana;
izi Isra7eele asatanne
Aaroone zereththatakka anjjana.
GODAAS yayyizayta ubbaa
guuth gidiin gita izi anjjana.2
GODAY inttenakka
intte naytakka darso!
Salonne sa7a medhdhida
GODAY inttena anjjo!
Saloti Xoossassa;
gido attiin sa7a
asa naytas immides.
Hayqqidi duge duufon gelidayti
GODAA galatanaas
dandayettenna.
Gido attiin nuni
shemppora paxa dizayti
hachchife doommidi
mernaa gakkanaas
GODAA galatana.
GODAY galatetto!
Source notes (2)
- Cross-reference Maza 135:15-18; Ajju 9:20
- Cross-reference Ajju 11:18; 19:5
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.