ጌሻ ማጻፋ
ዬ ማጻፋ 59
ሳኦሊ ዳዊቴ ዎናስ ኪቲዳ ኣሳቲ ኢዛ ኬ ዶዲ ኡቲዳ ዎዴ ዳዊቲ ዛማሬታ ካቦስ፥ «ይሶፋ» ጌቴቲዛ ዲ ጊጊሶን ሺሺዳ ዎሳ ማዛሙሬ
ኣቤት ታ ጾሳዉ!
ታ ሞርኬታፔ ታና ኣሻ፤
ታ ቦላ ዴንዲዛይታፔ ታና ናጋ።1
ኢታ ኦዛይታፔ
ታና ማዳ፤
ሱ ጉሲዛ ኣሳታፔ
ታና ኣሻ።
ኣቤት ጎዳዉ!
ኢስቲ ታና ዎናዉ
ዛማዲዲ ናጊዛይሳ ቤኣ!
ሜንጼ ኢታ ኣሳቲ
ታኒ ሞሮኔ
ናጋራ ኦንታ ዲሺን
ታ ቦላ ዱላቴቴስ።
ኣይኮ ሞሮ ታ ኦንታ ዲሺን
ታና ይሳናስ ጊጌቲዳ፤
ሃይሳ ኔኒ ቤኣዳ
ታና ማዳና ዴንዳ።
ኣቤት ጎዳዉ!
ኡባፌ ዎልቃማ ጾሳዉ!
ኔኒ ኢስራኤሌ ጾሳ፤
ካዎቴታ ኡባ
ቃጻያናስ ኔ ቤጋ፤
ማካላ ኦዛይታ ማሮፓ።
ኢስቲ ካና ማላ ሆስካቲሼ
ካታማ ጊዶን ዩዪ ፔኢዲ
ኦማርስ ሲማና።
ኢስታ ዶናፔ ኬዚዛይሳ ሲዪቴ!
ኢስታ ኢንጻርሳይ ማሻ ማላ፤
ኢስቲ፥ «ኦኔ ኑና ሲያናይ?»
ጊ ቆፔቴስ።
ጊዶ ኣቲን ኣቤት ጎዳዉ!
ኔኒ ኢስታ ቦላ ሚጫሳ፤
ካዎቴታ ኡባ ካሳ።
ታ ጾሳዉ!
ኔ ታስ ሚጻ ጊዲዳ ጊሻስ
ታ ኔናን ኣማኔታይስ።
ታ ጾሳይ ባ ሜርና ሲቆን
ታናራ ጋይታና፤
ታ ሞርኬታ ኩንዴ
ኢዚ ታና ቤሳና።
ኣቤት ኑስ ጎንዳሌ ጊዲዳ
ጎዳዉ! ታ ኣሳይ
ኔኒ ሃሎ ኬሲዛይሳ
ባሎንታ ማላ
ኔኒ ኢስታ ዎ ይሶፋ፤
ጊዶ ኣቲን ኔ ዎልቃን
ኢስታ ላላኔ ካዉሻ።
ኢስቲ ባንታ ዶናፔ
ኬሲዛ ናጋራ ጊሻስ፥
ባንታ ኢንጻርሳ ቃላ ጊሻስ፥
ኢስቲ ቃንጊዳ ቃንጌ
ጊሻሲኔ
ዎርዶቲዛ ጊሻስ
ባንታ ኦቶሬቴን ኦይኬቴቶ።
ኔ ሃንቆን ኢስታ ይሳ፤
ኢስታ ሙሌራ ዲፒ ሂስታ፤
ሄ ዎዴ ጾሲ
ያቆቤ ዜሬ
ኣይሲዛዴኔ
ሳኣ ጋጻ ጋካናስ ዲዛ ዴራ
ሃሪዛዴ ጊዲዳይሳ
ኣሲ ኡባይ ኤራና።
ኢስቲ ካና ማላ ሆስካቲሼ
ካታማ ጊዶን ዩዪ ፔኢዲ
ኦማርስ ሲማና።
ኢስቲ ሚዛ ሚሽ ሃሲሼ ዩዬቴስ፤
ካሎንታ ኣጊኮ
ካና ማላ ላዌቴስ።
ጊዶ ኣቲን ታኒ
ኔ ዎልቃ ሳባና፤
ማላዶ ማላዶ
ኔ ሜርና ሲቆ ጊሻስ
ዬጻና።
ኔኒ ታስ ሜቶ ጋላስ
ዜምፖኔ ባቃታ ኣቲዛ ሚጻ።
ኣቤት ጾሳዉ!
ታ ዎልቃይ ኔና፤
ኔ ታስ ሚጻ፤
ኔ ሜርና ሲቆን ታና ሲቃሳ፤
ሄሳ ጊሻስ ጋላታ ዬን
ታ ኔና ሳባና።
Source notes (1)
- Cross-reference 1ሳሜ 19፡11
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.