ሶፎናሳ ቲንቢቴ 3

ዬሩሳላሜስ ሲንፌ ያና ቃዳ

1ማካላንቻይሲኔ ቱኒዳሪስ፥

ኣስ ኡንኤዛይታ ካታማይስ

ኣዬ ኣና!

2ኢዛ ኦናስካ ኣዛዜቱኩ፤

ኦኒ ዞሪንካ ኤኩኩ፤

ጎዳንካ ኣማኔቱኩ፤

ባ ጾሳኮካ ሺቁኩ።

3ኢዞ ካሌዛይቲ

ጻጊዛ ጋሞ ማላ።

ኢዞ ኣይሲዛይቲካ ዎንቶስ ኣሾንታ

ሚዛ ካና ሱይቴ ማላ።

4ኢዚን ዲዛ ናቤቲ ኦቶራንቻታኔ

ኣስ ባሌዛይታ።

ቄሴቲ ጾሳ ኬ

ቱኒሴቴስ፤

ዎጋ ቦላካ ማካሌቴስ።

5ኢዚን ዲዛ ጎዳይ ኢዚ ጺሎ።

ሙሌካ ባሌቲ ኤሬና፤

ማላዶ ማላዶ ሱሬ ፒርዴስ፤

ኡባ ጋላሲካ ዳቡሪ ኤሬና፤

ጊዶ ኣቲን ማካላንቻታስ

ዬላይ ዴና።

6ጎዳይ፥ «ታኒ ዴሬታ ይሳዲስ፤

ኢስታ ሚጻይ ሙሌራ ይዴስ፤

ኦኒካ ኢዛራ ኣንታ ማላ

ኢስታ ኦጌ ካይዚሳዲስ፤

ኢስታ ካታማቲ ሙሌራ ይዳ፤

ኢሲ ኣሲካ ዴና፤

ኢስታን ዴኣናይካ ዴና።

7ታ ሄ ካታማዮ፥

ቱማፔ ኔኒ ታስ ያያና፤

ታ ሴሪሺን ኔ ኤካና ጋዲስ ሺን፤

ሄሳ ጊሻስ

ኢዚ ዱሳሶይ ዬና፤

ኢዚ ቦላ ቂጻቴይ ጋኬና።

ጊዶ ኣቲን ታ ዴሬይ ኢታ ኦሶን፥

ካሴፔ ጌዴ

ሚኒ ሚኒ ቢዴስ» ጌስ።

8ጎዳይ፥ «ሄሳ ጊሻስ ታ ፒርዳና

ጋላሳይ ጋካናስ ዲሺቴ፤

ታኒ ዴሬ ኣሳኔ

ካዎታ ሺሻናስ ቃቻዲስ።

ታኒ ታ ሚኖ ሃንቆዛ ኢስታ ቦላ

ጉሳናስ ቃቻዲስ።

ታ ሃንቆ ታማን

ኩሜ ቢታይ ኤጻና።

9ሄ ዎዴ ኣሳይ ኡባይ

ጎዳ ሱን ጼይጋና ማላኔ

ሲጋን ኢዛስ ሃጋዛና ማላ

ታ ኢስታ ዶና ጌሻና።

10ቶጵያ ሻፋታፔ

ሄ ፒንን ላሌቲ ዲሼ

ታስ ጎይኒዛ ታ ዴሬይ

ታስ ያርሾ ኤሃና።

11ኢንቴ ታ ቦላ ፖሊዳ ቆሆ

ኡባፌ ዴንዲዳይሳን፤

ሄ ጋላስ ዬላቴኬታ፤

ባ ኦቶሬቴን ኡፋዬቲዛይታ፥

ሃኖ ሃ ካታማይፔ ታ ዲጋና።

ሄሳፌ ጉዬ ታ ጌሻ ዙማን፥

ኢንቴ ታ ቦላ ኦቶሬቴኬታ።

12ጎዳ ሱንን ኣማኔቲዛ፤

ኣሽኬታኔ ባንታና

ካዉሺዛይታ፤

ታ ኢንቴ ጊዶን ኣሻና።

13ኢስራኤሌፔ ጫሻ ኣቲዳይቲ

ናጋራ ኦሴቴና።

ዎርዶ ሃሳዬቴና፤

ኢስታ ዶናንካ

ጌኔ ሃሳያይ ዴና።

ሄሳ ጊሻስ ኢስቲ ሚዲ

ሳሮን ዴኣና፤

ኢስታ ባቢሳና ሚሺካ ዴና።1

14ሃኔ ጺዮኔ ናዬ ኣኔ ዬጻ!

ኢስራኤሌ ኣሳዉ ኣኔ ኢሊሊቴ!

ሃኔ ዬሩሳላሜ ናዬ!

ኩሜ ዎዚናፔ ኡፋዬታ!

ኡፋዬታሼ ሃሹ ጋ!

15ጎዳይ ኔ ቦላ

ዪዛ ቂጻቴዛ ዲጊዴስ፤

ኔ ሞርኬታካ ኔፔ ዛሪዴስ።

ጎዳይ ኢስራኤሌ ካዎይ

ኔናራ ዴስ፤

ሃይሳፌ ጉዬ

ኣይ ኢታሲካ ባባካ።

16ሄ ዎዴ ኣሳይ ዬሩሳላሜስ፥

‹ጺዮኔ ኔ ባቦፋ፤

ኔ ቄሴይ ዳቡሮፖ።

17ጎዳ ኔ ጾሳይ ኔናራ ዴስ፤

ኢዚ ኣሺዛ ሚኖ ኦላንቻ።

ኢዚ ኔናን ዳሮ ኡፋዬቴስ፤

ኢዚ ባ ሲቆን ኔና ዎፒሳና፤

ኔ ዬን ኢዚ ቦንቼቲዲ

ኡፋዬታና› ጋና።

18«ቦንቾ ባኣሌ ጋላሳቲ

ኣቲዳ ጊሻስ

ኔኒ ሙዞቲዳይሳኔ፥

ኔስ ቶሆ ጊዲዳ ዬላ

ታ ኔፔ ዲጋና።

19ሄ ዎዴ ኔና ኡንኤዳይታ

ታ ቃጻያና።

ዎቤታ ታ ኣሻና፤

ላሌቲዳይታካ

ታ ሺሻና።

ኢስቲ ካዉዪዳ ዴሬ ኡባን

ታ ኢስታ ቦንቾሲኔ

ሳባስ ጋና።

20ሄ ዎዴ ታ ኢንቴና ሺሻና፤

ኢንቴ ዴሬ ታ ኢንቴና ዛራና።

ኢንቴ ኢንቴ ኣይፌራ ቤዪሺን፥

ኢንቴፌ ዲኤቲዳ ሚሻ

ታ ኢንቴስ ዛሪዛ ዎዴ

ቢታ ቦላ ዲዛ

ዴሬ ኡባ ሲንን

ታ ኢንቴስ ሳባኔ

ቦንቾ ኢማና» ጌስ።