ጌሻ ማጻፋ
ታይቦ ማጻፋ 24
ባላሜይካ ጎዳይ ኢስራኤሌ ኣሳ ኣንጃናስ ዶሲዳይሳ ኤሪዳ ዎዴ ካሴ ኢዚ ኦዛይሳ ማላ ሙሬኖ ኦሶ ኦናስ ኮዪቤና፤ ባ ሲንካ ዱጌ ባዞ ዛሪዴስ። ኢስራኤሌ ኣሳይ ባ ቆሞን ቆሞን ማራራ ዱንካኒ ኡቲዳይሳ ቤኢዴስ፤ ጾሳ ኣያናይ ኢዛ ቦላ ዎዴስ፤ ሂስቲን ኢዚ ቲንቢቴ ሃሳያ ዶሚዲ፥
«ቢኦሬ ና ባላሜይ
ሃሳይዛ ቲንቢቴ ቃላይ፥
ኢዛ ኣይፌቲካ ዶዬቲዳዴይ፥
ጾሳ ቃላ ሲዪዛዴይ
ኢዚ ኩንዲ ዲሺን
ኢዛ ኣይፌቲ ዶዬቲን
ኡባ ዳንዳይዛ ጾሳ ኣጁታ
ቤኢዛዴ ኪታይ ሃይሳ።
ያቆቤ ኔ ዱንካኔቲ
ኢስራኤሌ ኔ ዲዛሶቲ
ኣይ ማላ ሎኦ?
ኢስቲካ ሚጬቲዳ
ዙሌታ ማላ፤
ቃሴካ ሻፋ ዶናን ዲዛ
ኣታኪልቴሶሆታ ማላ፤
ጎዳይ ቶኪዳ
ጎዳሬ ኡ ማላ፤
ዎይኮ ሻፋ ዶናን ዲዛ
ሊባኖሴ ዚጋ ማላ።
ኢራይ ኡባ ዎዴ
ኢስታስ ቡኪዛ ጊሻስ
ኢስታ ሃ ኩሚ ፓላሄስ፤
ዜሬ ዎዴ ኢስታስ
ጊዲዛ ሃ ዴስ፤
ኢስታ ካዎይ ኣጋጌፔ
ኣ ጊዳና፤
ኢስታ ካዎቴ
ቁ ቁ ጋና።
ኢስታ ጊብጼፔ ኬሲዳ ጾሲ
ኢስታስ ሜን ማላ ኦሌታና፤
ኢስታ ሞርኬ ጊዲዳ
ካዎቴታ ኢዚ
ፑዜሬ ዬጋና፤
ኢዚ ኢስታ
ሜቄታ ሊቂሳና፤
ኢስታ ዎንዳፌታካ
ሜንሬ ዬጋና።
ሃይሲ ካዎቴይ
ጋሞ ማላ ዛማዲ ኡቲዴስ፤
ማጫ ጋሞ ማላካ
ዙጊ ኡቲዴስ፤
ኢስቲ ዛማዲ ኡቲዳሶሆፔ
ኢስታ ዴንና
ዳንዳይዛይ ኦኔ?
