ዬ ማጻፋ 101

ዳዊቴ ማዛሙሬ

1ታኒ ኔ ሲቆ ጊሻሲኔ

ቱማ ፒርዳ ጊሻስ ዬጻና፤

ኣቤት ጎዳዉ!

ታኒ ኔስ ጋላታ ማዛሙሬ ዬጻና።

2ታኒ ሱሬ ኦጌ ካላና፤

ኔኒ ታኮ ኣዉዴ ያኔ?

ታኒ ታ ኬን

ሱሬቴን ዳና።

3ታኒ ታ ኣይፌራ

ኢታ ሚሽ ጼሊኬ፤

ጾሳፌ ካሬ ኬዚዳ ኣሳታ

ኦሶ ኢጻይስ፤

ታኒ ኢስታራ ሙሌካ ዙፔቲኬ።

4ዎዚና ጌላቲ ታፔ ሃኬቶ፤

ኢታቴራ ታስ

ጋይቶቴ ዴና።

5ጌማን ባ ላጌ ዚጊርዛይሳ

ታኒ ሲርጲ ኦና፤

ኦቶሬቲዛይሲኔ ጬቄቲዛ ኣስ

ታኒ ጮኡ ጋ ኣጊኬ።

6ኢስቲ ታናራ ዳና ማላ

ቢታ ቦላ ዴኢዛ

ኣማኔቲዛይታ

ታኒ ሎኦ ኣይፌን ጼላይስ።

ሱሬቴን ሄሜቲዛ ኣሲ

ታስ ሃጋዛና።

7ጪሞ ኦዛይ ኦኒካ

ታ ኬን ዴና፤

ዎርዶ ሃሳይዛይ

ታ ሲንን ኤቄና።

8ቢታን ዴኢዛ ኢታ ኣስ ኡባ

ታኒ ሃች ሃች ይሳና፤

ኢታ ኦዛይታ ኡባ

ታኒ ጎዳ ካታማፔ

ቃላ ይሳና።