ዬ ማጻፋ 7

ቢኒያሜ ዛሬ ኩዜ ጋሶን ዳዊቲ ጎዳኮ ዚላሊዳ ዚላስ

1ኣቤት ጎዳዉ!

ታ ጾሳዉ ኔኒ ታስ ቆቴቲዛሶ፤

ታና ጎዲዛ ኡባፌ

ኔኒ ታና ኣሻ።

2ኔኒ ታና ኣሾንታ ኣጊኮ፥

ኢስቲ ታና ጋሞ ማላ

ሜንሬዲ፥

ኦኒኔ ኣሾንታሶን

ፑዜሬና።

3-4ኣቤት ጎዳዉ ታ ጾሳዉ!

ታኒ ኣስ ቆሂዳ ጊዲኮ፥

ታስ ሎኦ ኦዳዴስ

ኢታ ዛሪዳ ጊዲኮ፥

ዎይኮ ጋሶይካ ባይንዳ

ታ ሞርኬፌ ቦንቂዳ ጊዲኮ፥

ሄይታ ማላ ዮኦታፔ ኢሲኖካ

ታኒ ኦዳ ጊዲኮ፥

5ታ ሞርኬይ ታና ጎዲ ኦይኮ፤

ታና ሳኣንካ ዬሬ፤

ታና ቢታን ዬጊዲ

ታ ቦንቾ ካዉሾ።

6ኣቤት ጎዳዉ!

ኔ ሃንቆን ዴንዳ ኤቃ፤

ኤጺዛ ታ ሞርኬታ

ሃንቆ ቦላ ዴንዳ፤

ታ ጾሳዉ ቤጋ፤

ቱሙ ፒርዳ ፒርዳ።

7ዴሬታ ዱላታይ

ኔ ዩሾዛን ሺቆ፤

ኔኒ ኢስታ ቦላ ካዎታ።

8ጎዳይ ካዎቴታ ቦላ ፒርዴስ።

ኣቤት ጎዳዉ!

ታስ ታ ጺሎቴ ማላኔ

ታ ሱሬቴ ማላ ፒርዳ።

9ቆፋኔ ዎዚና ፒልጋ ኤሪዛ

ጺሎ ጾሳዉ!

ኢታታ ጌኔዛ ኔኒ ይሳ፤

ጊዶ ኣቲን ጺሎታ ሳሮን ናጋ።1

10ጾሲ ታስ ጎንዳሌ፤

ዎዚና ጺሎታ

ኢዚ ኣሺዛ ጾሳ።

11ጾሳይ ጺሎ ፒርዲዛ ጾሳ፤

ኢዚ ጋላስ ጋላስ

ባ ሃንቆ ቆንጪሲዛ ጾሳ።

12ኣሲ ባ ናጋራ ፓጺዲ

ሲሞንታ ኣጊኮ፥

ጾሲ ባ ማሻ ሌፌስ፤

ኢዚ ባ ዎንዳፌዛ

ዳፊ ኦይኬስ።

13ኢዚ ዎዛ ኦላ

ሚሻታ ጊጊሴስ፤

ታማ ላጮ ማላ

ፖፖልኡ ጊዛ

ባ ቶራ ዪሻ ጊጊሴስ።

14ኢታቴ ሻሪዲ፥

ጌኔ ቃንቲዳይ ዎርዶ ዬሌስ።

15ሃራ ኣሳታስ ኦላ ቦኪዳ ኣሲ

ባ ቦኪዳ ኦላን

ሲሚ ኩንዴስ።

16ኢዚ ኤሂዛ ጌኔይ

ኢዛ ሁኤስ ሲሜስ፤

ኢዛ ማካላይካ ሲሚዲ

ኢዛስ ጊዴስ።

17ጎዳ ጺሎቴ ጊሻስ

ታኒ ኢዛ ጋላታና፤

ቃሴ ኡባፌ ቃ

ጎዳ ሱንስ

ታኒ ጋላታ ማዛሙሬ ዬጻና።