ዛሬ ማጻፋ 32

1ሳሎቶ! ታኒ ዮቲዛይሳ

ኤዝጊ ሲዪቴ፤

ሳኣዞ ታ ዶናፔ

ኬዚዛ ቃላ ሲያ።

2ታ ኢሚዛ ቲሚርቴይ

ኢራ ማላ ቡኮ፤

ታ ሃሳያይካ

ጻዛ ማላ ጾኬቶ፤

ማታ ቦላ ሎዲ ጊ ቡኪዛ

ኢራ ማላ ቡኮ፤

ካ ጫሬቻ ቦላ

ፑሴ ማላ ዎ።

3ታኒ ጎዳ ሱን ኣዋጃይስ፤

ኑ ጾሳ ጊታቴ

ኢንቴ ዮቲቴ።

4«ኢዚ ኑስ ሚጻ፤

ኢዛ ኦሶቲካ ኩሜ፤

ኢዛ ኦጌቲ ዉሪካ ሱሬ፤

ኢዚ ባሌቶንታ

ኣማኔቲዳ ጾሳ፤

ኢዚ ሱሬኔ ጺሎ ጾሳ።

5«ኢስቲ ኢዛ ሲንን

ኢታ ኦዳ፤

ኢስቲ ባንታ ኢታቴፌ

ዴንዲዳይሳን

ሃይሳፌ ጉዬ

ኢዛ ናይታ ጊዴቴና፤

ኢስቲ ቦካኔ ጌላ ዬሌታታ።

6«ኢንቴኖ ኤያቶ!

ቃሴካ ዎዚናይ ባይንዳይቶ!

ኢንቴ ጎዳስ

ኢሚዛ ዛሮይ ሃይሴ?

ኢንቴና ሜዳ

ኢንቴ ኣዋይ ኢዛ ጊዴኔ?

ኢንቴና ሜዲ ሃይሳስ

ጋዳይ ኢዛ ጊዴኔ?

