ጌሻ ማጻፋ
ዬ ማጻፋ 135
ኢንቴኖ ጎዳ ኣይሌቶ!
ኢዛ ጋላቲቴ!
ጎዳ ሱን ሳቢቴ!
ኢንቴኖ ጎዳ ኬን
ኦዛይቶ!
ኢንቴኖ ኑ ጾሳ ኬ ዛጎን
ኤቂዳይቶ ጋላቲቴ!
ኢዚ ኪያ ጊዲዳ ጊሻስ
ጎዳ ጋላቲቴ!
ኢዚ ሎኦ ጊዲዳ ጊሻስ
ኢዛ ሱንስ ዬጺቴ!
ጎዳይ ያቆቤ
ባስ ቡዞ ኦዴስ፤
ኢስራኤሌካ ባስ
ኣልኦ ሚሽ ሂስቲ ዶሪዴስ።
ጎዳይ ጊታ ጊዲዳይሳኔ
ኑ ጎዳይ ጾሳታ ኡባፌ
ቂዛይሳ ታኒ ኤራይስ።
ሳሎኒኔ ሳኣን፥
ኣባታኒኔ ጪማታ
ኡባ ጊዶንካ
ጎዳይ ባ ዶሲዳይሳ
ኡባ ኦስ።
ካሬ ሻራ ሳኣ ጋጻፔ
ኢዚ ዴንስ፤
ኢዚ ኢራራ ዎልቃን ኪቴስ፤
ባ ሚንጂ ዎዳሶፔ
ጫርኮ ኬሲ ዬዴስ።
ጊብጼ ቢታን ኣሳፔ ቢዲ
ሜሄ ጋካናስ
ባይራ ዬሌቲዳ ኡባ ዎዴስ።
ኔኖ ጊብጼ! ፓሮኔ ቦላኔ
ኢዛ ኦሳንቻታ ቦላ
ኦራኔ ማላሊሲዛ
ሚሽ ዬዲዴስ።
ኢዚ ዳሮ ካዎቴታ ይሲዴስ፤
ዎልቃማ ካዎታካ ዎዴስ።
ኣሞሬታ ካዎ ሲሆኔ፥
ባሳኔ ካዎ ኣጌኔ
ካናኔ ካዎታ ኡባ ዎዴስ።
ኢስታ ቢታካ ባ ዴራ
ኢስራኤሌ ላቲሲዴስ።
ኣቤት ጎዳዉ!
ኔ ሱን ሜርናስ ዳና፤
ዬሌታፔ ዬሌታ ጋካናስ
ኔኒ ሃሳኤታና።
ጎዳይ ባ ኣሳስ ፒርዳና፤
ኢዚ ባ ኣይሌታስካ ቃታና።
ካዎቴቲ ጎይኒዛ
ኤቃ ጾሳቲ
ቢራፔኔ ዎርቃፌ
ኣሳ ኩሼን ኦሴቲዳይታ።
ኢስታስ ዶናይ ዴስ ሺን
ሃሳዬቴና፤
ኣይፌይ ዴስ ሺን ጼሌቴና።
ሃይ ዴስ ሺን ሲዬቴና፤
ኢስታ ሲን ፔኖይካ ዴና።
ኢስታ ሜዳይቲኔ
ኢስታን ኣማኔቲዛይቲ ኡባይ
ኢስታ ማላ ጊዴቶ።
ኢስራኤሌ ዴሬዞ!
ጎዳ ጋላቲቴ፤
ኣሮኔ ኬ ኣሳቶ!
ጎዳ ሳቢቴ፤
ሌዌ ኬ ኣሳቶ!
ጎዳ ጋላቲቴ፤
ጎዳስ ያዪዛይቶ!
ኡባይ ጎዳ ጋላቲቴ።
ዬሩሳላሜን ዴኢዛ ጎዳይ
ጺዮኔን ጋላቴቶ!
ጎዳይ ጋላቴቶ!
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.