ጌሻ ማጻፋ
ሂዚቄላ ቲንቢቴ 28
ጺሮሴ ሃላቃ ቦላ ዮቴቲዳ ቲንቢቴ
ጎዳ ቃላይ ታኮ ዪዲ፥ «ሃይሶ ኣሳ ናዉ! ጺሮሴ ሃላቃስ ኡባ ሃሪዛ ጎዳይ፡
«ኔ ዎዚናይ ኦቶሮን ኩሚዲ፥
‹ታኒ ጾሳ፤
ጾሳ ኣራታን ኣባስ
ጊዶ ኣዳን ኡታዲስ› ጊዴስ።
ኣይኮስካ ኔኒ ታኒ ጾሳ ማላ
ኣ ኤራንቻ ቆፒኮካ
ኔኒ ኣሳ ኣቲን ጾስ ዳካ።
ኔኒ ዳኔላፔ ቦላራ
ኣ ኤራንቻ?
ኔፔ ጌሚዳ
ጹራ ዮኦይ ዴኔ?
ኔ ኣ ኤራቴኒኔ
ኔ ኣኬካን
ኔ ኣቆታ ዳጋሳዳሳ፤
ዎርቃኔ ቢራ
ኔ ሚንጃ ኬን
ሺሻዳሳ።
ኔ ዛልኤ ኦሶ ኤራቴን
ኬሃ ቢዳ ጊሻስ፥
ኣቆታ ቦላ ኣቆታ ዳጋሳዳሳ፤
ኔ ኣቆታ ዳሮቴፌ
ዴንዲዳይሳን
ኔ ዎዚናይ ኦቶሮን
ኩሚዴስ ጋዳ ዮታ።
«ሄሳ ጊሻስ
ኡባ ሃሪዛ ጎዳይ፥
‹ታኒ ጾሳ ማላ
ኣ ኤራንቻ›
ጋዳ ኔኒ ቆፒዛ ጊሻስ፥
ካዎቴታ ጊዶን
ኬሂ ሜንጼ ኢታ ጊዲዳ ኣላጋታ
ታ ኔ ቦላ ኤሃና።
ኢስቲ ኔ ኣ ኤራቴ
ፑላቴ ቦላ
ባንታ ማሻ ሾዳና፤
ጊታ ኔ ቦንቾዛካ ቱኒሳና።
ኔና ዱጌ ኦላን ዬጋና፤
ጪማ ሃን ኣባ ጊዶን
ኢታ ሃይቆ ኔ ሃይቃና።
ሂስቲን ኔኒ ኔና ዎዛይታ
ሲንን፥
‹ታኒ ጾሳ› ጋንዲ?
ኔና ዎዛይታ ኩሼን
ኔ ጌላሼ
ኔኒ ኣሳ ኣቲን ጾስ ዳካ።
ኔኒ ኣላጋታ ኩሼን
ኣማኖንታ ኣሳታ
ሃይቆ ማላ ሃይቃና፤
ኡባ ሃሪዛ ጎዳይ፥
‹ታኒ ሃይሳ ዮታዲስ›
ጌስ» ጊዴስ።
ጺሮሴ ካዎ ኩንዴ
ቃሴካ ጎዳ ቃላይ ታኮ ዪዲ፥ «ሃይሶ ኣሳ ናዉ! ጺሮሴ ካዎ ጊሻስ ዚላላሼ ኡባ ሃሪዛ ጎዳይ ኔና፥
« ‹ኣ ኤራቴን ኩማዳ፥
ኩሜ ፑላቴ ማይኣዳ
ኔኒ ኣሳስ ቱሙ ሌሚሶ ጊዳዳሳ።
ኔኒ ኤዴኔን፥
ጾሳ ኣታኪልቴ ጊዶን ዴኣዳሳ፤
ቦንቾ ሹቻዚ ኢሶይ ኢሶይ
ኔና ኣሌቂሲዴስ፤
ኢስቲካ ሳርዲዮኔ፥
ቶጳዚዮኔኔ ኣልማዜ፥
ማርጊዴ፥ ኢያስጲዴኔ ሲምፔሬ፥
ቤሉሬ፥ ቢሪሌኔ ኣልኦ ኢንቁ፤
ኔ ማይኦቲካ ጾልቂዛ
ኢንቁኔ ዎርቃ፤
ሃይቲ ኔኒ ሜቲዳ
ጋላስ ኦሴቲዳ።
ኔኒ ናጊዛ
ኪሩቤ ጊዳዳ ቲዬታዳሳ፤
ሄሳስ ታ ኔና ሹማዲስ፤
ኔኒ ካሴ ጌሻ ዙማን
ጾሳይሳን ዴኣዳሳ፤
ታማ ማላ ሹቻታ ጊዶን
ሲሜሬታዳሳ።
ኔኒ ሜቲዳ ጋላሳፌ ዶሚን፥
ኢታቴ ኔ ቦላ
ቤቲዳ ጋላስ ጋካናስ፥
ኔኒ ኦጌ ኡባን
ቦሬይ ባይንዳ ዴኣዳሳ።
ኔ ዛልኤይ ሚኒዳ ጊሻስ፥
ማካላቴን ኩማዳሳ፤
ናጋራካ ኦዳሳ።
ሄሳ ጊሻስ ታ ኔና
ጾሳ ዙማ ቦላፌ
ካዉሻዳ ዬዴዲስ፤
ሃይሶ ናጊዛ ኪሩቤ!
