ዬ ማጻፋ 72

ሶሎሞኔ ማዛሙሬ

1ኣቤት ጾሳዉ!

ሱሬ ፒርዳ ካዎስ፥

ኔ ጺሎቴካ

ካዎ ናስ ኢማ።

2ሂስቲኮ ኢዚ ኔ ዴራስ

ጺሎቴን ፒርዳና፤

ናቄቲዳይታሲካ

ሱሬ ፒርዳና።

3ዙማቲ ዱሬቴ ኤሃና፤

ዙምቡላቲካ ጺሎቴ

ኔ ዴራስ ኤሃና።

4ሜቶቲዳይታ ጊሻስ

ኢዚ ሞቴታና፤

ሂዬሳታ ኢዚ ኣሻና፤

ኡንኤዛይሳካ ኢዚ ሊቂሳና።

5ኣዋይኔ ኣጊናይ

ዲዛ ዎዴ ኡባን

ኣሳይ ኢዛስ ሃሬቶ።

6ካዎይ ሾቃን ቡኪዛ

ኢራ ማላኔ ጋዴ ካልሲዛ

ፑሴ ኢራ ማላ ጊዳና።

7ኢዚ ዲዛ ላይ ኡባን

ጺሎይ ጪያና፤

ኣጊናይ ያና ጋካናስ

ቢታ ቦላ ሳሮቴ ዳራና።

8ኣባፌ ቢዲ ኣባ ጋካናስ፥

ኤፊራጺሴ ሻፋፔ

ሳኣ ጋጻ ጋካናስ

ኢዚ ሃራና።1

9ባዞን ሜሄ ጻላ ሃሪ ኣቂዛይቲ፥

ኢዛ ሞርኬቲ ጉዱላ ላጫና።

10ታርሴሴ ካዎቲኔ

ሃሩሮታ ካዎቲ

ኢዛስ ጊራ ኤሃና።

ሳባኔ ሳባ ካዎቲ

ኢዛስ ኩሼ ጌን ኤሃና።

11ካዎቲ ኡባይ ኢዛስ ጉልባታና፤

ካዎቴይ ኡባይ

ኢዛስ ሃሬታና።

12ሜቶታንቻይ ዋሲዛ ዎዴ፥

ማንቆኔ ማዶይ ባይንዳ

ኣስ ኢዚ ኣሻና።

13ሂዬሳታሲኔ ማንቆታስ

ኢዚ ቃቴስ፤

ሜቶታንቻታ ሼምፖካ

ኢዚ ሃይቆፔ ኣሼስ።

14ኢስታ ሼምፖ ቆሆፔኔ

ጌኔፔ ኢዚ ኣሻና፤

ኢስታ ሱይ

ኢዛ ሲንን ኣልኦ።

15ካዎይ ሼምፖ ጋምኦ፤

ሳባ ቢታ ዎርቃይ ኢዛስ ኢሜቶ።

ፓጬይ ባይንዳ ኢዛስ ዎሴቶ፤

ጋላስ ኡባን ኢስቲ ኢዛ ኣንጄቶ።

16ቢታን ዳሮ ካይ ሞኮ፤

ዙማቲ ካን ካሜቴቶ፤

ቢታይ ሊባኖሴ ማላ

ካ ቢታ ጊዶ፤

ማታይ ዴምባ ኩሚዛ ማላ

ካታማ ኩሞ።

17ካዎዛ ሱን

ሜርናስ ሚኒ ዴኦ፤

ኣርሼይ ዴኢዛ ኬና

ጼይጌቲሼ ጋምኦ።

ካዎቴ ኡባይ

ኢዛ ባጋራ ኣንጄቶ፤

ዴሬ ኡባይ ኢዛ፥

«ኔ ኣንጄቲዳዴ» ጊ ኣንጆ።

18ማላሊሲዛ ሚሽ

ባርካ ኦዛ ጎዳይ፥

ጾሳይ፥ ኢስራኤሌ

ጾሳይ ጋላቴቶ።

19ኢዛ ቦንቾ ሱንይ

ሜርናስ ጋላቴቶ፤

ቢታ ኡባይ

ኢዛ ቦንቾን ኩሞ።

ኣሚን! ኣሚን!

20ኢሴዬ ና ዳዊቴ ዎሳይ

ሃይሳን ፖሌቲዴስ።