ኢምባቆ ቲንቢቴ 3

ኢምባቆ ዎሳ

1ናቤ ኢምባቆይ ዬን ሺሺዳ ዎሳ።

2ኣቤት ጎዳዉ!

ታ ኔ ጎባቴ

ጊሻስ ሲያዲስ።

ጎዳዉ ኔ ኦሶይካ

ታና ያሺሲዴስ፤

ኔኒ ኔ ኦሶ

ኑ ዎዴን ኦራ፤

ኔ ኦሶቲ ኑ ዎዴንካ

ኤሬታና ማላ ኦርኪ!

ሃንቆ ዎዴካ

ማሮቴ ቆፓርኪ!

3ጾሲ ቴማኔፔ ጌሻይካ

ፓራኔ ዙማ ቦላፌ ዪዴስ፤

ኢዛ ቦንቾይ

ሳሎ ካሚ ኦይኪዴስ፤

ኢዛ ጋላታይካ

ቢታ ቦላ ኩሚዴስ።

4ኢዛ ፖኦይ ኣዋ ኣርሼ ፖኦ ማላ፤

ኣዋ ጻልቄይ

ኢዛ ኩሼፔ ኬዚዴስ፤

ኢዛ ዎልቃይካ ሄን ቆቴቲዴስ።

5ኢታ ሃርጌይ

ኢዛፔ ሲንራ ቢዴስ፤

ሃዳ ሃይቆይካ

ኢዛ ጌዶ ካሊዴስ።

6ኢዚ ኤቂን ቢታይ ቃጺዴስ፤

ኢዚ ጼሊዲ ኣሳ ኮኮሪሲዴስ፤

ሜርናስ ዲዛ ዙማቲ

ላሌቴ ፒስኪ ጊዳ፤

ቤኒሶፌ ዲዛ

ዙማቲካ ዎዲዳ፤

ኢዛ ኦጌይ ሜርናሳ።

7ቶጵያ ዱንካኔቲ

ሜቶቴቲሺን፥

ሚዲያሜታ ዱሳሶይ

ቡልኣኬቲሺን ታ ቤያዲስ።1

8ጎዳዉ! ኔ ሃታ ቦላ

ሃንቄታዲ?

ኔ ሃንቆይ ሃ

ፑልቶታ ቦላ ዲዜ?

ኔኒ ኔ ፓራታኔ

ጾኒዛ ፓራ-ጋሬታ ቶጋዳ

ካሌዳ ዎዴ ኣባ ቦላ

ሃንቄታዲ?

9ኔኒ ኔ ዎንዳፌ ጊጊሳዳሳ፤

ዪሻይ ኔስ ያና ማላ

ኣዛዛዳሳ፤

ቢታ ጳልቃዳ ሃ ኬሳዳሳ።

10ዙማቲ ኔና ቤኢዲ ማኒዳ፤

ሃ ዳምባላይ

ኣ ቢዴስ፤

ኣባይ ጬቄቲዴስ፤

ኣባ ዳምባላካ

ፑዴ ዴንዴስ።

11ኔ ፒሪሳ ዬዲዳ

ኔ ዪሻታፔኔ

ጾልቄቲዛ ኔ ቶራ ፖኦፔ

ዴንዲዳይሳን ኣርሼይኔ

ኣጊናይ ባ ዲዛሶን ኤቂ ኣቲዳ።

12ኔኒ ቢታ ቦላ

ሃንቆን ሲሜሬታዳሳ፤

ዴሬታካ ሃንቆን ዬዳሳ።

13ኔኒ ኔ ዴሬ ኣሻናሲኔ

ኔ ቲይዳዴ ኣሻናስ ኬዛዳሳ፥

ኢታ ዴሬ ካሌዛዴ

ሊቂሳዳሳ፥

ሁኤፔ ቶሆ ጹጉን ጋካናስ

ካሎ ኣሻዳሳ።

14ጎቴ ጫርኮ ማላ

ኑና ላላናስ ዪዳይሳ፥

ኣይኮይ ባይንዳ ማንቆዛ

ጌማራ ሚታናስ ኣሞቲዛይሳ፥

ኦላንቻታ ሃላቃ ጊዲዳይሳ

ኢዛ ዛራ ጫዳዳሳ።

15ኔኒ ኣባ ኔ ፓራታን

ዬሲዛ ዎዴን

ጪማ ኣባይ ቃጼስ።

16ታኒ ሲያዲስ፤

ታ ዎዚናይካ ዳጋሚዴስ፤

ኢዛ ጊርሳፌ ዴንዲዳይሳን

ታ ሜቴርሻይ ኮኮሪዴስ።

ባቦን ታስ ማራጬይ ቃጺዴስ።

ታስ ጉልባቴይ ኮኮሪዴስ፤

ጊዲኮካ ኑ ቦላ

ዎራጂዛ ዴሬዛ ቦላ

ሜቶይ ያና ጋላስ

ታ ጌንጫ ናጋይስ።

17ባላሴ ጌቴቲዛ ሚይ

ኣይፎንታ ኣጊኮካ

ዎይኔ ሚፌ

ኣይፌይ ቤቶንታ ኣጊኮ

ዎጋራ ሚካ ኣይፎንታ ኣጊኮ

ጎሻ ጋዴይ

ካ ኢሞንታ ኣጊኮ

ዶርሲ ዪሬን ዶንታ ኣጊኮካ

ሚዚ ዜን ዶንታ ኣጊኮካ

18ታኒ ታ ጎዳን ኡፋዬታና፤

ታ ኢዛን ኣቲዳ

ጾሳን ኡፋዬታና።

19ጎዳ ታ ጾሳይ ታስ ዎልቃ፤

ታ ቶሆታ ኢዚ

ጌኔሳ ቶሆ ማላ ሚን፤

ኢዚ ታና ቃሶሆራ ሄሜና።

ዬጺዛይታ ካሌዛዴስ

ዬ ሚሻን ዬጼቲዳ ማዛሙሬ።2