ዬ ማጻፋ 20

ዳዊቲ ዛማሬታ ካቦስ ዬጺዳ ማዛሙሬ

1ኔኒ ሜቶቲዳ ዎዴ

ጎዳይ ኔ ዎሳ ሲዮ፤

ያቆቤ ጾሳ ሱን

ኔና ሚን ኤሶ።

2ባ ኬፌ ኔስ ማዶ ኪቶ፤

ጺዮኔፔ ማዶይ ዮ።

3ኔ ያርሾ ኡባ ኢዚ ኣኬኮ፤

ኔ ጹጊዛ ያርሾን ኢዚ ኡፋዬቶ።

4ኔ ዎዚና ኣሞ ኔስ ኢሞ፤

ኔ ሃልቾ ኡባ ፖሎ።

5ኔ ጾኒዳ ጊሻስ

ኑኒ ኡፋይሳን ሆምቦጫና፤

ኑ ጾሳ ሱንን

ኑ ባንዲራ ቁ ኦና፤

ኔ ዎሳ ኡባ

ጎዳይ ኔስ ኢሞ።

6ጎዳይ ባ ዶሪዳ ካዎዛስ

ጾኖ ኢሚዛይሳ ታኒ ሃኢ ኤራዲስ፤

ባ ኡሻቻ ኩሼዛን

ኢዚ ጊታ ጾኖን ኩንና፤

ባ ጌሻ ሳሎፔካ

ኢዛስ ዛሮ ኢማና።

7ኢሶቲ ኢሶቲ ባንታ ኦላ

ፓራ-ጋሬን ኣማኔቴቴስ፤

ሃራቲ ባንታ ፓራን ጬቄቴቴስ፤

ኑኒ ጊዲኮ

ኑ ጎዳ ዎልቃን ጬቄቶስ።

8ኢስቲ ጴቲዲ ኩንዳና፤

ኑኒ ጊዲኮ ዴንዲዲ

ሚኒ ኤቃና።

9ኣቤት ጎዳዉ!

ካዎዛስ ጾኖ ኢማ፤

ኑኒካ ኔና ጼይጊዛ ዎዴ ሲያ።