ሂዚቄላ ቲንቢቴ 31

ሊባኖሴ ዚጋ ሌሚሶ

1ኑኒ ዲኤቲዳ ታማኔ ኢሲን ላይን፥ ሄን ኣጊናን፥ ኮይሮ ጋላሳን ጎዳ ቃላይ ታኮ ዪዲ፥ 2«ሃይሶ ኣሳ ናዉ! ጊብጼ ካዎ ፓሮኔሲኔ ቆዳይ ባይንዳ ኢዛ ዴራስ፥

« ‹ጊታቴን ኔናራ

ጊናታናይ ኦኔ?

3ኢዛ ሃጋይ ዎራስ ኩዋ ጊዲዲ

ዳሮ ሉሌ ጊዲዲ ኢዛ ጼራይ

ሳሎ ጋኪ ዲቺዛ

ሊባኖሴ ዚጋ

ሚሳቲዛ ኣሶሬ ጼሊቴ።

4ሃቲ ኢዛ ጫሪሲዳ፤

ጪማ ፑልቶቲካ ኢዛ ዲቺዳ፤

ኢስታ ካንቼ

ሃቲ ጎጊዳ፤

ኢስታ ጻጶይ ዲዛሶ

ኡባ ኢርጺሲዳ፤

ዴምባን ዲዛ ሚታ ኡባኮ

ዛራ ሃ ዬዲዳ።

5ሃ ካሊዳ ጊሻስ

ዎራ ጊዶን ዲዛ ሚ ኡባፌ፥

ኬሂ ኣዱቂዴስ፤

ኢዛ ሃጋቲ ዳዪዳ፤

ኡንቁሎቲ ኣዱቂዳ።

6ሳሎ ካፎቲ ኡባይ ኢዛ ሃጋታ ቦላ

ባንታ ኬ ኬጺዳ፤

ዎራ ዶኣቲ ኡባይ

ኢዛ ሃጋታ ጋርሳን

ማራታ ዬሊዳ፤

ጊታ ካዎቴቲ

ኡባይ ኢዛ ኩዋ

ጋርሳን ዴኢዳ።

7ዳዪዳ ኢዛ ሃጋታራ

ኢዛስ ፑላዚ ኬሂ ሎኦ፤

ኢዛ ጻጶቲ ሃ

ዳሪ ዲዛሶ ቢዳ።

8ጾሳ ጋናቴን ዲዛ ዚጋቲካ

ኢዛራ ጊናታና ዳንዳይቤቴና፤

ጺዳቲካ ኢዛ ሃጋታራ

ጊናቴቴና፤

ዎላቲካ ኢዛ ሃጋራ

ጊናቴቴና፤

ጾሳ ጋናቴን ዲዛ

ኣይ ሚካ

ሎኤቴን ኢዛ ጋኬና።1

9ታኒ ኢዛ ዳሮ ሃጋታራ ጋ

ፑላሳ ሜዲስ፤

ጾሳ ጋናቴን ዲዛ

ሚቲ ኡባይ

ኢዛ ኣሞታና ማላ

ኦዲስ› ጌስ ጋ።

10«ሄሳ ጊሻስ ኡባ ሃሪዛ ጎዳይ፥ ‹ጩፑ ጊዳ ቦንጮታ ቦላ ጼራ ቁ ሂስቲዲ ባና ዛራሲዳ ጊሻስ፥ ባ ኣዱሳቴን ኢዚ ኦቶሬቲዳ ጊሻስ፥ 11ታኒ ኢዛ ኢታቴ ኬና ኢዛ ኦሶ ጋቴ ኢማና ማላ ካዎቴታ ሃሪዛይሳስ ታ ኢዛ ኣ ኢማዲስ። ታ ኢዛ ኬሳ ዎራ ኦላዲስ። 12ካዎቴታ ጋርሳን ኬሂ ሜንጼ ኢታ ኣላጋቲ ኢዛ ቃንጼሬ ዬጊዳ፤ ኢዛ ኡንቁሎቲ ዙማታኒኔ ዙሌታን ኩንዲዳ፤ ኢዛ ሃጋቲካ ሜቄሬቲ ሃ ዛራታን ዎዳ፤ ቢታን ዲዛ ካዎቴቲ ኡባይ ኢዛ ኩዋ ጋርሳፌ ኬዚዲ ዬጊ ቢዳ። 13ሳሎ ካፎቲ ዪዲ ኩንዲዳ ሚ ቦላ ኡቲዳ፤ ዎራ ዶኣቲካ ኡባይ ኩንዲዳ ሚ ሃጋታ ቦላ ኡቲዳ። 14ሄሳ ጊሻስ ሃ ላንቄን ዲዛ ኣይ ሚካ ባ ጼራ ጩፑ ጊዳ ቦንጮታፔ ቦላራ ቁ ሂስቲዲ ሃይሳፌ ጉዬ ባና ኦቶሮን ዛራሴና፤ ቃሴካ ኣይ ሚካ ሎኤዲ ሃይሳ ኣዱቄና፤ ኡባይካ ሃይቂዲ ዱጌ ዱፎን ጌሊዛይታራ ኢሲፌ ሃይቃና ማላ ፒርዴቲዴስ› ጌስ።

15«ኡባ ሃሪዛ ጎዳይ፥ ኢዚ ዱጌ ዱፎን ጌሊዳ ጋላስ ጪማ ፑልቶታ ኢዛ ጊሻስ ካዮን ካማዲስ፤ ሻፋታ ቴቃዲስ፤ ጎጊዛ ሃቲካ ኤቂዳ፤ ታ ኢዛ ጋሶን ሊባኖሴ ማ ማይዛዲስ፤ ዎራ ሚቲ ኡባይ ሜሊዳ። 16ዱጌ ዱፎን ጌሊዛይታራ ታ ኢዛ ጌልዛ ዎዴ ኢዚ ኩንዲሺን ሲዬቲዳ ጊሪሳይ ካዎቴታ ዳጋንዴስ፤ ሄሳፌ ጉዬ ኤዴኔ ሚቲ፥ ዱማኔ ዶሬቲዳ ሊባኖሴ ሚቲ፥ ሃ ካሊዳ ሚቲ ኡባይ ቢታ ጋርሳን ዲሼ ሚኔቲዳ። 17ካዎቴታ ጊዶፌ ኢዛራ ዙፔቲዳይቲ፥ ኢዛ ኩዋ ጋርሳን ዴኢዳይቲ፥ ማሻን ሲፌቲዳይታራ ጋይታናስ ዱጌ ዱፎን ዎዳ።

18«ኤዴኔን ሚታፔ ፑላቴኒኔ ኣዱሳቴን ኔናራ ጊናታናይ ኦኔ? ጊዶ ኣቲን ኔኒካ ሄሳ ኤዴኔ ሚታራ ኢሲፌ ቢታ ጋርስ ጌላና፤ ማሻን ሃይቂዳይታራኔ ኣማኖንታይታራ ኢሲ ቦላ ኢቻና።

«ፓሮኔኔ ቆዳይ ባይንዳ ኢዛ ዴራ ጋካናይሲ ሃይሳ፤ ታኒ ኡባ ሃሪዛ ጎዳይ ሃይሳ ዮታዲስ» ጊዴስ።