ዬ ማጻፋ 141

ዳዊቴ ማዛሙሬ

1ኣቤት ጎዳዉ!

ታኒ ኔና ጼይጋይስ፤

ታና ማዳናስ ኤሌላ።

ታኒ ኔኮ ዋሲዛ ዎዴ

ታ ዋሶ ሲያ!

2ታ ዎሳይ ኤጻኔ ጩዋ ማላ

ኔ ሲን ሺቆ፤

ታኒ ታ ኩሼዛ ሚጪዛይሲ

ኔስ ኦማርሳ ዎዴ

ያርሾ ማላ ጊዶ።1

3ኣቤት ጎዳዉ!

ታ ዶና ናጋናስ

ዛቤ ዎ፤

ታ ሜቴርሻታ ፔንጌን

ናጊዛይሳ ኤሳ።

4ሞሮ ኦዛ ኣሳታራ

ኢታ ኦሶ ኦንታ ማላ

ታ ዎዚና ኢታኮ ዛሮፓ፤

ኢስታ ጊቢራካ ታና ሚዞፓ።

5ጺሎ ኣሲ ታና ቃጻዮ፤

ሄሲካ ታስ ሎኦ፤

ኢዚ ታና ሴሪኮ

ሄሲ ታ ሁኤን

ዛይቴ ቲዪዛ ማላ፤

ሄሳካ ታ ኢጺኬ፤

ጊዶ ኣቲን ታኒ ኡባቶካ

ኢታ ኣሳታ ኦሶ ቦላ ዎሳይስ።

6ኢስታ ዳናቲ

ኣፎራ ዱጌ ኦሌቲዛ ዎዴ

ታ ቃላይ ቱማ ጊዲዳይሳ

ኢስቲ ኤራና።

7ጋዴይ ጎዬቲዛ ማላኔ

ጳሼይ ሊቂዛ ማላ

ኢስታ ሜቄካ

ዱፎ ዶናን ላሌታና።

8ኣቤት ጎዳዉ፥

ኡባፌ ዎልቃማ ጾሳዉ!

ታ ኣይፌይ ኔና ጼሌስ፤

ታ ዜምፖይ ኔና፤

ታና ሃይቆስ ኣዳ ኢሞፋ።

9ኢስቲ ታስ ዎዳ

ዎጺማዴፔኔ

ኢታ ኦዛይታ ጊቴፔ

ታና ናጋ።

10ታ ሳሮ ኣሺን

ኢስቲ ባንቲ ዎዳ

ጊቴዛን ኦይኬቴቶ።