ዬ ማጻፋ 68

ዳዊቲ ዛማሬታ ካቦስ ዬጺዳ ማዛሙሬ

1ጾሲ ዴንዶ፤

ኢዛ ሞርኬቲ ላሌቴቶ፤

ኢዛ ኢጺዛይቲ

ኢዛ ሲንፌ ባቃቴቶ።

2ጩዋይ ጫርኮን ላሌቲዛ ማላ

ኔኒ ኢስታ ላላ፤

ሙቃዳይ ታማን ሴሪዛ ማላ፥

ኢታቲ ጾሳ ሲንፌ

ሴሪ ዬቶ።

3ጺሎቲ ጊዲኮ ኡፋዬቴቶ፤

ጾሳ ሲንን

ኡፋይሳን ሆምቦጬቶ፤

ቃሴካ ማጉሌቶ።

4ጾሳስ ዬጺቴ፤

ኢዛ ሱንስ ጋላታ ማዛሙሬ ዬጺቴ።

ሻራ ቦላራ1 ሄሜቲዛይሳ

ቁ ቁ ሂስቲቴ፤

ኢዛስ ሱንይ ጎዳ፤

ኢንቴካ ኢዛ ሲንን

ኬሂ ኡፋዬቲቴ።

5ጾሲ ባ ጌሻሶሆን ዲሼ

ኣዋይ ባይንዳይታስ ኣዋ፤

ቃሴ ኣምኤታስካ ፒርዲዛ ዳና።

6ጾሲ ባርካ ዲዛ ቢዛታስ

ሶ ኣስ ኢሜስ፤

ቃሾ ኬን ዲዛይታ ቢርሺዲ

ኢስታ ኢሻሎን ዎስ።

ማካላንቻቲ ጊዲኮ

ሱሊዛ ባዞን ዴኣና።

7ኣቤት ጾሳዉ!

ኔኒ ኔ ኣሳ ካሌዳ ዎዴ፥

ኔኒ ኢስታራ ባዞ

ካንዳ ዎዴ፥

8ሲና ጾሳ ሲንን፥

ኢስራኤሌ ጾሳ ሲንን

ቢታይ ቃጺዴስ፤

ሳሎቲ ኢራ ዱጌ ቲጊዳ።2

9ኣቤት ጾሳዉ!

ኔኒ ኮሺዛ ኬና

ኢራ ኢማዳሳ፤

ላዳ ቢታካ ኣራዲሳዳሳ።

10ኔ ዴሬዚካ ኢዞ

ባስ ዱሳሶ ሂስቲዳ፤

ኣቤት ጾሳዉ!

ማንቆታስ ኮሺዛዝ

ኔኒ ኪያቴን ኢማዳሳ።

11ጎዳይ ቃላ ዬዲዴስ፤

ሄ ኪታ ዳሮ ማጫሳቲ

ዴራስ ኣዋጂዳ።

12ኢስቲ፥ «ካዎቲ ባ ኦላንቻታራ

ዲኦ ጊሼቲ ኤኪዳ።

13ዶርሳታ ናጋናስ ጉዬን ኣቲዳይቲ

ቢራፔ ኦሴቲዳ ቄፌቲ ቦላራ

ጾልቂዛ ዎርቃን

ቲዬቲዳ ሃራጴ

ሚስሌ ዴሚዳ» ጊዳ።

14ኡባ ዳንዳይዛ ጾሳይ

ካዎታ ላሊዳ ዎዴ፥

ጻልሞኔ ዙማ ቦላ

ሻች ቡኪሲዴስ።

15ባሳኔ ዙማቲ

ዎጋ ጊታ ዙማታ፤

ባሳኔ ዙማታ ቦላ

ዳሮ ፖጎኖቲ3 ዴቴስ።

16ዳሮ ፖጎኖቲ ዴኢዛ ዙማቶ!

ጾሲ ዳናስ ዶሪዳ ዙማዛ

ኢንቴ ኣይስ ሚቃይኔን ጼሌቲ?

ጎዳይ ኢዛን ሜርናስ ዴኣና።

17ጾሳ ፓራ-ጋሬቲ

ዳሮ ሺያን ቆዴቲዛይታ፤

ጎዳይ ሲና ዙማፔ

ባ ጌሻሶሆ ዪዴስ።

18ጎዳዉ! ዲኦ ኤካዳ

ፑዴ ኔ ዱሳስ ኬዛዳሳ፤

ኣሳ ኡባፌ ኢሞታ ኤካዳሳ፤

ሃራይ ኣቶሺን

ማካላንቻታፔካ

ኤካዳሳ፤4

19ሃች ሃች ኑ ቶሆ

ቶኪዛ ጎዳይ፥

ኑና ኣሺዛ

ኑ ጾሳይ ጋላቴቶ።

20ቤኢቴ! ኑ ጾሲ ኣሺዛ ጾሳ!

