Geeshsha Mexaafa
Leemiso Maxaafa 12
Seera dosiza asi erateth dosees;
gido attiin seera ixxiza
asi damma.
Lo7o asi GODAAPPE saba demmees;
gido attiin GODAY
genanchchata pirdees.
Asi iitateththan eqqidi
minni kanththanawu dandayenna;
xilloti gidikko
ba dizasoppe qaaxxettenna.
Wozinama maccassaya
ba keeththaawas
kallachcha mala;
yeellachchiza machcha
ba azinaas
meqeththa garsan diza
woyzazire harge mala.
Xillota qofay suure;
iitata zorey gidikko cimo.
Iitata haasayay as wodhees;
xillota haasayay gidikko
as ashshees.
Iita asati kundana;
isttas zereththika attenna;
xillota zereththi gidikko
minni daana.
Asi ba aadho erateththa mala
galateettes;
gido attiin geella qofay
de7iza asi kadhettees.
Aykkoy baynda dishin
dure asa mala ceeqettiza asappe
bana ziqqi histti
baas ooththi aqiza asi kiya.
Xillo asi ba mehes qadhettees;
iita asi kiyattees giikkoka
menxe iita.
Ba biittaa minththi ooththiza asi
kath kallees;
akeekay paccida asi
go7ay baynda hidota gooddees.
Nagaranchchati iitati
di7i ehidayssa amotteettes;
xillota zereththi gidikko daayana.
Iita asi ba haasayda
iita haasayan oykettees;
xilloy gidikko metoppe
kessi ekki attees.
Asi ba doonappe ke7iza qaalan
lo7o miish kallees;
ba ooththida ooso
waagakka demmees.
Eeya asas izi biza ogey
izas lo7o misatees;
aadho eranchchay zore siyees.
Eeya asa hanqoy heerakka erettees;
cincca asi gidikko
cashshe wudu geenna.
Suure markkay tuma markkattees;
wordoy gidikko
wordo markkattees.
Akeekontta haasayza haasayay
toora mala caddees;
aadho eranchcha
inxarsi gidikko paththees.
Wordo haasayay guuththa wodessa;
tuma haasayay gidikko
mernaassa.
Iita qoppizayta wozinan
baleththoy dees;
gido attiin saro miish qoppizayta
wozinan ufayssi dees.
Xillota qohoy gakkenna;
iitati gidikko meto kallana.
GODAY wordo haasaya harasettees;
tumanchchatan gidikko
ufayettees.
Akeekara diza asi
ba erateth qottees;
wozinay baynda asi
ba eeyateththaa nashshees.
Minni ooththiza asi dere haarees;
azallay aylle gidees.
Hirgan kumida wozinay
as ceecen yeggees;
shongara diza haasayay gidikko
ufayssees.
Xillo asi ba lagge
lo7o zore zorees;
iitata zorey gidikko
tuma ogeppe haassees.
Azalla asi shankkatidi
ehida ashoza xiixenna;
minni ooththiza asi gidikko
ba aqotas mishettees.
Xilloteththa ogen de7oy dees;
he ogen hayqoy deenna.
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.