ዬ ማጻፋ 57

ዳዊቲ ሳኦሌ ሲንፌ ባቃቲዲ ጎንጎሎ ጊዶን ዲሼ ዛማሬታ ካቦስ፥ «ይሶፋ» ጌቴቲዛ ዲ ጊጊሶን ሺሺዳ ዎሳ ማዛሙሬ

1ኣቤት ጾሳዉ!

ኔ ታስ ቃታ፤

ታና ማራ፤

ታ ሼምፖያ ኔናን ዜምፓዱስ፤

ባሻይ ኣና ጋካናስ

ታኒ ኔ ቄፌታ ጋርሳን ቆቴታና።

2ኢዚ ባ ሃልቾ ማላ ታስ ፖሊዛ

ኡባፌ ቃ

ጾሳኮ ዋሳይስ።

3ጾሲ ሳሎፔ ማዶ ኪቲዲ

ታና ኣሻና፤

ታና ዬዛይታ ካዉሻና፤

ጾሲ ባ ሜርና ሲቆኔ

ባ ቱማቴ ታስ ኪታና።

4ታኒ ታ ሞርኬታ ጊዶን፥

ኣስ ፑዚዲ ሚዛ ጋሞ

ሚሳቲዛይታ ጊዶን ዳይስ።

ኢስታ ኣቻይ ቶራኔ

ዎንዳፌ ዪሻ ማላ፤

ኢስታ ኢንጻርሳይካ

ቃራ ማሻ ማላ።

5ኣቤት ጾሳዉ! ኔኒ ሳሎታፔ

ቦላራ ቁ ቁ ጋ፤

ኔ ቦንቾይ ሳኣ ኡባ ኩሞ።

6ኢስቲ ታ ቶሆስ ዎጺማዴ ዎዳ፤

ታ ኣሳቴ ኩኒሲዳ፤

ኢስቲ ታ ኦጌን ኦላ ቦኪዳ፤

ጊዶ ኣቲን ሄ ኦላን

ባንታስ ኩንዲዳ።

7ታ ዎዚናይ ሚኒ ዴስ፤

ኣቤት ጾሳዉ!

ታ ዎዚናይ ሚኒዲ ዴስ፤

ታኒ ኔስ ዬጻናኔ

ኔና ሳባና።

8ታ ሼምፖዬ ቢርካ!

ዲቲኔ ማሲንቆቲ

ቤጊቴ!

ታኒካ ዎንታራ ዴንዳና።

9ኣቤት ጎዳዉ፥ ታኒ ኔና

ኣሳ ኡባ ሲንን ጋላታና፤

ቃሴ ዴራ ጊዶን

ታ ኔና ዬን ሳባና።

10ኔ ሜርና ሲቆይ

ፑዴ ሳሎ ጋኪዴስ፤

ኔ ቱማቴይካ

ሳሎ ሻራ ጋኪዴስ።

11ኣቤት ጾሳዉ!

ኔኒ ሳሎታፔ ቦላራ

ቁ ቁ ጋ፤

ኔ ቦንቾይ

ሳኣ ኡባ ኩሞ።1