ጌሻ ማጻፋ
ዬ ማጻፋ 94
ኣቤት ጎዳዉ!
ኔኒ ሃሎ ኬሲዛ ጾሳ፤
ኣቤት ሃሎ ኬሲዛ ጾሳዉ!
ኔ ቦንቾ ቆንጪሳ።
ኣቤት ሳኣ ፒርዲዛይሶ! ዴንዳ!
ኦቶራንቻታስ ቤሲዛ
ቂጻቴ ኢማ።
ኣቤት ጎዳዉ!
ኢታቲ ኣዉዴ ጋካናስ
ጋምኣኔ?
ኢስቲ ኣዉዴ ጋካናስ
ኡፋዬታኔ?
ኢታ ኦዛ ኡባቲ
ባንታ ኦቶሮ ቃላን ሃሳዬቴስ፤
ጮ ጬቄቴቴስ።
ኣቤት ጎዳዉ!
ኢስቲ ኔ ዴራ ሊቂሴቴስ፤
ኣሳ ቶቼቴስ።
ኢስቲ ኣምኤታኔ
ቤቴ ኣሳታ ዎቴስ፤
ዪኦታ ሲፌቴስ።
ሂስቲዲ ኢስታስ፥
«ጎዳይ ኑና ቤኤና፤
ያቆቤ ጾሲ
ኣኬኬና» ጌቴስ።
ኢንቴኖ ኣሳ ጊዶፌ
ዳማቶ! ኣኬኪቴ!
ኢንቴኖ ኤያቶ!
ኣዉዴ ኢንቴ ኤራኔ?
ሃይ ኢሚዳ ጾሲ ሲዬኔ?
ኣይፌ ሜዳ
ጾሲ ቤኤኔ?
ካዎቴ ሴሪዛይሲ
ቃጻዬኔ?
ኣስ ኤራቴ ታማርሲዛይሲ
ባስ ኤሬኔ?
ጎዳይ ኣሳ ቆፋይ ሎንታይሳኔ
ሃዳ ጊዲዳይሳ ኤሬስ።1
ኣቤት ጎዳዉ!
ኔኒ ሴሪዛዴይኔ
ኔኒ ኔ ዎጋፔ ታማርሲዛ
ኣሲ ኣንጄቲዳዴ።
ኢታቲ ኩንዳና ኦላይ
ቦኬታና ጋካናስ፥
ኔ ኢዛ ሜቶፔ ሼምፒሳሳ።
ጎዳይ ባ ኣሳ ኦሌና፤
ኢዚ ባይታ ኣጌና።
ፒርዳይ ሲሚዲ ጺሎ ፒርዳስ
ዮች ጊዳና፤
ጺሎቲ ኡባይ
ቱማ ፒርዳ ካላና።
ማካላንቻታ ቦላ
ታ ጊሻስ ኤቄታናይ ኦኔ?
ኢታ ኦዛይታራካ
ታ ጊሻስ ሞቴታናይ ኦኔ?
ጎዳይ ታና ማዶንታኮ፥
ታኒ ኤሶን ዱፎን ጌላዳ
ሲርጲ ጋና።
ኣቤት ጎዳዉ!
ታኒ፥ «ኩንዳና ሃናይስ» ጊሺን
ኔ ሜርና ሲቆይ ታና ካፊዴስ።
ታ ዎዚናይ ጬጬን ኩሚዳ ዎዴ
ኔ ሚንይ ኡፋይስ ዳሪሴስ።
ዎጋን ዜምፒዲ ጌላ ፒርዲዛዴራ
ኔኒ ዙፔታናስ ዳንዳያይ?
ጺሎ ኣሳታ ቦላ ጌኔ ዱላቴቴስ፤
ሱሬ ኣሳታ ቦላካ
ሃይቆ ፒርዳ ፒርዴቴስ።
ጎዳይ ጊዲኮ ታስ
ታኒ ባቃታ ኣቲዛ ሚጻ፤
ታ ጾሲ ታ ኢዛን
ዜምፒዛ ዎጋ ዛላ።
ኢስታ ኢታቴ ጊሻስ
ኢዚ ኢስታ ቃጻያና፤
ኢስታ ናጋራ ጊሻስ
ኢዚ ኢስታ ይሳና፤
ጎዳ ኑ ጾሳይ
ኢስታ ዲፒ ሂስታና።
Source notes (1)
- Cross-reference 1ቆሮ 3፡20
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.