Geeshsha Mexaafa
Mazamure Maxaafa 107
Ichchashanththo Maxaafa
(Maza 107—150)
Izi kiyanne
iza siiqoy mernaas
gidida gishshas GODAA galatite.1
GODAY istta wozzidayti,
istta morkketa kusheppe
izi ashshidayti hizgetto;
arshey mokkizasoppenne
wullizasoppe,
pudehappenne dugehappe
dere ubbaafe izi shiishshidayti
hizgi haasayetto.
Isttafe issoti issoti
bazzo biittan toylattida;
ba de7iza katama efiza oge
demmanaas dandaybeettenna.
Istti gafidanne saamettida;
keehippe daaburda.
Istti metotida wode
GODAAKKO waassida;
izikka istta waayezappe
ashshides.
Istti de7ana katama gakkanaas,
izi istta sitta ogera kaaleththides.
Mernaa iza siiqozassinne
izi asas ooththida malalisiza
miishshatas istti GODAA
galatetto!
Ays giikko izi saamettidayta
ushshi alisees;
gafidaytakka
lo7o miishshan kalssees.
Isttafe issoti issoti birata
sansalatan qashettidi
waayettizayta;
sakkanna dhuma giddonkka
uttidayta;
Gaasoykka istti
Xoossa qaala bolla makkallidanne
Ubbaafe Dhoqqa Xoossa
zore kadhida.
Hessa gishshas wolqqa ooson
istta ixeththides;
istti daaburiin
istta maaddizay dhaydes.
Istti metotida wode
GODAAKKO waassida;
izikka istta waayezappe
ashshides.
Sakkanna dhumappe istta kessides;
istti qashettida sansalatakka
duusereththides.
Mernaa iza siiqozassinne
izi asas ooththida
malalisiza miishshatas
istti GODAA galatetto.
Ays giikko izi xarqimalappe oosettida
penge menththides;
birata kolatatakka
qanxxereththides.2
Isttafe issoti issoti
ba makkallateththa gaason
eeya gidida;
ba nagara gaasonkka
meton gelida.
Istta qoodhey kath ixxiin
hayqqana matida.
Istti metotida wode
GODAAKKO waassida;
izikka istta waayezappe
ashshides.
Izi ba qaala kiittidi
istta paththides;
duufo doonappeka
istta ashshides.
Mernaa iza siiqozassinne
izi asaas ooththida malalisiza
miishshatas
istti GODAA galatetto.
Istti izas
galata yarsho yarshetto;
qasseka ufayssa yeththan
izi ooththida ooso qonccisetto.
Isttafe issoti issoti markaben
gita abba giddora bida;
he gita abba bolla
bantta ooso ooththida.
Istti GODAA ooso be7ida;
izi ciimma garsan ooththida
malalisiza oosota xeellida.
Izi azaziin
gote carkoy dendides;
histtiin abba dambalay
qaaxxides.
Istti pude salo kezida;
simmidikka duge ciimman gelida;
istta gakkida metoppe
dendoyssan
istta wozinay taahides.
Istti maththottida asa mala
yiicotidi gandigarda;
isttas akeekiza wozinaykka
dammides.
Istti metotida wode
GODAAKKO waassida;
izikka istta waayezappe
ashshides.
Izi gote carkoza
co7u histtides;
abba dambalakka sirphi histtides.
Co7u gida gishshas
istti ufayettida;
istti amottiza wodeben
gaththides.3
Mernaa iza siiqozassinne
izi asas ooththida malalisiza
miishshatas
istti GODAA galatetto.
Istti iza dere duulatan
dhoqqu dhoqqu histtetto;
qasse cimata shiiqon
iza galatetto.
Shaafata mulera melissides;
pulttoti pulttontta mala teqqides.
Heen de7iza asaa
iitateththaa gaason
aradda biittayo aykko
dolisontta maxine
biitta ooththides.
Izi bazzon haath eelissides
mela biittan pulttoy
dhuuqqana mala ooththides.
Gafidayta heen woththides;
isttika banttas
de7ana katama keexxida.
Istti bantta goshshan zerida;
woyne tokkida;
daro kath shiishshida.
Izi istta anjjiin
istti keehi corattida;
istta mehetakka guuththibeenna.
Meton, waayeninne
ceecen xoonettiin
istta qooday guuxxides.
GODAY halaqata kawushshides;
ogey baynda bazzon
toylattana mala
istta ooththees.
Gido attiin izi metotanchchata
istta waayeppe kessides;
dorsa wude mala cora naytakka
isttas immides.
Suure asati
hessa be7idi ufayetteettes;
gido attiin geellata
doonay gordettana.
Era asi ha yo7oza
ba wozinan woththo;
izikka GODAA maaroteth akeeko.
Source notes (3)
- Cross-reference 1Taari 16:34; 2Taari 5:13; 7:3; Iz 3:11; Maza 100:5; 106:1; 118:1; 136:1; Er 33:11
- Footnote Kolata gizayssa issi issi bagga Gamoththo qaalan golge woykko kolata geettes.
- Footnote Wodebe gizayssi markaben abbara biza asati abbafe kezidi shempizasonne abban gelanaas naagizayti shempiza abba doonan diza katama.
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.