ዬ ማጻፋ 22

ዳዊቲ ዛማሬታ ካቦስ ዬጺዳ ማዛሙሬ

1ታ ጾሳዉ! ታ ጾሳዉ!

ታና ኣይስ ኣጋዲ?

ታና ማዳ ጋዳ

ታኒ ዋሲሺን

ኣይስ ሲዮንታ ኢጻዲ?

ታፔካ ኣይስ ሃካዲ?1

2ኣቤት ታ ጾሳዉ!

ጋላስ ኩሜ

ታ ኔኮ ዋሲሺን

ኔ ሲያቤካ፤

ቃማ ኡባንካ ኔኮ

ዋሶፔ ሼምፓቤኬ።

3ኔ ጊዲኮ ጌሻ ካዎ፤

ኢስራኤሌ ጋላታይ

ኔ ዩሾን ዴስ።

4ካሴ ኑ ኣዋቲ

ኔናን ኣማኔቲዳ፤

ኔናን ኣማኔቲን

ኔ ኢስታ ኣሻዳሳ።

5ኢስቲ ኔኮ ዋሲን ኣሻዳሳ፤

ኔናን ኣማኔቲን

ኢስታ ዬላሳቤካ።

6ታኒ ጉጹኔ ኣቲን

ኣስ ጊዲኬ፤

ታኒ ኣሳን ካቲዳዴኔ

ኢጼቲዳዴ።

7ታና ቤኢዳ ኡባቲ ቂቴስ፤

ዛሪዲካ ኢንጻርስ

ኬሲ ቂቴስ፤

ባ ቆካ

ታ ቦላ ቃቴስ።2

8ሂስቲዲ፥ «ኢዚ ጎዳን

ኣማኔቲዴስ፤

ኣኔ ጾሲ ኢዛ ኣሾ፤

ኢዚ ኡፋዬቲዳ ጊዲኮ

ኣኔ ኢዛ ማዶ» ጌቴስ።3

9ጊዶ ኣቲን ታ ዎጋራ

ዬሌታና ማላ ማዲዳይ ኔና፤

ታኒ ታ ኣዪ ን

ሚሺንካ

ኔ ታስ ኣማኔታሳ።

10ታኒ ዬሌቶሶፌ ዶማዳ

ኔናን ዲጫዲስ፤

ታ ኣዬይ ኡሎፔ ዶማዳካ

ኔኒ ታ ጾሳ።

11ሜቶይ ታኮ

ማቲ ማቲ ዪዛ ጊሻስ፥

ታና ማዲዛይካ

ባይንዳ ጊሻስ

ኔኒ ታፔ ሃኮፋ።

12ዳሮ ሞርኬቲ ኮርማ ቦራታ ማላ

ታና ጊዶዳ፤

ቃይጪዛ ባሳኔ ቢታ

ቦራታ ማላ

ታና ዶዲዳ።

13ሜንሬ ዬጊዲ

ጻጊዛ ጋሞ ማላ

ባ ዶና ታ ቦላ ዶይዳ።

14ታኒ ሃ ማላ ጎጋዲስ፤

ታ ሜቄቲ

ሶሜፔ ሶሜፔ ኮሌቲዳ።

ታ ዎዚናይ ሙቃዳ ማላ

ታ ጊዶን ሴሪዴስ።

15ታስ ቆይ ኮንኣ ማላ ሜሊዴስ፤

ታ ኢንጻርሳይ

ጎንጊራራ ኦይኬቲዴስ፤

ኔኒ ታና ሃይቂዳ ኣሳ ማላ

ጉዱላን ዬጋዳሳ።4

16ካናቲ ታና ጊዶዳ፤

ኢታ ኣሳቲ ታና ዶዲ ኦይኪዳ፤

ታ ኩሼታኔ

ታ ቶሆታ ሺሺ ሺኪዳ።

17ታኒ ሜቄታ

ቆዳና ዳንዳያይስ፤

ታ ሞርኬቲካ

ታና ጲርጺ ሂስቲ ጼሌቴስ።

18ታ ማይኦዛ ጊሼቲ ኤኪዳ፤

ታ ኣዱሳ ማይኦዛን

ሳማ ዬጊዳ።5

19ኣቤት ጎዳዉ!

ኔኒ ሃኢ ታፔ ሃኮፋ።

ኣቤት ታ ዎልቃዉ!

ታና ማዳናስ ኤሶታ።

20ታና ማሻፌ ኣሻ፤

ታ ሼምፖዮ

ዎልቃማ ካናታፔ ኣሻ።

21ታና ጋሞታ ዶናፔ ኣሻ፤

ቃይጪዛ ሜን ካጬዛፔ

ታና ናጋ።

22ታኒ ኔ ሱን

ታ ኢሻታስ ዮታና፤

ኢስቲ ሺቂዳሶንካ

ታ ኔና ጋላታና።6

23ኢንቴኖ ጎዳስ ያዪዛይቶ፥

ኢዛ ጋላቲቴ!

ኢንቴኖ ያቆቤ ዜሬቶ!

ኡባይካ ኢዛ ቦንቺቴ!

ኢንቴኖ ኢስራኤሌ ዜሬቶ!

ኡባቲካ ቦንቾን

ኢዛስ ያዪቴ!

24ኢዚ ናቄቲዳይሳ ካቤና፤

ሜቶቲሺን ዬጊ ኣቤና፤

ባ ሲን ኢዛፔ

ጌንቤና፤

ኢዚ ማዳርኪ ጊ ዋሲን

ኢዛ ዋሶ ሲዪዴስ።

25ኔኒ ኦዳ ሎኦ ኦሶ ጊሻስ፥

ዴሬይ ሺቂዳሶን ጋላታና፤

ታ ኣዲኒዳይሳ ኔና ያዪዛ

ኣሳ ሲንን ጋና።

26ሂዬሳቲ ሚዲ ካላና።

ጎዳ ኮይዛይቲ ኢዛ ጋላታና።

ኢስቲ ሜርናስ ኡፋዬታና።

27ሳኣ ጋጻ ጋካናስ ዲዛ ኣሳይ

ኢዛ ጊሻስ ዩሺ ቆፓና፤

ጎዳኮ ሲማና።

ኣሳ ዜሬ ኡባይ ኢዛስ ጎይናና።

28ኣይስ ጊኮ ማታይ ኢዛሳ፤

ካዎቴይ ኡባይ ኢዛስ ሃሬታና።

29ሳኣ ቦላ ዲዛ ዱሬቲ

ኢዛስ ጎይናና።

ባና ሃይቆፔ ኣሻናዉ

ዳንዳዮንታ ቢታን

ባና ኣሲ ኡባይ

ኢዛ ሲንን ጉልባታና።

30ቡሮ ያና ዬሌታይ ኢዛስ ኦና፤

ሄ ዬሌታይ ካሊ ዪዛ ዬሌታስ

ጎዳ ኦሶ ዮታና።

31ኢስቲ ኢዛ ጺሎቴ ጊሻስ

ቡሮ ያና ዬሌታስ ዮታና።