ሃይቆፔ ኣታና ዳንዳዬቲዛይ

ጎዳይ ኣሺና።

21ጾሲ ቱማፔ ባ ሞርኬታ

ሁኤ ኪንቻና፤

ናጋራ ኦጌን ሄሜቲዛ

ጎፋራንቻታ

ሁኤ ቆኤሬና።

22ጎዳይ፥ «ታኒ ኢንቴ ሞርኬታ

ባሳኔፔ ዛራዳ ኤሃና፤

ታኒ ኢስታ ጪማ ኣባ ጊዶፌ

ኬሳዳ ጉዬ ዛራና።

23ኔኒ ኔ ሞርኬታ ሱ

ዬ ኣና፤

ኔ ካናቲካ ሞርኬታ ሱፌ

ባንታ ጊሻ ላጫና» ጊዴስ።

24ኣቤት ጾሳዉ! ኔ ጾኖ ጪፍራይ

ኡባን ቤቴስ፤

ታ ጾሳኔ ታ ካዎይ ኣዣባን

ባ ጌሻ ሶ

ጌልሼ ቆንጬስ።

25ዬጺዛይቲ ሲንን፥

ቃሴ ካራቤ ባቂዛ

ጌላኦቲ ጊዶን፥

ዲጺዛይቲ ጉዬን

ኣዣቢ ቤቴቴስ።

26ኢስቲ፥ «ጾሳ ኩሜ

ሺቆን ጋላቲቴ፤

ኢንቴኖ ኢስራኤሌ ዜሬቶ

ጎዳ ጋላቲቴ» ጌቴስ።

27ሄ ጪፍራን ኡባፌ ካሎቲዛ

ቢኒያሜ ዛሬቲ ካሌቴስ።

ካሊዲ ዩሁዳ ዳናቲ

ባንታ ቡቴን ቡቴን ቤቴስ፤

ዉርሴን ዛቢሎኔ

ዳናቲኔ

ኒፍታሌሜ ዳናቲ ካሌቴስ።

28ኣቤት ጾሳዉ!

ኔ ዎልቃ ቆንጪሳ።

ሃይሳፌ ካሴ ኔ ኑስ

ኦዳይሳ

ሃኢካ ኔ ሚኖቴ ኑና ቤሳ።

29ዬሩሳላሜን ዲዛ

ኔ ኬ ጊሻስ

ካዎቲ ኢሞታ

ኔስ ኤኪ ያና።

30ማቃ ጊዶን ዲዛ ዶኣታ5

ኔኒ ሴራ።

ቦራታኔ ማራታ

ዉዴ ሚሳቲዛ

ካዎታ ኔኒ ላላ፤

ኢስቲ ጉልባቲዲ ባንታ ቢራ

ኔስ ጊራና ማላ ኦ፤

ኦሌታናስ ዬሞቲዛ

ኣሳታ ላላ።

31ጊታ ኣሳቲ ጊብጼፔ ያና፤

ቶጵያይ ባ ኩሼ

ጾሳኮ ሚጫና።

32ኢንቴኖ ሳኣ ካዎቴቶ!

ጾሳስ ዬጺቴ፤

ጎዳስ ጋላታ ማዛሙሬ ሺሺቴ።

33ቤኒሶፔ ዶሚዲ ዲዛ

ሳሎታፔ ቦላራ

ቢዛይሳስ ዬጺቴ፤

ኢዚ ባ ዎልቃማ ጬንጉርሳ

ጉንን ዮቲሺን ኤዝጊ ሲዪቴ።

34ኢዛ ቴማይ ኢስራኤሌ ቦላና፤

ኢዛ ዎልቃይካ ሳሎና።

ሄሳ ጊሻስ

ጾሳ ዎልቃ ኣዋጂቴ።

35ኣቤት ጾሳዉ!

ኔኒ ኔ ኬፌ

ቆንጫሼ ማላሊሳሳ፤

ኢስራኤሌ ጾሳይ

ባ ዴራስ ሚኖቴኔ

ዎልቃ ኢሜስ።

ጾሲ ጋላቴቶ።