ጌሻ ማጻፋ
ዬ ማጻፋ 80
ዛማሬታ ካቦስ «ጪሻ» ጌቴቲዛ ዲ ጊጊሶን ማርካቴስ ዬጼቲዳ ኣሳፌ ማዛሙሬ
ኣቤት ኢስራኤሌ ሄንንቻዉ!
ዮሴፌ ናይታ
ዉዴ ማላ ካሌዛይሶ!
ኔኒ ኑ ዎሳ ሲያ፤
ኪሩቤታ ቦላራ ዲዛ
ኣራታን ኡቲዳይሶ!
ኔ ፖኦን ቆንጫ።1
ኤፍሬሜ፥ ቢኒያሜኔ ሚናሴ
ሲንን ቆንጫ ቤታ፤
ኔ ዎልቃ ዴንዳ
ያዳ ኑና ኣሻ።
ኣቤት ጾሳዉ!
ኑና ዛራ፤
ኑኒ ኣታና ማላ
ኔ ኣይፌሶ ኑስ ፖኢሳ።
ኣቤት ጎዳዉ
ኡባፌ ዎልቃማ ጾሳዉ!
ኔ ኣሳ ዎሳ ቦላ
ኣዉዴ ጋካናስ
ኔ ሃንቄታኔ?
ኔኒ ኢስታ ዬሆ
ቁማ ማላ ሚዛዳሳ፤
ቃሴ ኣፉን
ሃ ማላ ኡሻዳሳ።
ኑ ሾሮቲ ኑ ቢታ ኤካናስ
ባንታ ጊዶን ኦዬታና ማላ
ኦዳሳ፤
ኑ ሞርኬቲካ
ኑ ቦላ ሚጪዳ።
ኣቤት ኡባፌ
ዎልቃማ ጾሳዉ!
ኑና ዛራ፤
ኑኒ ኣታና ማላ
ኔ ኣይፌሶ ኑስ ፖኢሳ።
ኔኒ ጊብጼፔ ዎይኔ ኣኖ ኤሃዳሳ፤
ካዎቴታ ዬዴዳ
ኢስታ ቢታን ኢዞ ቶካዳሳ።
ኔኒ ኢዚስ ቢታ ቄጻ ጊጊሳዳሳ፤
ሂስቲን ጻጶ ዬዳዳ
ቢታ ኡባ ጋካዱስ።
ዙማቲ ኢዚ ኩዋን፥
ሊባኖሴ ዚጋቲ
ኢዚ ሃጋታን ካሜቲዳ።
ባ ሃጋታ ሜዲቴራኔ
ኣባ ጋካናስ
ቃሴ ባ ጼራታ ኤፊራጺሴ
ሻፋ ጋካናስ ዬዳዱስ።
ሂስቲን ኦጌራ ኣዛ ኡባይ
ኢዚ ኣይፌ ዱ ማና ማላ
ኢዚ ዩሾዛን ዲዛ ጊምቤዛ
ኣይስ ላላዲ?
ባዞ ጉዱን
ኢዚ ቦላ ዱሪ ካኤስ፤
ቃሴ ዎራ ዶኣቲ
ኡባይ ኢዞ ሜቴስ።
ኣቤት ኡባፌ
ዎልቃማ ጾሳዉ!
ኔኒ ኑኮ ሲማ፤
ሳሎራ ዱጌ ጼላዳ ኑና ቤኣ፤
ሃኖ ዎይኔ ሚዮ ናጋ።
ኢዛ ኔ ኡሻቻ ኩሼይ
ቶኪዳ ፑቴ፤
ኔኒ ኔስ ጋዳ ዲቺዳ ኣጫ።
ሞርኬቲ ኔ ዎይኔ ቄጺዲ
ታማን ጹጊዳ፤
ሄሳ ጊሻስ ኔኒ ኢስታ
ኔ ሃንቆዛ ሱሌን ይሳ።
ኔ ኩሼይ
ኔ ኡሻቻ ባጋራ ዲዛ ኣሳ
ኔኒ ኔስ ዲቺዳ ኣሳ ናጎ።
ሃይሳፌ ጉዬ ኑኒ
ኔና ኣጊዲ ጉዬ ሲሞኮ፤
ኑና ሼምፖራ ፓጻ ዎ፤
ኑኒካ ኔና ጋላታና።
ኣቤት ኡባፌ
ዎልቃማ ጾሳዉ!
ኑና ዛራ፤
ኑኒ ኣታና ማላ
ኔ ኣይፌሶ ኑስ ፖኢሳ።
Source notes (1)
- Cross-reference ኬሳ 25፡22
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.