ታ ኔና ታማ ሚሳቲዛ
ሹቻታ ጊዶፌ ኬሳዲስ።
ኔ ፑላቴ ጋሶን፥
ኔ ዎዚናይ ኦቶሬቲዴስ፤
ኔ ቦንቾ ጊታቴፌ
ዴንዲዳይሳን፥
ኔ ኣ ኤራቴ ቱኒሳዳሳ፤
ሄሳ ጊሻስ ታኒ ኔና
ዱጌ ቢታን ኦላዲስ፤
ሃራ ካዎታ ሴራናስ
ማላታ ኦዲስ።
ኔ ናጋራኒኔ ኔ ጪሞ ዛልኤ
ዳሮፔ ዴንዲዳይሳን፥
ኔ ጎይኒዛ ኬታ
ቱኒሳዳሳ።
ሄሳ ጊሻስ
ታኒ ታማይ ኔ ጊዶፌ
ኬዛና ማላ ኦዲስ፤
ኢዚካ ኔና ሚዴስ።
ኔና ቤኢዛ ኡባ ሲንን፥
ቢታ ቦላ ኔና ቢዲን ኬሳዲስ።
ኔና ኤሪዛ ካዎቴቲ ኡባይ፥
ኔ ቦላ ጋኪዳይሳን ዳጋሚዳ።
ኔ ዉርሴ
ጬጪሲዛዝ ጊዲዴስ፤
ሃይሳፌ ጉዬ ኔስ
ዴኦይ ዴና› ጌስ» ጊዴስ።
ሲዶና ቦላ ዮቴቲዳ ቲንቢቴ
ጎዳ ቃላይ ታኮ ዪዲ፥1 «ሃይሶ ኣሳ ናዉ! ኔ ኣይፌሶ ሲዶና ባጋ ዛራዳ ቲንቢቴ ኢዚ ቦላ ዮታ። ኔኒ ዴራስ ኡባ ሃሪዛ ጎዳይ ኔና፥
‹ሃኔ ሲዶና ታኒ ኔ ቦላ ዴንዳዲስ፤
ኔ ጊዶን ታኒ ቦንቼታና፤
ቂጻቴ ታኒ ኢዚ ቦላ ኤሂሺን፥
ታ ጌሻቴካ
ታ ኢዚ ጊዶን ቆንጪሲሺን፥
ታኒ ጎዳ ጊዲዳይሳ ኢስቲ ኤራና።
ታኒ ኢዚ ቦላ ኢታ ሃርጌ ኤሃና፤
ኢዚ ኦጌታን ሱ ጉካና ማላ
ታ ኦና፤
ኡባ ባጋራ ዪዛ
ማሻን ሲፌቲዳይቲ፥
ኢዚ ጊዶን ኩንዳና፤
ሄሳፌ ጉዬ
ታኒ ጎዳ ጊዲዳይሳ
ኢስቲ ኤራና።
« ‹ሃይሳፌ ጉዬ ኢስራኤሌ ኣሳ ኡንኤዛ ኪንዲቾይኔ ጫዲዛ ኣጉን ጊዲዳ ሾሮቲ ኢስታ ዩሾን ዴቴና፤ ሄሳን ታኒ ኡባ ሃሪዛ ጎዳ ጊዲዳይሳ ኢስቲ ኤራና› ጌስ» ጊዴስ።
ኢስራኤሌ ኣሳ ኣንጄቴ
ኡባ ሃሪዛ ጎዳይ፥ «ታ ኢስራኤሌ ዴራ ኢስቲ ላሌቲዳ ካዎቴታ ቢታፌ ሺሺዛ ዎዴ፥ ካዎቴቲ ጼሊሺን ታ ጌሻቴ ታኒ ኢስታ ጊዶን ቆንጪሳና፤ ሄሳፌ ጉዬ ኢስቲ ታኒ ታ ኣይሌ ያቆቤስ ኢሚዳ ባንታ ቢታን ዴኣና። ሄን ኢስቲ ሳሮን ዳና፤ ኬታ ኬጻና፤ ዎይኔ ቱራ ቶኪዛሶሆታ ጊጊሳና፤ ኢስቲ ካዳ ሾሮታ ታ ቃጻዪዛ ዎዴ ኢስቲ ሳሮን ዳና፤ ሄሳፌ ጉዬ ታኒ ጎዳይ ኢስታ ጾስ ጊዲዳይሳ ኢስቲ ኤራና» ጌስ።
Source notes (1)
- Cross-reference ኢዩ 3፡4-8፤ ዛካ 9፡1-2፤ ማቶ 11፡21-22፤ ሉቃ 10፡13-14
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.