ዬ ማጻፋ 107

ኢቻሻን ማጻፋ

(ማዛ 107—150)

1ኢዚ ኪያኔ

ኢዛ ሲቆይ ሜርናስ

ጊዲዳ ጊሻስ ጎዳ ጋላቲቴ።1

2ጎዳይ ኢስታ ዎዚዳይቲ፥

ኢስታ ሞርኬታ ኩሼፔ

ኢዚ ኣሺዳይቲ ሂዝጌቶ፤

3ኣርሼይ ሞኪዛሶፔኔ

ዉሊዛሶፔ፥

ፑዴሃፔኔ ዱጌሃፔ

ዴሬ ኡባፌ ኢዚ ሺሺዳይቲ

ሂዝጊ ሃሳዬቶ።

4ኢስታፌ ኢሶቲ ኢሶቲ

ባዞ ቢታን ቶይላቲዳ፤

ባ ዴኢዛ ካታማ ኤፊዛ ኦጌ

ዴማናስ ዳንዳይቤቴና።

5ኢስቲ ጋፊዳኔ ሳሜቲዳ፤

ኬሂፔ ዳቡርዳ።

6ኢስቲ ሜቶቲዳ ዎዴ

ጎዳኮ ዋሲዳ፤

ኢዚካ ኢስታ ዋዬዛፔ

ኣሺዴስ።

7ኢስቲ ዴኣና ካታማ ጋካናስ፥

ኢዚ ኢስታ ሲታ ኦጌራ ካሌዴስ።

8ሜርና ኢዛ ሲቆዛሲኔ

ኢዚ ኣሳስ ኦዳ ማላሊሲዛ

ሚሻታስ ኢስቲ ጎዳ

ጋላቴቶ!

