Geeshsha Mexaafa
Leemiso Maxaafa 13
Era nay ba aawa zore
wozinappe siyees;
qilccizay gidikko seera siyenna.
Asi ba doonappe ke7iza qaalan
lo7o miish demmees;
ammanettonttayti gidikko
makkallateth amotteettes.
Ba doona naagiza asi
ba shemppo naagees;
doonan yida mala haasayza asi
bana dhayssees.
Azallay keehi amottees shin
aykkoka demmenna;
minni ooththizayta
amoy gidikko kumana.
Xillo asati wordo haasaya ixxeettes;
iita asata haasayay gidikko
yeellaseessinne kawushshees.
Xilloteththi Suure as naagees;
iitateththi gidikko
nagaranchcha dhayssees.
Aykkoy baynda
bana dure misatissiza asi dees;
hara baggara baas
daro aqotay dishin
manqo misati beettiza asi dees.
Asi ba dureteththan
ba shemppo wozzana gidana;
manqoy gidikko
hirgay baynda uttees.
Xillota poo7oy keehi poo7ees;
iitata xomppey gidikko to7ana.
Otoroy oosh yelees;
aadho erateththi gidikko
zore ekkizayta matan dees.
Bessontta ogera demmida miishshi
dhayi dhayi bees;
ba cawa gussidi demmida aqotay
dari dari bees.
Hidotay polettontta gam7iko
wozinay meqqees;
gido attiin amottidayssi
polettishin ufayssees.
Zore kadhiza asi meton gelees;
azazo bonchchiza asi gidikko
ba waaga ekkana.
Aadho eranchchay immiza timirtey
de7o pultto;
hessi asi hayqo woximaden
gelontta mala naagees.
Akeekay de7iza asi bonchchettees;
ammanettontta agoy
bashsha oge efees.
Akeekiza asi eran ooththees;
eeyay gidikko
ba eeyateththa qonccisees.
Iita asi kiitettiko meton gelees;
ammanettida asi kiitettiko
saroteth ehees.
Seera ixxiza asi
manqeessinne kawuyees;
hanqo siyiza asi gidikko
bonchchettees.
Amoy polettiko keehi ufayssees;
eeyati gidikko
iitappe haakkanaas koyettenna.
Aadho eranchchatara hemettiza asi
aadho eranchcha gidees;
gido attiin eeyatara hemettiza asi
meton gelees.
Nagaranchchata
iita qaaday kaallees;
dureteththi gidikko
xillotas imettiza woyto.
Lo7o asi baas
naa nayta gakkanaas laatisees;
nagaranchcha aqotay gidikko
xillotas dagattees.
Manqo gadey
daro kath immana dandayees;
gido attiin suure pirday dhaykko
pitetti dhayees.
Seerontta dichchizay ba naa ixxees;
gido attiin seeri dichchizay
ba naa dosees.
Xilloy kallanaashe gakkanaas mees;
iitati gidikko gafida mala daana.
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.