ጌሻ ማጻፋ
ዬ ማጻፋ 88
ኢዝራኤሌ ኣስ ኤማኔይ ሶሬን ሺሺዳ ጊንጾ ቆሬ ናይቲ ዛማሬታ ካቦስ ዲ ጊጊሶን ዬጺዳ ማዛሙሬ
ኣቤት ጎዳዉ!
ታና ኣሺዛ ጾሳዉ!
ታኒ ጋላሲኔ ኦማርስ
ኔ ሲንን ዬካይስ።
ታ ዋሶይ ኔ ሲን ጋኮ፤
ኔ ሃይ ታ ዎሳኮ ዛራ።
ኣይስ ጊኮ ታ ዴኦይ
ሜቶን ኩሚዴስ፤
ታኒ ሃይቃና ማታዲስ።
ታኒ ዱፎን ጌሊዛ
ኣሳታራ ቆዴታዲስ፤
ዎልቃይ ባይንዳ ኣስ ጊዳዲስ።
ታኒ ኣሃታ ጊዶን
ኦሌቲዳ ኣሳ ማላ፥
ሃይቂዲ ዱፎን ሞጌቲዳ
ኣሃ ማላ፥
ታኒ ኡባካ
ኔኒ ዶጊዳ ኣሳ ማላኔ
ኔ ማዶፔ ዱጺዳ
ኣሳ ማላ ጊዳዲስ።
ኔኒ ታና ጪማ ኦላን፥
ዱጌ ማ ሶሆን ዬጋዳሳ።
ኔ ሃንቆይ ታና ዴጼስ፤
ኔ ሃንቆዛ ዳምባላይ
ታና ሙሌራ ሚቲዴስ።
ኔኒ ታ ላጌታ ታፔ ሃሳዳሳ፤
ኢስቲ ታና ሹኔታና ማላ
ኦዳሳ፤
ታና ጊዶዳ፤
ኬሳ ኤካናዉካ ዳንዳይኬ።
ኣቤት ጎዳዉ!
ካዮ ጋሶን ታ ኣይፌቲ ዶልጁሚዳ፤
ኡባ ጋላስ
ታኒ ኔኮ ዋሳይስ፤
ታ ኩሼታካ ኔኮ ሚጫይስ።
ኔኒ ሃይቂዳይታስ
ማላሊሲዛ ሚሽ ኦይ?
ኢስቲ ዴንዲዲ ኔና ጋላታኔ?
ኔ ሜርና ሲቆይ ዱፎን
ኔ ኣማኔቴይካ
ባሻሶን ዮቴቲዜ?
ኔ ማላሊሲዛ ኦሶይ
ማን ኤሬቲዜ?
ዎይኮ ኔ ጺሎቴይ
ዶጌቲዳ ኣሳታ ቢታን ቤታኔ?
ኣቤት ጎዳዉ!
ኔኒ ታና ማዳና ማላ
ታ ኔኮ ዋሳይስ፤
ማላዶ ማላዶ ታ ዎሳይ
ኔ ሲን ጋኮ።
ኣቤት ጎዳዉ!
ኔኒ ታና ኣይስ ኢጻይ?
ኔ ሲን ታፔ
ኣይስ ጌንይ?
ዬላጋቴሶፌ ዶማዳ፥
ታኒ ቱጋታዲሲኔ
ሃይቃና ማታዲስ፤
ኔኒ ታና ዳጋንን
ሂዶታ ቃንጻዲስ።
ሱሊዛ ኔ ሃንቆይ
ታ ቦላ ጋኪዴስ፤
ባቢሲዛ ኔ ሃንቆይ
ታና ይሲዴስ።
ኢስቲ ኩሜ ጋላስ
ዲኦ ሃ ማላ
ታና ጊዶዳ፤
ኢሲ ቦላ ጊዲዲ
ታና ዶዲ ኦይኪዳ።
ኔኒ ታ ላጌታኔ
ታ ሲቆታ ታፔ ሃሳዳሳ፤
ማይ ጻላ ታስ ዳቦ ጊዲዴስ።
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.