ዬ ማጻፋ 33

1ኢንቴኖ ጺሎቶ! ጎዳን ኡፋዬቲቴ፤

ሱሬ ኣሳቲ ኡፋይሳን ኢሊሊቴ።

2ማሲንቆ ሾጪሼ ጎዳ ጋላቲቴ፤

ታሙ ሻያን ዋጼቲዳ

ዲን ኢዛስ ዬጺቴ።

3ኦራ ማዛሙሬ ኢዛስ ዬጺቴ፤

ዲ ጊግሲ ሾጪቴ፤

ኡፋይሳን ኢሊሊ ጊቴ።

4ጎዳ ቃላይ ቱማ፤

ኢዚ ኦዛ ኦሶ

ኡባይ ኣማኔቲዛይሳ።

5ጎዳይ ጺሎቴኔ

ቱማ ፒርዳ ዶሴስ፤

ኢዛ ኪያቴ ሳኣ ኩሚዴስ።

6ሳሎቲ ጎዳ ቃላን ሜቲዳ።

ኢዛ ዶናፔ ኬዚዛ ፔኖን

ሳሎን ዲዛ ሜቴቲ

ሜቲዳ።

7ጊታ ኣባ ሃ

ኢዚ ኢሲሶን ሺሺዴስ፤

ጪማ ሃ

ሚንጃሶን ኤሊሲዴስ።

8ሳኣን ዲዛ ኣሲ ኡባይ

ጎዳስ ያዮ፤

ሳሎ ጉፋንይ

ጎዳ ቦንቾ።

9ኣይስ ጊኮ ኢዚ ሃሳዪን ሃንዴስ፤

ኢዚ ኣዛዚን ሚኒዲ ኤቂዴስ።

10ጎዳይ ካዎቴታ

ሃልቾ ላላና፤

ኢስታ ቆፋካ ሃዳ ኦና።

11ጎዳ ሃልቾይ

ሜርናስ ኤቂ ዳና፤

ኢዛ ዎዚና ቆፋይካ ዬሌታፔ

ዬሌታ ጋካናዉ ዳና።

12ጾሲ ኢዛስ ጎዳ ጊዲዳ

ካዎቴይ፥

ኢዚ ባስ ዶሪዳ ዴሬይ

ኣንጄቲዳ ዴሬ።

13ጎዳይ ሳሎን ኡቲዲ ዱጌ ጼሌስ፤

ኣሳ ኡባካ ቤኤስ።

14ጎዳይ ባ ኣራታን ኡቲዲ

ሳኣን ዴኢዛ ኡባ ጼሌስ።

15ኢዚ ኡባ ዎዚና ሜዴስ፤

ኢስቲ ኦዛ ሚሽ ኡባ ኤሬስ።

16ካዎይ ባ ዎታዳራ

ጮራቴን ኣቴና፤

ኦላንቻይ ባ ዎልቃ

ሚኖቴን ኬሲ ኤኬና።

17ታኒ ፓራን ጾናና ጊ

ናጎይ ሃዳ፤

ኢዚ ባ ዎልቃ ሚኖቴን

ኦናካ ኣሻናዉ

ዳንዳዬና።

18ጎዳ ኣይፌቲ ኢዛስ ያዪዛይታኔ

ኢዛ ሜርና ሲቆ

ሂዶታ ኦዛ ኣሳታ ጼሌስ።

19ኢዚ ሄሳን ኢስታ ሃይቆፔ ኣሼስ፤

ኮሻ ዎዴካ ኢስታ

ሼምፖራ ፓጻ ዎስ።

20ኑ ሼምፖያ ጎዳ

ሂዶታ ኦዉስ፤

ኢዚ ኑስ ማዶኔ ጎንዳሌ።

21ኑኒ ጌሽ ጊዲዳ

ኢዛ ሱንን ኣማኔቶስ፤

ኑ ዎዚናይካ ኢዛን ኡፋዬቴስ።

22ኣቤት ጎዳዉ!

ኑኒ ኔናን

ሂዶታ ኦዛይሳ ማላ

ሜርና ኔ ሲቆይ ኑናራ ጊዶ።