ዬ ማጻፋ 64

ዳዊቲ ዛማሬታ ካቦስ ዬጺዳ ማዛሙሬ

1ኣቤት ጾሳዉ!

ታ ማጋና ኔኒ ሲያ፤

ታ ሼምፖዮ

ዎናስ ማንዲዛ

ታ ሞርኬታፔ ታና ኣሻ።

2ፓላ ኣሳታ ማቆፌኔ

ማካላንቻታ ዱላታፔ

ታና ጌን።

3ኢስቲ ባንታ ኢንጻርሳ

ማሻ ማላ ሌፊዳ፤

ቃሴ ማርዜ ቃላታ

ዎንዳፌ ዪሻ ማላ

ዱካናስ ጊግሲዳ።

4ኢስቲ ቆቴቲዲ ባንታ ዎንዳፌን

ጺሎ ኣስ ዱኬቴስ፤

ኣሲ ኣኬኮንታ ዲሺን

ዱካናስ ጉዬ ጌቴና።

5ኢስቲ ኢታ ኦናስ

ኢሶይ ኢሳራ ማቄቴቴስ፤

ጌማራ ዎጺማዴ

ዎናስ ዞሬቴቴስ፤

ኢስቲ፥ «ኑና

ኦኒ ቤኣኔ?» ጌቴስ።

6ኢስቲ ጌኔ ማቄቲሼ፥

«ኑኒ ሎኦ ማቆ

ማቄቲዶስ» ጌቴስ፤

ሄሲካ ኣሳ ዎዚናይኔ ካሃይ

ኢታን ኩሚዳይሳ ቤሴስ።

7ጊዶ ኣቲን ጾሳይ

ኢስታ ባ ዪሻን ዱካና፤

ኢስቲ ኣኬኮንታ ማዱንና።

8ኢዚ ኢስቲ ሃሳይዳ ቃላ

ኢስታ ቦላ ዛራና፤

ኢስታካ ባሻን ጋና፤

ኢስታ ቤኢዳ ኡባይ

ኣሙሲዲ ሁኤ ቃና።

9ሄ ዎዴ ኣሳይ ኡባይ

ጾሳስ ያያና፤

ጾሳ ኦሶ ቆንጬን ዮታና፤

ኢዚ ኦዳይሳካ

ዩሺ ቆፓና።

10ጺሎቲ ጎዳን ኡፋዬቴቶ፤

ኢዛካ ባስ ባቃቲ

ኣቲዛሶ ኦቶ፤

ዎዚና ሱሬቲ ኡባይ

ኢዛ ጋላቴቶ።