ዬ ማጻፋ 5

ዳዊቲ ዛማሬታ ካቦስ ሱሱልኤን ዬጺዳ ማዛሙሬ

1ኣቤት ጎዳዉ!

ታኒ ዮቲዛይሳ ኤዝጋ፤

ታ ኡንኦን ዎሲዛ

ዎሳካ ሲያ።

2ታ ካዎዞ ጾሶ!

ታ ኔና ዎሲዛ ጊሻስ

ታና ማዳ ጋዳ

ታ ዋሲዛ ዋሶዛ ኔ ሲያ።

3ኣቤት ጎዳዉ!

ማላዶ ማላዶ ጉራን

ኔኒ ታ ቃላ ሲያሳ።

ማላዶ ማላዶ ጉራን

ታኒ ታ ዎሳ

ኔ ሲን ሺሻዳ፥

ኔኒ ታስ ኢሚዛ ዛሮ

ኤካና ጋዳ ናጋይስ።

4ኔኒ ኢታቴን

ኡፋዬቶንታ ጾሳ፤

ኢታቲ ኔናራ ዴኤቴና።

5ጬቄቲዛይቲ

ኔ ሲንን ኤቄቴና፤

ኢታ ሚሽ ኦዛ ኡባታ

ኔኒ ኢጻሳ።

6ዎርዶ ሃሳይዛይታ

ኔኒ ይሳሳ።

ሱ ጉሲዛይታኔ

ጪሚዛ ኣሳታ

ኔኒ ሃራሴታሳ።

7ጊዶ ኣቲን ታኒ ኔ ማሮ ዳሮን

ኔ ኬ ጌላና።

ኔ ጌሻ ኬኮ ሲማዳ

ቦንቾኒኔ ያሻቴን

ኔስ ጎይናና።

8ኣቤት ጎዳዉ! ታ ሞርኬታፔ

ኔ ታና ኣሻ፤

ታና ኔ ጺሎቴንካ

ካሌ፤

ኔ ኦጌ ታ ሲንን ሱሪሳ።

9ኢስታ ዶናፔ ኬዚዛ ቃላይ

ቱሙ ጊዴና።

ኢስታ ዎዚናንካ ጌኔይ ኩሚዴስ፤

ኢስታ ዶናይ

ዶዬቲዳ ዱፎ ማላ፤

ኢስቲ ባንታ ኢንጻርሳን

ኣስ ጪሜቴስ።1

10ኣቤት ጾሶ!

ኢስታ ቦላ ኔኒ ፒርዳ፤

ኢስታ ጌኔይ ኢስታ ኤኪ ቦ።

ኢስታ ናጋራይ ዳሮ፤

ሄሳ ጊሻስ

ኔኒ ኢስታ ጎዳ ዲጋ፤

ኣይስ ጊኮ

ኢስቲ ኔ ቦላ ጌላቲዳ።

11ጊዶ ኣቲን ኔናን ዜምፒዳ

ኡባቲ ኡፋዬቴቶ፤

ኢስቲ ሜርናስ ኡፋይሳን ዬጼቶ።

ኔ ሱን ሲቂዛ

ኡባቲ ኡፋዬቴቶ፤

ኢስቲካ ኔናን ናጌቴቶ።

12ኣቤት ጎዳዉ!

ኔኒ ጺሎታ ኣንጃሳ፤

ኔኒ ጎንዳሌን ካሚዛ ማላ

ኔ ኪያቴን ኢስታ ካማሳ።