9ኣይስ ጊኮ ኢዚ ሳሜቲዳይታ

ኡሺ ኣሊሴስ፤

ጋፊዳይታካ

ሎኦ ሚሻን ካልሴስ።

10ኢስታፌ ኢሶቲ ኢሶቲ ቢራታ

ሳንሳላታን ቃሼቲዲ

ዋዬቲዛይታ፤

ሳካና ማ ጊዶንካ

ኡቲዳይታ፤

11ጋሶይካ ኢስቲ

ጾሳ ቃላ ቦላ ማካሊዳኔ

ኡባፌ ቃ ጾሳ

ዞሬ ካዳ።

12ሄሳ ጊሻስ ዎልቃ ኦሶን

ኢስታ ኢጼዴስ፤

ኢስቲ ዳቡሪን

ኢስታ ማዲዛይ ይዴስ።

13ኢስቲ ሜቶቲዳ ዎዴ

ጎዳኮ ዋሲዳ፤

ኢዚካ ኢስታ ዋዬዛፔ

ኣሺዴስ።

14ሳካና ማፔ ኢስታ ኬሲዴስ፤

ኢስቲ ቃሼቲዳ ሳንሳላታካ

ዱሴሬዴስ።

15ሜርና ኢዛ ሲቆዛሲኔ

ኢዚ ኣሳስ ኦዳ

ማላሊሲዛ ሚሻታስ

ኢስቲ ጎዳ ጋላቴቶ።

16ኣይስ ጊኮ ኢዚ ጻርቂማላፔ ኦሴቲዳ

ፔንጌ ሜንዴስ፤

ቢራታ ኮላታታካ

ቃንጼሬዴስ።2

17ኢስታፌ ኢሶቲ ኢሶቲ

ባ ማካላቴ ጋሶን

ኤያ ጊዲዳ፤

ባ ናጋራ ጋሶንካ

ሜቶን ጌሊዳ።

18ኢስታ ቆይ ካ ኢጺን

ሃይቃና ማቲዳ።

19ኢስቲ ሜቶቲዳ ዎዴ

ጎዳኮ ዋሲዳ፤

ኢዚካ ኢስታ ዋዬዛፔ

ኣሺዴስ።

20ኢዚ ባ ቃላ ኪቲዲ

ኢስታ ፓዴስ፤

ዱፎ ዶናፔካ

ኢስታ ኣሺዴስ።

21ሜርና ኢዛ ሲቆዛሲኔ

ኢዚ ኣሳስ ኦዳ ማላሊሲዛ

ሚሻታስ

ኢስቲ ጎዳ ጋላቴቶ።

22ኢስቲ ኢዛስ

ጋላታ ያርሾ ያርሼቶ፤

ቃሴካ ኡፋይሳ ዬን

ኢዚ ኦዳ ኦሶ ቆንጪሴቶ።

23ኢስታፌ ኢሶቲ ኢሶቲ ማርካቤን

ጊታ ኣባ ጊዶራ ቢዳ፤

ሄ ጊታ ኣባ ቦላ

ባንታ ኦሶ ኦዳ።

24ኢስቲ ጎዳ ኦሶ ቤኢዳ፤

ኢዚ ጪማ ጋርሳን ኦዳ

ማላሊሲዛ ኦሶታ ጼሊዳ።

25ኢዚ ኣዛዚን

ጎቴ ጫርኮይ ዴንዲዴስ፤

ሂስቲን ኣባ ዳምባላይ

ቃጺዴስ።

26ኢስቲ ፑዴ ሳሎ ኬዚዳ፤

ሲሚዲካ ዱጌ ጪማን ጌሊዳ፤

ኢስታ ጋኪዳ ሜቶፔ

ዴንዶይሳን

ኢስታ ዎዚናይ ታሂዴስ።

27ኢስቲ ማቲዳ ኣሳ ማላ

ዪጮቲዲ ጋንዲጋርዳ፤

ኢስታስ ኣኬኪዛ ዎዚናይካ

ዳሚዴስ።

28ኢስቲ ሜቶቲዳ ዎዴ

ጎዳኮ ዋሲዳ፤

ኢዚካ ኢስታ ዋዬዛፔ

ኣሺዴስ።

29ኢዚ ጎቴ ጫርኮዛ

ጮኡ ሂስቲዴስ፤

ኣባ ዳምባላካ ሲርጲ ሂስቲዴስ።

30ጮኡ ጊዳ ጊሻስ

ኢስቲ ኡፋዬቲዳ፤

ኢስቲ ኣሞቲዛ ዎዴቤን

ጋዴስ።3

31ሜርና ኢዛ ሲቆዛሲኔ

ኢዚ ኣሳስ ኦዳ ማላሊሲዛ

ሚሻታስ

ኢስቲ ጎዳ ጋላቴቶ።

32ኢስቲ ኢዛ ዴሬ ዱላታን

ቁ ቁ ሂስቴቶ፤

ቃሴ ጪማታ ሺቆን

ኢዛ ጋላቴቶ።

33ሻፋታ ሙሌራ ሜሊሲዴስ፤

ፑልቶቲ ፑልቶንታ ማላ ቴቂዴስ።

34ሄን ዴኢዛ ኣሳ

ኢታቴ ጋሶን

ኣራዳ ቢታዮ ኣይኮ

ዶሊሶንታ ማጺኔ

ቢታ ኦዴስ።

35ኢዚ ባዞን ሃ ኤሊሲዴስ

ሜላ ቢታን ፑልቶይ

ቃና ማላ ኦዴስ።

36ጋፊዳይታ ሄን ዎዴስ፤

ኢስቲካ ባንታስ

ዴኣና ካታማ ኬጺዳ።

37ኢስቲ ባንታ ጎሻን ዜሪዳ፤

ዎይኔ ቶኪዳ፤

ዳሮ ካ ሺሺዳ።

38ኢዚ ኢስታ ኣንጂን

ኢስቲ ኬሂ ጮራቲዳ፤

ኢስታ ሜሄታካ ጉቤና።

39ሜቶን፥ ዋዬኒኔ

ጬጬን ጾኔቲን

ኢስታ ቆዳይ ጉጺዴስ።

40ጎዳይ ሃላቃታ ካዉሺዴስ፤

ኦጌይ ባይንዳ ባዞን

ቶይላታና ማላ

ኢስታ ኦስ።

41ጊዶ ኣቲን ኢዚ ሜቶታንቻታ

ኢስታ ዋዬፔ ኬሲዴስ፤

ዶርሳ ዉዴ ማላ ጮራ ናይታካ

ኢስታስ ኢሚዴስ።

42ሱሬ ኣሳቲ

ሄሳ ቤኢዲ ኡፋዬቴቴስ፤

ጊዶ ኣቲን ጌላታ

ዶናይ ጎርዴታና።

43ኤራ ኣሲ ሃ ዮኦዛ

ባ ዎዚናን ዎ፤

ኢዚካ ጎዳ ማሮቴ ኣኬኮ።