ዮሃኒሳ ኣጁታ 7

ጼታኔ ኦይዱ ታማኔ ኦይዱ ሺ ኣሳ ኣታሜቴ

1ሄሳፌ ጉዬ ኦይዱ ኪታንቻታ ቢታ ቦላ ኦይዱ ባጋራ ኤቂዳይታ ቤያዲስ፤ ኢስቲካ ቢታ ቦላ ጊዲን ዎይኮ ኣባ ቦላ ዎይኮ ሚ ቦላ ኣይ ጫርኮይካ ጫርኮንታ ማላ ኦይዱ ባጋራ ዪዛ ቦሻ ጫርኮ ዉርሲ ኦይኪዳ።1 2ዴኦ ጾሳ ማታሜ ኦይኪዳ ሃራ ኪታንቻይ ኣርሼይ ሞኪዛ ባጋራ ሃ ዪሺን ታ ቤያዲስ፤ ቢታኔ ኣባ ቆሃናስ ኢስታስ ጎዳቴ ኢሜቲዳ ኦይዱ ኪታንቻቲ ባ ቃላ ቁ ሂስቲዲ፥ 3«ኑኒ ኑ ጎዳ ኦሳንቻታ ሊጴ ቦላ ማታሜ ዎና ጋካናስ ቢታ ቦላ ጊዲን ዎይኮ ኣባ ጊዶን ዲዛይታ ጊዲን ዎይኮ ሚታ ጊዲንካ ሄይታንታ ቆሆፒቴ» ጊ ዋሲዴስ።2

4ታኒካ ማታሜይ ኢስታ ቦላ ዎዳይታ ቆዳ ሲያዲስ፤ ኢስራኤሌ ኣሳ ኮቻ ኡባፌ ማታሜይ ኢስታ ቦላ ሾጬቲዳይታ ቆዳይ ጼታኔ ኦይዱ ታማኔ ኦይዱ ሺ ኣሳ።

5ዩሁዳ ቆሞፌ

ታማኔ ናምኡ ሺ፥

ኤሮቤሌ ቆሞፌ

ታማኔ ናምኡ ሺ፥

ጋዴ ቆሞፌ

ታማኔ ናምኡ ሺ፥

6ኣሴሬ ቆሞፌ

ታማኔ ናምኡ ሺ፥

ኒፍታሌሜ ቆሞፌ

ታማኔ ናምኡ ሺ፥

ሚናሴ ቆሞፌ

ታማኔ ናምኡ ሺ፥

7ሲሞና ቆሞፌ

ታማኔ ናምኡ ሺ፥

ሌዌ ቆሞፌ

ታማኔ ናምኡ ሺ፥

ዪሳኮሬ ቆሞፌ

ታማኔ ናምኡ ሺ፥

8ዛቢሎኔ ቆሞፌ

ታማኔ ናምኡ ሺ፥

ዮሴፌ ቆሞፌ

ታማኔ ናምኡ ሺ፥

ቢኒያሜ ቆሞፌ

ታማኔ ናምኡ ሺ።

ቦ ማይኦ ማይኢዳ ዳሮ ዴሬ

9ሄሳፌ ጉዬ ታ ጼሊሺን ቆዳይ ባይንዳ ዳሮ ዴሬይ ዲዛይሳ ቤያዲስ፤ ሄይታንቲካ ዴሬፔ፥ ዱማ ዱማ ቆሞፌ፥ ዱማ ዱማ ዛርኬፌኔ ዱማ ዱማ ቃላ ሃሳይዛይታፔ ሺቄቲዳይታ። ሄይቲ ዉሪ ቦ ማይኦ ማይኢዲ ዛምባ ሃይ ባ ኩሼን ኦይኪዲ ኣልጋ ሲንኒኔ ዶርሳዛ ሲንን ኤቂዳ። 10ቃላ ቁ ሂስቲዲ፥

«ኣቶቴ ኣልጋ ቦላ ኡቲዳ

ኑ ጎዳፔኔ ዶርሳዛፔኮ!» ጊዳ።

11ኢዛ ኪታንቻቲ ዉሪካ ኢዛ ኣልጋስ፥ ጪማታኔ ኦይዱ ዶኣታ ዩዪ ኣ ኤቂዳ ኣልጋዛ ሲንን ጉፋኒዲ ጾሳስ ጎይኒዳ።

12«ኣሚን! ሳባይ፥ ጊታቴ፥

ኤራቴ፥ ጋላታይ፥ ቦንቾይ፥

ዎልቃይኔ ሚኖቴ

ኑ ጎዳስ ጾሳስ

ሜርናፔ ሜርናስ ጊዶ።

ኣሚን!» ጊዳ።

13ጪማታ ጊዶፌ ኢሳዴይ ታኮ ሲሚዲ ታና፥ «ሃይቲ ቦ ማይኦ ማይኢዳይቲ ኦናንቴ? ኢስቲ ኣዋፔ ዪዳይቴ?» ጊዴስ።

14ታኒካ፥ «ጎዳዉ! ኔ ኤራሳ» ጋዲስ። ኢዚካ ታስ፥ «ሃይቲ ዎልቃማ ዋዬዛ ካንዲ ዪዳይታ፤ ኢስቲ ባ ማይኦካ ዶርሳ ሱን ሜጪ ጌሺዳ።3 15ሄሳ ጊሻስ ጾሳ ኣልጋ ሲንን ዴኢዲ ቃማኔ ጋላስ ኢዛ ኬን ኢዛስ ኦቴስ፤ ኣልጋ ቦላ ኡቲዳይሲ ባ ቦንቾራ ቤቲዲ ኢስታስ ኩዋሶ ጊዳና። 16ሃይሳፌ ጉዬ ኢስቲ ጋፌቴና፤ ሳሞቴቴና፤ ኣርሼ ሴላይካ ኢስታ ቦቼናኔ ሆምቤይካ ኢስታ ሆምቤና።4 17ኣልጋዛስ ጊዶ ኣዳን ኡቲዳ ዶርሳይ ኢስታ ሄሚዛዴ ጊዳና፤ ኢስታካ ጌዴ ዴኦ ሃ ፑልቶይ ዲዛሶ ካሌና፤ ጾሲ ኢስታ ኣይፌፔ ኣፉን ቁጫና» ጊዴስ።5