Geeshsha Mexaafa
Mazamure Maxaafa 109
Dawiti Zammareta Kaabbos Yexxida Mazamure
Abeet tani galatiza Xoossawu!
Neni taas co7u gooppa.
Iitatinne wordanchchati ba doona
ta bolla doyda;
ta bollaka wordo haasayda.
Istti ixo qaalara tana giddoththida;
gaasoykka baynda
tana keehi qohida.
Tani istta siiqishin
istti tana mootida;
gido attiin ta woossays.
Tani lo7o ooththiin
taas iita zaarida;
ta istta siiqiin tana ixxida.
Iza bolla iita daanna shuuma;
iza mootizaykka
iza ushachchan eqqo.
Pirdason izi mooranchcha
gidi beetto;
iza woosaykka
izas simmidi gometo!
Iza layththi qaammo;
iza shuumeteththaaka haray ekko!1
Iza nayti aawa dhaydi yi7otetto;
iza machcheyakka am7o gidu!
Iza nayti yuuyi yuuyidi woossetto;
ha7i ba diza laalettida
keeththafekka goodettetto!
Iza aqota ubbaa aco aaway laatto;
izi daaburdi kessida ubbaa
allagay bonqqo!
Oonikka iza maaroppo;
woykko yi7o gidida naytas
qadhettizay dooppo!
Iza nayti ubbay dhayetto;
kaalliza yeletan
iza sunththi dogetto.
Iza aawata nagaray
GODAA sinththan qofetto;
iza aayey nagaray
mulekka qucettofo!
Istta nagaray
GODAA sinththan ubbato beetto;
istta akeekissiza miishshi
biitta bolla dooppo.
Gaasoykka izi manqidaade,
metotizaadenne
wozinay madunxidaade
hayqqana gakkanaas
gooddides attiin
iza maaranaas qoppibeenna.
Izi qangganaas dosiza gishshas
izi qanggetto!
Izi anjjanaas dosontta gishshas
izappe haakkides!
Qanggeth may7o mala may7ides;
haaththa mala izas bollan gelides;
zayte malakka
meqeththa giddo gelides.
Afala mala iza kammo;
saqqe mala ubba wode
iza xeessan de7o!
Hayssi tana mootizaytassinne
ta bolla iita haasayzaytas
GODAY immiza woyto gido!
Gido attiin abeet
Ubbaafe Dhoqqa GODAWU!
ne sunththa gishshas
tana lo7o ayfen xeella;
ne siiqoy lo7o gidida gishshas
tana ashsha.
Tani hiyeesanne metotanchcha asa;
ta wozinay madunxides.
Tani omarsa wode kuwa mala
dhayana hanays;
boole malakka qoqofettadis.
Xoomishin ta gulbatey daaburdes;
ta ashoy gilqidi
meqeth attides.
Ta morkketas tani
qilcciza miish gidadis;
istti tana be7idi
ba qoodhe qaaththeettes.2
Abeet GODAWU ta Xoossawu!
Tana maadda;
ne mernaa siiqo mala
tana ashsha.
Abeet GODAWU!
Hayssa ne kushey ooththidayssanne
neni polidayssa
ta morkketi eretto.
Istti tana qanggeettes;
neni gidikko tana anjjaasa;
ta bolla dendizayti yeellatana;
gido attiin tani
ne aylley ufayettana.
Tana mootizayti
kawushshateth may7etto;
bantta yeellaaka
kuta mala quma7etto.
Tani ta inxarsan
GODAA keeha galatana;
daro derey shiiqida duulatan
iza sabbana.
Gaasoykka istta bolla hayqo pirda
pirdizaytappe ashshanaas
manqotappe ushachcha baggara
izi eqqees.
Source notes (2)
- Cross-reference Hawa 1:20
- Cross-reference Mato 27:39; Mar 15:29
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.