ዬ ማጻፋ 41

ዳዊቲ ዛማሬታ ካቦስ ዬጺዳ ማዛሙሬ

1ሂዬሳስ ቆፒዛ ኣሲ ኣንጄቲዳይሳ፤

ሜቶ ጋላስ ጎዳይ ኢዛ ኣሼስ።

2ጎዳይ ኢዛ ናጊዲ ፓጻ ዎስ፤

ኢዚካ ቢታ ቦላ ኣንጄታና፤

ጎዳይ ኢዛ ሞርኬታስ

ኢዛ ኣዲ ኢሜና።

3ጎዳይ ኢዚ ሃርጌቲዲ

ሂጻን ዲሺን ማዴስ፤

ሳኬቲንካ ኢዛ ፓስ።

4ታኒ ጊዲኮ፥ «ኣቤት ጎዳዉ!

ታኒ ኔና ቆሂዳ ጊሻስ

ታና ማራ፤

ሃርጌፌ ታና ፓ» ጋዲስ።

5ታ ሞርኬቲ ታ ቦላ

ኢታ ሚሽ ሃሳይዲ፥

«ኢዚ ኣዉዴ ሃይቃንዴሻ?

ቃሴ ኢዛ ሱንይካ

ኣዉዴ ያንዴሻ?» ጌቴስ።

6ታና ቤያናዉ ዪዛ ኦኒካ

ባ ዎዚናን

ኢታ ሚሽ ሱሼ

ቆፔ ቆሞን ሃሳዬስ፤

ካሬ ኬዚዲካ ዚጊርስ ፑኔስ።

7ታና ኢጺዛ ኡባቲ

ዙፔቲዲ ታ ቦላን

ሳሱኬቴቴስ፤

ኢታ ሚሺ ታ ቦላ

ጋካና ማላ ኣሞቴቴስ።

8«ኢዛ ኢታ ሃርጌይ ኦይኪዴስ፤

ኢዚ ሄ ኢቺዳሶፔ

ሙሌካ ዴንዴና» ጌቴስ።

9ሃራይ ኣቲን ታኒ ኣማኔቲዛ

ታ ሲቆ ላጌይ፥

ታናራ ኢሲ ማዳፌ ሚዳይ

ታ ቦላ ቶሆ ዴንዴስ።1

10ጊዶ ኣቲን ኣቤት ጎዳዉ!

ኔኒ ታና ማራ፤

ታኒ ሃሎ ኬሳና ማላ

ታና ሃርጌፌ ፓ።

11ታ ሞርኬይ

ታና ጾኖንታይሳን

ኔ ታና ዶሲዛይሳ

ታ ኤራይስ።

12ኔኒ ታና

ታ ሱሬቴ ጊሻስ ማዳሳ፤

ኔ ሲንን ታና

ሜርናስ ዎሳ።

13ጎዳ ኢስራኤሌ ጾሳይ

ሜርናፔ ሜርና

ጋካናዉ ጋላቴቶ።2

ኣሚን! ኣሚን!