ዬ ማጻፋ 28

ዳዊቴ ማዛሙሬ

1ኣቤት ጎዳዉ! ታ ዛላዉ!

ታኒ ኔና ጼይጊሺን

ታስ ሲሲ ኢጾፋ፤

ታ ዋሲሺን ኔ ጮኡ ጊኮ

ታኒ ዱፎን ጌሊዛ

ኣሳታ ማላ ጊዳና።

2ታ ኩሼዛ ኔ ጌሻ

ኣቆሶ ሚጫዳ ዎሲሺኔ

ታና ማዳርኪ ጋዳ

ታ ዋሲሺን ኔ ሲያ።

3ባ ዎዚናን ኢታ ቆፒሼ

ባ ላጌታራ ሳሮቴ ሃሳይዛ

ኢታ ኦዛይታራ

ታና ኢስታራ ጋ ኤፎፓ።

4ኔ ኢስታስ ኢስታ ኢታቴ ማላኔ

ኢስታ ኦሶ ማላ ኢማ፤

ኢስታስ ኢስታ ኩሼ

ኦሶ ማላ ዛራ፤

ኢስቲ ኦዳ ኢታ ኦሶዛስ

ሃሎ ኬሳ።1

5ኢስቲ ጎዳ ኦሶስ ዉዱ ጎንታ

ኢጺዳ ጊሻስ፥

ኢዛ ኩሼ ኦሶታስ ሶሆ

ኢሞንታ ኣጊዳ ጊሻስ፥

ኢዚ ኢስታ ላላና፤

ዛሪዲካ ኬጼና።

6ታ ዎሳ ሲዪዳ ጊሻስ፥

ጎዳይ ጋላቴቶ።

7ጎዳይ ታስ ዎልቃኔ ጎንዳሌ፤

ታ ዎዚናይ ኢዛን ኣማኔቴስ፤

ሄሳን ታኒ ማዴታዲስ፤

ሄሳ ጊሻስ

ታ ዎዚናይ ኢዛን ኡፋዬቴስ፤

ታኒ ኢዛ ዬን ሳባና።

8ጎዳይ ባ ዴራስ ዎልቃ፤

ኢዚ ባ ቲይዳ ካዎዛ

ኣሺዛ ሚጻ።

9ጎዳዉ! ኔ ዴራ ኣሻ፤

ኔስ ጊዲዛይታ ኣንጃ፤

ኢስታ ሄንንቻይ

ኔና ጊዳ፤

ኔኒ ኢስታ ሜርናስካ ቶካ።