ኔና ኣንጂዛዴይ ኣንጄቶ፤
ኔና ቃንጊዛዴይካ
ቃንጌቶ» ጊዴስ።1
ባላቄይ ሃንቆን ባ ኩሼ ባቂዲ ባላሜስ፥ «ታኒ ኔና ታ ሞርኬታ ቃንጋናስ ጼይጋዲስ፤ ጊዶ ኣቲን ኔኒ ኢስታ ሄቶ ኣንጃዳሳ። ሃኢ ጊዲኮ ኤሶን ጌዴ ኔሶ ባ! ታ ኔስ ዳሮ ሚሽ ኢማና ጋ ቃላ ጌላዲስ፤ ጊዶ ኣቲን ኔ ሄ ሚሻ ዴሞንታ ማላ ጾሲ ጎርዲዴስ» ጊዴስ።
ባላሜይ ባላቄስ ዛሪዲ፥ «ኔኒ ታኮ ኪቲዳ ኣሳታስ፥ ‹ባላቄይ ባስ ዲዛ ቢራኔ ዎርቃ ኡባ ኢዚ ታስ ኢሚዛኮካ ታኒ ታ ሼኔን ኢታ ጊዲን ዎይኮ ሎኦ ኦናስ ጎዳ ቃላፔ ኣናስ ዳንዳይኬ፤ ታኒ ዮታናይ ጎዳይ ታስ ዮቶሮ ጻላ› ጋዳ ካሴ ታ ኢስታስ ዮታቤኪና?» ጊዴስ።
ባላሜይ ዮቲዳ ኦይዳን ቲንቢቴ
ዉርሴን ባላሜይ ባላቄስ፥ «ሃኢ ታኒ ጌዴ ታ ዴሬ ሲማ ባይስ፤ ጊዶ ኣቲን ታ ባናፔ ካሴታዳ ኢስራኤሌ ኣሳይ ኔ ዴሬ ኣሳ ቦላ ጋናይሳ ኔስ ቆንጪሳናስ ኮያይስ» ጊዴስ። ሄሳፌ ጉዬ ኢዛስ ቲንቢቴ ዮቶ ዶሚዲ፥
«ኢዛ ኣይፌይ ዶዬቲዳዴይ፥
ቢኦሬ ና ባላሜይ
ዮቲዛ ቲንቢቴ ቃላይ ሃይሳ፤
ጾሳ ቃላ ሲዪዛዴ፥
ኢዚ ኩንዲ ዲሺን
ኢዛ ኣይፌቲ ዶዬቲን
ዎልቃማ ጾሳፌ
ኤራቴ ዴሚዳዴ፥
ኡባ ዳንዳይዛ ጾሳ ኣጁታ
ቤኢዛዴ ኪታይ ሃይሳ።
ታኒ ኢዛ ቤኣይስ፤
ጊዶ ኣቲን ሃኢ ጊዴና፤
ታ ኢዛ ጼላይስ፤
ጊዲኮካ ሃኢ ማታን ጊዴና፤
ጾሊንቴይ ያቆቤፔ
ቤታና፤
ካዎቴ ጉፌይ
ኢስራኤሌፔ ኬዛና፤
ሞኣቤ ዜሬኔ
ሴቴ ዜሬታ ኡባ
ዲፒ ሂስቲ ይሳና።
ኤዶሜይ ጾኔታና፤
ኢዛ ሞርኬ ሴይሬይካ
ኢዛስ ሃሬታና፤
ኢስራኤሌ ዴሬይ
ጾኖይ ጾኖሺን ዳና።
ያቆቤፔ ዴሬ ኣይሲዛዴይ ኬዛና፤
ኢዚ ካታማ ጊዶን
ኣቲዳይታ ፒቲ ይሳና» ጊዴስ።
ዉርሴን ባላሜይ ሃሳይዳ ሃሳያ
ሄሳፌ ጉዬ ባላሜይ ጌዴ ኣማሌቄ ዛሪ ጼሊዲ፥
«ኣማሌቄይ ኡባፌ ኣዛ
ዎልቃማ ካዎቴ፤
ጊዶ ኣቲን ኢዚ ዉርሴን
ሜርናስ ያና» ጊ
ቲንቢቴ ዮቲዴስ።
ጌዴ ቄናዌ ዴሬ ኣሳኮ ሲሚ ጼሊዲ፥
«ኔ ዱሳሶይ
ኣማኔቲዳሶ ሚሳቲኮካ፥
ኔ ኬይ ዛላፌ ዎጬቲ
ኬጼቲዳ ጊዲኮካ፥
ኢንቴኖ ቄናዌ ዴሬቶ!
ኣሶሬይ ኢንቴና ጾኒዲ
ዲኢ ኤፊዛ ዎዴ
ኢንቴ ዉሪ ዉራና» ጊ
ቲንቢቴ ዮቲዴስ።
ዉርሴን ባላሜይ፥
«ጾሲ ሃይሳ ኦሺን
ኦኔ ሼምፖራ ፓጻ ዳናይ?
ኦላስ ዎራጂዛ ኣሳይ
ማርካቤራ ቆጲሮሴፔ ያና፤
ኢስቲካ ኣሶሬኔ
ኤቦሬ ይሳና፤
ኢስቲካ ባ ሁኤስ
ሜርናስ ያና» ጊ
ቲንቢቴ ዮቲዴስ።
ሄሳፌ ጉዬ ባላሜይ ዴንዲዲ ጌዴ ባ ዴሬ ቢዴስ፤ ባላቄይካ ባሶ ሲሚዴስ።
Source notes (1)
- Cross-reference ሜ 12፡3፤ 49፡9
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.