ዬ ማጻፋ 66

ዛማሬታ ካቦስ ዬጼቲዳ ማዛሙሬ

1ሳኣን ዲዛ ኣስ ኡባይ

ኢንቴ ቃላ ቂሲዲ

ኢሊሊሳን ጾሳ ጋላቲቴ።

2«ጾሳ ሱን ቦንቼቶ!»

ጊዲ ዬጺቴ፤

ቦንቾ ጋላታ ኢዛስ ኢሚቴ።

3ጾሳስ፥ «ኔ ኦሶቲ

ኣይ ኬና ማላሊሲዞ!

ኔ ዎልቃይ ዳሮ ጊዲዳ ጊሻስ

ኔ ሞርኬቲ ያሻን

ኔ ሲንን ኮኮሬቴስ።

4ሳኣን ዲዛ ኡባይ

ኔስ ጎይኔስ፤

ኔና ሳቤስ፤

ኔ ሱንስ ጋላታ ማዛሙሬ

ዬጼስ» ጊቴ።

5ሃ ዪቴ፤

ጾሲ ኦዳዝ ቤኢቴ፤

ኢዚ ኣሳ ጊዶን ማላሊሲዛ

ኦሶ ኦዴስ።

6ኢዚ ኣባ ሃ ሻኪዴስ፤

ቃሴ ቤኒ ኑ ኣዋቲ

ሻፋራ ሜላ

ቢታራ ቶሆን ፒኒዳ፤

ኑኒካ ኢዚ ኦዳ

ኦሶን ኡፋዬቲዶስ።1

7ኢዚ ባ ዎልቃን ሜርናስ ሃሬስ።

ካዎቴታ ኡባካ

ባ ኣይፌን ጼሌስ፤

ሄሳ ጊሻስ ማካሊዛይቲ

ኢዛ ቦላ ቁ ቁ

ጎፔቶ።

8ኣሳዉ! ኑ ጾሳ ጋላቲቴ፤

ኢንቴ ጋላታ ጬንጉርሳይ ሲዬቶ።

9ኢዚ ኑና ሼምፖራ

ፓጻ ዎዴስ፤

ኑኒ ኩንዶንታ ማላካ

ናጊዴስ።

10ኣቤት ጾሳዉ!

ኔኒ ኑና ፓጫ ጼላዳሳ፤

ቢራ ሴሪሲ ጌሺዛ ማላ

ኑና ጌሻዳሳ።

11ኔኒ ኑና ዎጺማዴን

ጌልዳሳ፤

ኑ ዞኮንካ

ዴጾ ባኦ ባኢሳዳሳ።

12ኑ ሞርኬቲ

ኑና ሁኤራ ዱጌ

ዬና ማላ ኦዳሳ፤

ኑኒ ሃ ጊዶራኔ

ታማ ጊዶራ ካንዶስ፤

ጊዶ ኣቲን ሃኢ ኑና

ኢሻሎ ሶሆ ኤሃዳሳ።

13ታኒ ጹጌቲዛ ያርሾራ

ኔ ጌሻሶሆ ጌላዳ

ታ ኣዲና ኔስ ጋና።

14ታኒ ሜቶቲዳ ዎዴ

ታ ዶናፔ ታ ኬሲዳይሳ

ታ ኢንጻርሳን ታ ኣዲኔቲዳ

ኣዲና ታ ጋና።

15ታኒ ኔስ ጹጌቲዛ ያርሾስ

ሞታ ሺሻና፤

ሳዎ ያርሾስ ርሾታ፥

ኮርማታኔ

ኮርቤታ ሺሻና።

16ኢንቴኖ ጾሳስ ያዪዛይቶ!

ኡባቲ ሃ ዪዲ ሲዪቴ፤

ጾሲ ታስ ኦዳይሳ

ታኒ ኢንቴስ ዮታና።

17ታ ቃላ ቁ ሂስታዳ

ታኒ ኢዛኮ ዋሳዲስ፤

ታ ኢንጻርሳንካ ኢዛስ

ጋላታ ሺሻዲስ።

18ታኒ ታ ዎዚናን ናጋራ

ጌንዳኮ፥

ጎዳይ ታ ዎሳ ሲዬና።

19ጊዶ ኣቲን ጾሲ ቱማፔ

ታስ ሲዪዴስ፤

ታ ዎሳካ ኤዝጊዴስ።

20ታ ዎሳ ካንታ፥

ባ ሜርና ሲቆ

ታፔ ሃሶንታ

ጾሳይ ጋላቴቶ።