ጌሻ ማጻፋ
ሶፎናሳ ቲንቢቴ 2
ኢንቴኖ ዬላይ ባይንዳ ዴሬቶ!
ኣኔ ኢሲ ቦላ ሺቂቴ!
ባሻ ጋላሳይ
ጋካናፔ ካሴቲዲ፥
ሄ ጋላሳይ ሱላ ማላ ዴን
ይሶንታ ዲሺን፥
ጎዳፔ ሚኖ ሃንቆይ
ኢንቴ ቦላ ዮንታ ዲሺን
ጎዳፔ ባሻ ጋላሲ
ኢንቴ ቦላ ጋኮንታ
ዲሺን ሺቂቴ።
ኢንቴኖ ቢታ ቦላ ዲዛ ኣሽኬቶ፤
ኢዛ ኣዛዞካ ፖሊዛይቶ!
ጎዳ ኮዪቴ፤
ጺሎቴኔ ኣሽኬቴ ኮዪቴ፤
ጎዳ ሃንቆ ጋላሳፌ
ኢንቴ ኣታናኮ
ኦኔ ኤሪዛይ!
ፊሊስጼሜ ዴሬ ቦላ ዮቴቲዳ ፒርዳ
ጋዛይ ቡላ ቢታ ጊዳና፤
ኣስቄሎናይካ ላሌታ ኣታና።
ኣዛጾኔይ ሴታ ጋላስ ካይዛና።
ኣቃሮኔይ ሾዴታና።
ኢንቴኖ ኣባ ኣቻን ዲዛይቶ!
ኬሊቴ ዴሬ ኣሳቶ፥
ኢንቴስ ኣዬ ኣና!1
ፊሊስጼሜ ዴሬ ኣሳይ ዲዛ
ካናኔ ቢታዬ!
ኔ ቦላ ዮቴቲዳ
ጎዳ ቃላይ
ሃይሳፌ ካሊዛይሳ፤
«ታ ኔና ሙሌራ ይሳና፤
ኔናን ዲዛ ኣሳፔ
ኣታና ኣሲ ዴና።
ካሊቴ ኣሳይ ዲዛ
ኣባ ኣቻ ቢታይ
ሄንንቻታ ዱሳሶኔ
ዶርሳ ዪሬ ጊዳና።
ሄሲካ ዩሁዳፔ ጫሻ
ኣቲዳይታስ ጊዳና፤
ኢስቲካ ሄን ባስ
ኣቆታ ዴማና፤
ጋዴይ ቃሚሺን
ኣስቄሎና ካታማን ዲዛ
ኬታን ኣቃና፤
ጎዳይ ኢስታ ጾሳይ
ኢስታ ናጋና፤
ኢስታፌ ዲኤቲዳይሳካ
ኢስታስ ዛራና።»
ሞኣቤ ቦላኔ ኣሞኔ ቦላ ዮቴቲዳ ፒርዳ።
ጎዳይ፥
«ሞኣቤ ኣሳይ ጫዪዛይሳኔ
ኣሞኔ ኣሳይ ቂዛይሳ ታ ሲያዲስ።
ታ ዴራ ጫዪዳ፤
ኢስቲ ታ ዴራ ቦላካ
ማንዲዳ» ጌስ።2
ሄሳ ጊሻስ ጎዳይ ኡባፌ
ዎልቃማ ኢስራኤሌ ጾሳይ፥
«ታኒ ታ ዴኦ
ጾሳቴን ጫቃይስ፤
ሞኣቤይ ሶዶሜ ማላ
ኣሞኔይ ጋሞራ ማላ፥
ሻራፋይ ማይኢዳሶ ማላኔ
ማጺኔ ቦኪ ኤኪዳ ኦላ ማላ
ሜርናስ ቡላ ጊዳና።
ታ ኣሳፔ ጫሻ ኣቲዳይቲ
ኢስታ ሃሮ ቦንቃናኔ
ኢስታ ቢታ ላታና» ጌስ።3
ባንታ ኦቶሮቴፌ ዴንዲዳይሳን
ኢስቲ ኡባፌ ዎልቃማ
ጾሳ ዴራ ጫዪዳ
ጊሻሲኔ
ቂዳ ጊሻስ
ሄሲ ኢስታ ቦላ ጋካና።
ጎዳይ ሄ ቢታ ኤቃ ጾሳታ
ኡባ ይሲዛ ዎዴ
ኢዚ ኢስታ ያሺሲዛይሳ ጊዳና፤
ኣባ ኣቻን ዲዛ ዴሬቲ ኡባይ
ኢሶይ ኢሶይ ባ ዲዛሶን ዲሼ
ኢዛስ ጎይናና።
ቶጵያ ቦላኔ ኣሶሬ ቦላ ዮቴቲዳ ፒርዳ
«ኢንቴኖ ቶጵያ ኣሳቶ!
ኢንቴ ታ ማሻን ሲፌታና።»4
ኢዚ ባ ኩሼ ፑዴሃ ባጋን ዲዛ
ዴሬታ ቦላ ዴንና፤
ኣሶሬ ይሳና።
ናናዌካ ቡላሳና፤
ባዞ ቢታ ማላ ሜሊሳና።
ዶርሳ ዉዴይኔ ሜሄ ዉዴይ፥
ሜቴፌ ኡባ ቆሞይ
ሄን ሼምፓና።
ጉቶይኔ ቁጻርሲ
ኢዚ ጊምቤታን ኣቃና።
ኢስታ ዋሶይ ማስኮቴታራ
ሴቴታና።
ጊምቤዛ ላሌ
ኢሳ ኢሳ ፔንጌን ዶሬታና፤
ኬታ ቶኪ ኤቂዳ
ዚጋ ጎዳቲ ካሎታና።
ካሴ ኡፋይሳን ዲዛ
ካታማያ ሃኖ፤
ኢዛካ ባ ዎዚናን፥
«ታ ጻላ ዳይስ፤
ታፔ ሃራይ
ኦኒካ ዴና» ጊዳራ
ሂስቲን ሃኢ ዋናዳ
ዎራ ዶኣቲ ጉሪዛሶ
ባዞ ቢታ ጊዳ ኣታዴ?
ኢዚ ኣቻራ ኣ ቢዛ ኡባይ
ኢዞ ቂሼ ባ ኩሼ ዉጼስ።5
Source notes (5)
- Footnote ካሊቴ ዴሬ ኣሳታ፡ ካሊቴ ዴሬ ኣሳታ ጉሲ ፊሊስጼሜ ኣሳታ ጉሳ።
- Cross-reference ኢሳ 15፡1—16፡14፤ 25፡10-12፤ ኤር 48፡1—49፡6፤ ሂዚ 21፡28-32፤ 25፡1-11
- Cross-reference ሜ 19፡24
- Cross-reference ኢሳ 18፡1-7
- Cross-reference ኢሳ 10፡5-34፤ 14፡24-27፤ ናሆ 1፡1—3፡19
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.