ጌሻ ማጻፋ
ኢምባቆ ቲንቢቴ 2
ታኒ ናጌ ናጊዛሶን ኤቃና፤ ሚጻ ጊምቤ ቦላ ኬዛዳ ሄን ታካና። ታ ኦይሻስ ጎዳይ ኣይ ዛሮ ኢማናኮ ታ ዲዛሶን ዳዳ ኢዛ ናጋና።
ኢምባቆ ኦይሻስ ጎዳይ ኢሚዳ ዛሮ
ጾሲ ኢምባቆስ፥
«ዋዪሶንታ ናባቤታና ማላ
ኔስ ኣጁታን ቆንጪዳይሳ
ሳሌዳ ቦላ
ሎኤ ዎጫ ጻፋ።
ኔ ኣጁታዚ
ባስ ኢሜቲዳ ዎዴ ናጌስ፤
ኢዚካ ዉርሴ
ጊሻስ ዮቴስ፥
ዎርዶቴና።
ጋምኣና ሚሳቲኮካ ናጋ፤
ኢዚ ቱማፔ ያና፤
ሙሌካ ጋምኤና።1
«ሄኮ ኢዚ ኦቶሬቲዴስ፤
ኢዛ ኣሞይ ሱሬ ጊዴና፤
ጺሎ ኣሲ ጊዲኮ ኣማኖን ዴስ።2
ዱሬቴ ኣስ ባሌስ፤3
ኦቶራንቻስ ሙሌካ
ሼምፖይ ዴና፤
ኢዚ ዱፎ ማላ ዮራ፤
ዎዛ ሃይቆ ማላካ
ካሎ ኤሬና፤
ዴሬ ኡባ ሺሼሲኔ
ዲኢ ኤኪ ቤስ።
ሂስቲን ሄሳ ማላ
ኣሳ ቦላ ቂኒኔ
ካን ኣሳይ፥ ‹ባ ካይሲ ኤኪዳ
ሻቃጬዛ ባስ ሺሺዛዴስ፥
ጌኔን ዱሬቲዛዴስ ኣዬ ኣና!
ሄሳ ኣይዴ ጋካናስ
ሺሻኔ?›
ጊ ኢዛ ቦላ ሚጬኔ?
ኔ ኣጮን ዬጊዳ ኣሳቲ
ኔ ቆፖንታ ኔ ቦላ
ዴንዴቴኔ?
ኢስቲ ቤጊዲ
ኔና ዳጋንቴኔ?
ሄሳፌ ጉዬ
ኔ ኢስታ ኩሼን ኩንዳና።
ኔ ዳሮ ዴሬ ሚሽ
ቦንቂዳ ጊሻስ
ሃንኮ ቦንቄቶንታይቲ
ኔና ቦንቃና፤
ኔ ኣሳ ሱ ጉሳዳሳ፤
ዴራ፥ ካታማኔ
ኢዛን ዲዛይታ ዉርሳ ይሳዳሳ።
«ዎርዶራ ባሌ ኤኪዳ ሚሻን
ባስ ዳና ኬ
ኬጺዛዴሲኔ
ባ ሞርኬ ኩሼፔ ኣታናስ
ባ ኬ ቃሶሆን ኬጺዛዴስ
ኣዬ ኣና!
ዳሮ ኣሳ ሼምፖይ
ያና ማላ ቃቻዳሳ፤
ኔ ኬ ቦላኔ
ኔ ቦላ ይሲዛዝ ኤሃዳሳ።
ጊምቤ ጊዶን ሹቺ ዋሴስ፤
ጊዶን ጎዳ ኤቂዳ ሚቲካ
ኢዛስ ዛሮ ኢሜቴስ።
«ሱ ጉሲዲኔ ኢታ ኦዲ
ካታማ ኤሲዛይታስ ኣዬ ኣና!
ኣሳ ኦሶይ ኡባይ
ታማን ጹጌታና ማላ
ዴሬይካ ሜላ ዳቡራና ማላ
ጎዳይ ኡባፌ
ዎልቃማ ጾሳይ
ኡባ ዎቤኔ?
ኣባይ ኩሚዛ ማላ ቢታይ
ጎዳ ጊታቴ ኤሮን ኩማና።4
«ኣሳ ካሎቴ ቤያናስ
ባ ላጌታ ኡሹ
ኡሺዛዴሲኔ
ኢስቲ ኡዪዲ ማታና ጋካናስ
ዎይኔ ኡሹ ዱቂዛዴስ
ኣዬ ኣና!
ኔኒ ቦንቾ ጊሻስ ዬላታና፤
ሄሲካ ሃኢ ታራይ ኔስ ጊዲዳ
ጊሻስ ኡያዳ ጋንዲጋራ፤
ኔ ካሎታ።
ጎዳ ኡሻቻ ኩሼን ዲዛ
ሃንቆ ጹኣይ ኔ ቦላ ሲማና፤
ካሴ ኔስ ዲዛ ቦንቾዛ
ካዉሻቴን ላማና።
ኔ ሊባኖሴ ቦላ
ኦዳ ጌኔይ
ኔና ሚታና፤
ኔኒ ሜዶሳታ ይሲዳይሲ
ዛሪ ኔና ዳጋንና፤
ሄሲካ ኔ ኣሳ ሱ ጉሲዳ
ጊሻሲኔ
ዴሬታ፥ ካታማታኔ
ኢስታን ዲዛይታ
ኔ ኡባ ይሲዳ ጊሻሳ።
«ኣሳ ኩሼይ ማሲ ጊግሲዳ ኤቃኔ
ዎርዶ ሃሳይዛ ሚስሌስ
ኣይ ጎኣይ ዲዜ?
ሂስቲን ኢዛ ኦዳዴይ
ባርካ ባ ኦሶን ኣማኔቲዛ
ጊሻሲኔ
ኢስቲካ ሃሳያናስ ዳንዳዮንታ
ኤቃ ኦዛ ጊሻሳ።
ሚ፥ ‹ኔ ቤጋ!›
ሼምፖይ ባይንዳ ሹቻካ፥
‹ኔ ዴንዳ!› ጊዛዴስ ኣዬ ኣና!
ቱሙካ ኢዚ ታማርሳና
ዳንዳይዜ?
ሄኮ ኢዚ ቦላራ ዎርቃኒኔ
ቢራን ቲዬቲዴስ፤
ኢዛስ ሼምፖይካ ዴና።
ጎዳይ ጊዲኮ ባ ጌሻ
ኬን ዴስ።
ቢታ ቦላ ዲዛ ዴሬይ ዉሪካ
ኢዛ ሲንን ጮኡ ጎ» ጊዴስ።
Source notes (4)
- Cross-reference ኢብ 10፡37
- Cross-reference ኦሮ 1፡17፤ ጋላ 3፡11፤ ኢብ 10፡38
- Footnote ሃይሳን ዱሬቴ ጊዛይሳ ኢሲ ኢሲ ቢርሼቲ ዎይኔ ኡሹ ጌቴስ።
- Cross-reference ኢሳ 11፡9
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.