ዬ ማጻፋ 109

ዳዊቲ ዛማሬታ ካቦስ ዬጺዳ ማዛሙሬ

1ኣቤት ታኒ ጋላቲዛ ጾሳዉ!

ኔኒ ታስ ጮኡ ጎፓ።

2ኢታቲኔ ዎርዳንቻቲ ባ ዶና

ታ ቦላ ዶይዳ፤

ታ ቦላካ ዎርዶ ሃሳይዳ።

3ኢስቲ ኢጾ ቃላራ ታና ጊዶዳ፤

ጋሶይካ ባይንዳ

ታና ኬሂ ቆሂዳ።

4ታኒ ኢስታ ሲቂሺን

ኢስቲ ታና ሞቲዳ፤

ጊዶ ኣቲን ታ ዎሳይስ።

5ታኒ ሎኦ ኦን

ታስ ኢታ ዛሪዳ፤

ታ ኢስታ ሲቂን ታና ኢጺዳ።

6ኢዛ ቦላ ኢታ ዳና ሹማ፤

ኢዛ ሞቲዛይካ

ኢዛ ኡሻቻን ኤቆ።

7ፒርዳሶን ኢዚ ሞራንቻ

ጊዲ ቤቶ፤

ኢዛ ዎሳይካ

ኢዛስ ሲሚዲ ጎሜቶ!

8ኢዛ ላይ ቃሞ፤

ኢዛ ሹሜቴካ ሃራይ ኤኮ!1

9ኢዛ ናይቲ ኣዋ ይዲ ዪኦቴቶ፤

ኢዛ ማቼያካ ኣምኦ ጊዱ!

10ኢዛ ናይቲ ዩዪ ዩዪዲ ዎሴቶ፤

ሃኢ ባ ዲዛ ላሌቲዳ

ኬፌካ ጎዴቴቶ!

11ኢዛ ኣቆታ ኡባ ኣጮ ኣዋይ ላቶ፤

ኢዚ ዳቡርዲ ኬሲዳ ኡባ

ኣላጋይ ቦንቆ!

12ኦኒካ ኢዛ ማሮፖ፤

ዎይኮ ዪኦ ጊዲዳ ናይታስ

ቃቲዛይ ዶፖ!

13ኢዛ ናይቲ ኡባይ ዬቶ፤

ካሊዛ ዬሌታን

ኢዛ ሱን ዶጌቶ።

14ኢዛ ኣዋታ ናጋራይ

ጎዳ ሲንን ቆፌቶ፤

ኢዛ ኣዬይ ናጋራይ

ሙሌካ ቁጬቶፎ!

15ኢስታ ናጋራይ

ጎዳ ሲንን ኡባቶ ቤቶ፤

ኢስታ ኣኬኪሲዛ ሚሺ

ቢታ ቦላ ዶፖ።

16ጋሶይካ ኢዚ ማንቂዳዴ፥

ሜቶቲዛዴኔ

ዎዚናይ ማዱንጺዳዴ

ሃይቃና ጋካናስ

ጎዲዴስ ኣቲን

ኢዛ ማራናስ ቆፒቤና።

17ኢዚ ቃንጋናስ ዶሲዛ ጊሻስ

ኢዚ ቃንጌቶ!

ኢዚ ኣንጃናስ ዶሶንታ ጊሻስ

ኢዛፔ ሃኪዴስ!

18ቃንጌ ማይኦ ማላ ማይኢዴስ፤

ሃ ማላ ኢዛስ ቦላን ጌሊዴስ፤

ዛይቴ ማላካ

ሜቄ ጊዶ ጌሊዴስ።

19ኣፋላ ማላ ኢዛ ካሞ፤

ሳቄ ማላ ኡባ ዎዴ

ኢዛ ጼሳን ዴኦ!

20ሃይሲ ታና ሞቲዛይታሲኔ

ታ ቦላ ኢታ ሃሳይዛይታስ

ጎዳይ ኢሚዛ ዎይቶ ጊዶ!

21ጊዶ ኣቲን ኣቤት

ኡባፌ ቃ ጎዳዉ!

ኔ ሱን ጊሻስ

ታና ሎኦ ኣይፌን ጼላ፤

ኔ ሲቆይ ሎኦ ጊዲዳ ጊሻስ

ታና ኣሻ።

22ታኒ ሂዬሳኔ ሜቶታንቻ ኣሳ፤

ታ ዎዚናይ ማዱንጺዴስ።

23ታኒ ኦማርሳ ዎዴ ኩዋ ማላ

ያና ሃናይስ፤

ቦሌ ማላካ ቆቆፌታዲስ።

24ጾሚሺን ታ ጉልባቴይ ዳቡርዴስ፤

ታ ኣሾይ ጊልቂዲ

ሜቄ ኣቲዴስ።

25ታ ሞርኬታስ ታኒ

ቂልጪዛ ሚሽ ጊዳዲስ፤

ኢስቲ ታና ቤኢዲ

ባ ቆ ቃቴስ።2

26ኣቤት ጎዳዉ ታ ጾሳዉ!

ታና ማዳ፤

ኔ ሜርና ሲቆ ማላ

ታና ኣሻ።

27ኣቤት ጎዳዉ!

ሃይሳ ኔ ኩሼይ ኦዳይሳኔ

ኔኒ ፖሊዳይሳ

ታ ሞርኬቲ ኤሬቶ።

28ኢስቲ ታና ቃንጌቴስ፤

ኔኒ ጊዲኮ ታና ኣንጃሳ፤

ታ ቦላ ዴንዲዛይቲ ዬላታና፤

ጊዶ ኣቲን ታኒ

ኔ ኣይሌይ ኡፋዬታና።

29ታና ሞቲዛይቲ

ካዉሻቴ ማይኤቶ፤

ባንታ ዬላካ

ኩታ ማላ ቁማኤቶ።

30ታኒ ታ ኢንጻርሳን

ጎዳ ኬሃ ጋላታና፤

ዳሮ ዴሬይ ሺቂዳ ዱላታን

ኢዛ ሳባና።

31ጋሶይካ ኢስታ ቦላ ሃይቆ ፒርዳ

ፒርዲዛይታፔ ኣሻናስ

ማንቆታፔ ኡሻቻ ባጋራ

ኢዚ ኤቄስ።