ዬ ማጻፋ 35

ዳዊቴ ዬ

1ኣቤት ጎዳዉ!

ታናራ ኤቄቲዛይታራ

ኔኒ ኤቄታ፤

ታናራ ኦሌቲዛይታራ ኔኒ ኦሌታ።

2ጎንዳሌኔ ጹሩሬ1 ኦይካዳ፥

ታና ማዳናስ ዴንዳ።

3ታና ዬዴዛይታ ቦላን

ኔ ቶራኔ ማሻ ዴን።

ታና፥ «ታ ኔና ኣሺዛዴ» ጋ።

4ታ ሼምፖዮ ዎናዉ ኮይዛይቲ

ዬላቴቶኔ ካዉዬቶ፤

ታ ቦላ ኢታ ኦና

ማቄቲዛይቲ

ካዉዪዲ ጉዬ ሲሜቶ።

5ጎዳ ኪታንቻይ

ኢስታ ዬዴ፤

ኢስቲካ ጫርኮ ሲንን ዲዛ

ሱላ ማላ ጊዴቶ።

6ጎዳ ኪታንቻይ ኢስታ ጎዶ፤

ኢስታ ኦጌይካ ማኔ

ሃሊ ጊዶ።

7ጮ ታና ኦይካናዉ

ባንታ ናርጻ ዎዳ፤

ቃሴካ ጮ ታና ኩንዲሳናስ

ኦላ ቦኪዳ።

8ኢስቲ ቆፖንታ ዲሺን

ባሺ ኢስታ ቦላ ፑቱ ጎ፤

ኢስቲ ዎዳ ዎጺማዴይ

ኢስታ ኦይኮ፤

ኢስቲ ኦላን ኩንዲ ዬቶ።

9ሄ ዎዴ ታኒ ጎዳን ኡፋዬታና፤

ኢዚ ኣሺዳ ጊሻስ

ታኒ ኡፋዬታና።

10ታ ኩሜ ኣሳቴይ ኔና፥

«ኣቤት ጎዳዉ!

ቆሄቲዳይታ ቆሂዛይታ

ኩሼፔ ኣሺዛይ፥

ሂዬሳታኔ ሜቶታንቻታ

ቦንቂዛይታ ኩሼፔ ናጊዛይ

ሃራ ኔ ማላይ ኦኔ?» ጋና።

11ኢታ ኣሳቲ ታ ኦንታ ሚሻን

ታና ሞቲዳ፤

ታ ኤሮንታ ሚሻን ታ ቦላ

ዎርዶ ማርካ ማርካሲዳ።

12ታና ቢዛሲዳ፤

ታ ሎኦ ኦይሳ ኩሼ

ኢታ ዛሪዳ።

13ጊዶ ኣቲን ታኒ

ኢስቲ ሃርጊዳ ዎዴ

ማቃ ማይኣዲስ፤

ታ ኣሳቴ ጾማን

ዳቡርሳዲስ፤

ታ ዎሳስ ዛሮይ ይዴስ።

14ታ ኢሻስ ዎይኮ ታ ዳቦስ

ታ ሙዞቲዛ ማላ ሙዞታዲስ፤

ኣያ ሃይቂን ካዮቲዛ ኣሳ ማላ

ኬሃ ዬካዲስ።

15ጊዶ ኣቲን ታኒ ጴቲን

ኢስቲ ኡፋይሳን ኢሲ ቦላ ሺቂዳ፤

ሄ ጌኔ ኣሳቲ ታ ኤሮንታ ጋሶን

ታና ዋዲ ኣጎንታ ኢጺዳ።

16ኢስቲ ኢታ ኣሳቲ ቂዛ ማላ

ታና ቂዳ፤

ዪሎስ ባ ኣች ጋርጪዳ።

17ኣቤት ጎዳዉ!

ኔኒ ኣዉዴ ጋካናስ

ታና ጮኡ ጋዳ ጼላኔ?

ኢስታ ኢታ ኦሳፔ ታና ኣሻ፤

ሃ ጋሞ ማላ ኣሳታፔ

ታ ኣልኦ ሼምፖዮ ዎ ኤካ።

18ሄ ዎዴ ጊታ ሺቆን

ታ ኔና ጋላታና፤

ጮራ ኣሳ ሺቆን ታ ኔና ሳባና።

19ዎርዶራ ታና ሞርኪዛይቲ

ኡፋዬቶፌቶ፤

ታና ጮ ኢጺዛይቲ

ታ ቦላ ቂምኦቶፔቶ።2

20ኢስታ ዶናፔ

ሳሮ ሃሳያይ ኬዜና፤

ቢታን ጮኡ ጊዲ ዲዛ ኣሳታ ቦላ

ዮኦ ቃጼቴስ።

21ኢስቲ ባ ዶና ታ ቦላ ዶይዲ፥

«ሄኮ ቤኣ!

ኔ ኦይሳ ኑኒ

ኑ ኣይፌን ቤኢዶስ» ጌቴስ።

22ኣቤት ጎዳዉ!

ኔኒ ሃይሳ ቤያሳ፤

ሄሳ ጊሻስ ኔኒ ጮኡ ጎፓ፤

ታፔካ ሃኮፋ።

23ኣቤት ጎዳዉ፥ ታ ጾሳዉ!

ታ ጊሻስ ኦሌታ፤

ዴንዳ፤ ቤጋ፤

ታ ዶና ጊዳዳ ሞቴታ።

24ኣቤት ጎዳዉ ታ ጾሳዉ!

ኔ ጺሎቴ ማላ ታስ ፒርዳ፤

ታ ሞርኬታካ ኡፋይሶፋ።

25ኢስቲ ባንታስ፥ «ሃሹ፥ ሃሹ፥

ኑኒ ኑ ዎዚናን

ኣሞቲዳይሲ ፖሌቲዴስ፤

ኑኒ ኢዛ ሚቲዶስ»

ጋና ማላ ኦፋ።

26ታ ዋዬን ኡፋዬቲዛይቲ

ኡባይ ዬላቴቶኔ ካዉዬቶ፤

ታ ቦላን ኦቶሬቲዛይቲ

ዬላኔ ካዉሻቴ

ማይኤቶ።

27ታኒ ሻቱሚዛይሳ ዶሲዛይቲ

ኡፋዬቲዲ «ሃሹ!» ጌቶ፤

ኢስቲ ኡባ ዎዴ፥

«ባ ኣይሌዛ

ሳሮቴን ኡፋዬቲዛ

ጎዳይ ቁ ቁ

ጎ» ጌቶ።

28ጋላስ ኩሜ ታ ኢንጻርሳይ

ኔ ጺሎቴኔ ኔ ጋላታ ዮታና።