7«ካሴ ቤኒ ዎዴዛ

ዩሺ ቆፒቴ፤

ዳሮ ዬሌታታ

ላይካ ኣኬኪቴ፤

ኢንቴ ኣዋታ ኦይቺቴ፤

ኢስቲ ኢንቴስ ዮታና፤

ካሴ ጪማታካ ኦይቺቴ፤

ኢስቲ ኢንቴስ

ቆንጪሲ ዮታና።

8«ኡባፌ ቃ ጾሳይ

ካዎቴታስ ቢታ

ጊሼቺዳ ዎዴ፥

ኣሳ ናይታ ኢስታ

ዛሬን ዛሬን ሻኪዳ ዎዴ፥

ኢስራኤሌ ኣሳ ቆዳ ኬና

ካዎቴታስ ስ ዎዴስ።1

9«ኢስራኤሌይ ጎዳስ ጊሻ፤

ያቆቤይካ

ኢዛስ ቡዞ ሚሻ።

10«ኣይኮይካ ባይንዳ ባዞን

ጫርኮይ ፑኒዛ ቢታን

ኢዛ ዴሚዴስ፤

ኢዛስ ጎንዳሌ ጊዲዴስ፤

ባ ኣይፌ ጪሮ ማላ

ኢዛ ናጊዴስ።

11ጎሌ ካፎይ ባ ጪዬታ

ፒራ ታማርሲዛ ማላ፥

ባ ቄፌ ሚጫዳ

ጋካ ኦይካ ኣሺዛ ማላ፥

ጎዳይ ባ ቄፌን ሃጵዲ

ኢስታ ኣሺዴስ።

12ሃራ ኤቃ ጾሳቲ

ኢዛራ ባይንዳ ጎዳይ

ኢዛ ባርካ ካሌዴስ።

13«ቃ ሶሆን

ኢዛ ዎዴስ፤

ቢታፌ ሞኪዳ ካ ኣይፌ

ኢዛ ሚዚዴስ፤

ዛላፌ ቤቲዳ ኤስ ኡሺዴስ፤

ሹቻ ቢታን ሞኪዳ

ዎጋራ ዛይቴ ሚዚዴስ።

14ሚዛፔ ዶርሳፌኔ

ዴይሻ ዉዴፔ

ቤቲዛ ማኒኔ ኦይስ

ባሳኔ ዴሬፔ ቤቲዛ

ኦሃላ ላቃታ፥

ሞ ርሾታ፥

ዎፋኖታኔ ዴይሻታ፥

ሎኦ ጊስቴ ዳቦራ

ኢስታ ሚዚዴስ።

ኢንቴ ኢዛ ዴሬቲ

ዞኦ ዎይኔ ሚ ኣይፌፔ፥

ጊጊዳ ዎይኔ

ኡሹ ኡዪዴታ።

15«ኢስራኤሌ ኣሳይ

ኦርዲዴሲኔ ማካሊዴስ።

ዳሮ ሚዲ ሞዴሲኔ

ሞላቲዴስ፤

ባና ሜዳ ጾሳ ኣጊዴስ፤

ባና ኣሺዳይሳካ

ካዉሺዴስ።

16ኢስቲ ኤቃ ጾሳታስ

ጎይኒዲ ጾሳ ሚሺሲዳ፤

ባንታ ኢታ ኦሶንካ

ኢዛ ሃንቄዳ።

17ሃይሳፌ ካሴ

ባ ኤሮንታይታስ፥

ጾስ ጊዶንታ ዳይዳንታስ፥

ማታ ዎዴ ዪዳ ጾሳታስ፥

ቤኒ ኢስታ ኣዋቲ ኢስታስ

ጎይኖንታ ኤቃታስ፥

ኢስቲ ያርሾ ሺሺዳ።2

18ኢስቲ ባስ ዴኦ ኢሚዳ

ዛላ ዶጊዳ፤

ባና ሜዳ

ጾሳካ ባሊዳ።

19«ጎዳይ ሄሳ ቤኢዲ

ኢስታ ቦላ ሃንቄቲዴስ፤

ኢስታ ማጫ ናይታኔ

ኢስታ ኣቱማ ናይታ ዲጊዴስ።

20‹ታኒ ታ ኣይፌሶ

ኢስታፌ ጌንና፤

ኢስቲ ጌላኔ ኣማኔቶንታ

ዴሬ ጊዲዳ ጊሻስ

ኢስታ ዉርሴ

ኣይ ጊዳናኮ

ታ ጮኡ ጋ ቤያና።›

21ቱሙ ጊዶንታ ጾሳታን

ታና ሚሺሲዳ፤

ጎኣይ ባይንዳ

ባ ኤቃ ጾሳታን

ታና ሃንቄዳ።

ታኒካ ኢስታ ካቲዳ

ካዎቴታ

ኢስቲ ሚጌታና ማላ ኦና።

ታ ኢስታ ኣኬኮንታ

ዴሬታን ሃንቄና።3

22ታ ሃንቆይ

ታማ ማላ ኤጻና፤

ቢታኔ ቢታ ቦላ ዲዛ

ኡባ ጹጋና፤

ሄ ታማይ ሲኦሌ

ጪማ ጋካናስ ኤጻና፤

ታማዚ ዙማስ

ዮች ጋካናስ ማና።

23ታኒ ኢስታ ቦላ

ዛሬ ዛሬ

ቦሻ ኤሃና፤

ታስ ዲዛ ዎንዳፌ

ታ ኢስታ ቦላ ዉርሳና።

24ታ ኡባ ዉርሲዛ ኮሻ

ኢስታ ቦላ ዬዳና፤

ኢሳፌ ኢሳን ኣዛ

ኢታ ሃርጌኒኔ

ቦሻን ኢስቲ ዉራና፤

ሜቶ ጋዛ ኢታ ዶኣታኔ

ዱኪዛ ማርዜራ ዲዛ

ሾሻታ

ታ ኢስታ ቦላ ዬዳና።

25ኦጌ ኡባን ኢስታ ናይታ

ኦላይ ዉርሳና፤

ኢስታ ኬ ጊዶንካ

ሂርጋይ ኩማና፤

ፓንቲኔ ጌላኦቲ፥

ጉ ናይቲኔ

ጪማቲ ኡባይ ዉራና።

26ታኒ ኢስታ ኡባ ላላና፤

ሄሳፌ ጉዬ ኢስታራ

ሃሳኣና ኣሲ ዴና።

27ጊዶ ኣቲን

ኢስታ ሞርኬቲ፥

‹ኑኒ ኑ ዎልቃን

ኢስታ ጾኒዶስ ኣቲን

ጾሴ ጊዴና› ጊዲ

ኦቶሬቴን ጬቄቲዲ

ታና ሃንቄናኮ

ጋዳ ቆፓይስ።

28ኢስራኤሌ ኣሳይ

ዩሺ ቆፖንታ ካዎቴ፤

ኢስታስ ኣኬካይ ዴና።

29ኢስቲ ኤራታ ጊዲዳኮ

ሃይሳ ኢስቲ

ካሴቲዲ ቆፓና፤

ባንታ ዉርሴንካ

ሃናናይሳ ዩሺ

ቆፓናሺን!

30ኢስታ ሜዳይሲ

ኢስታ ኣ ኢሞንታኮ፥

ጎዳይ ኢስታ

ዬጊ ኣጎንታኮ፥

ኢሳዴይ 1,000 ኣስ

ዎስቲ ጎዳንዴ?

ዎይኮ ናምኣቲ 10,000 ኣስ

ዎስቲ ጎዳኔ?

31ሃራይ ኣቶሺን ኑ ሞርኬቲ

ኢስታ ጾሳይ

ላፋ ጊዲዳይሳኔ

ኢስራኤሌ ጾሳ ማላ

ጊዶንታይሳ ኤሬቴስ።

32ኑ ሞርኬቲ ሶዶሜኔ

ጋሞራ ዴሬ ኣሳ ማላ ቱና፤

ኢስቲካ ጫሞኔ

ማርዜራ ዲዛ

ኣይፌ ኣይፊዛ

ዎይኔ ሚ ማላ።

33ኢስታ ዎይኔ ኡሻይ

ሾሻ ማርዜ ማላ፤

ቃሴካ ሃሶ ሾሻ

ማርዜ ማላ።

34«ሃይሳ ታኒ ዶጋዲና?

ታ ማዝጋባን

ጻፌቲ ኡቲዴስ።

35ኢስታ ሞርኬታ ቦላ

ሃሎ ኬሳናይ ታና፤

ኡባሲካ ታ ኢስታ

ኦሶ ኦሶ ማላ ኢማና፤

ኢስታስ ዮ

ጋላሲ ጋኪዳ ጊሻስ

ኢስቲ ጴታና፤

ኤሶንካ ያና።»4

36ኢስታስ ዎልቃይ

ዳቡርዳይሳኔ

ኢስታካ ማዲዛይ

ባይንዳይሳ ቤኢዲ፥

ጎዳይ ባ ኣሳስ ፒርዳና፤

ባ ኣይሌታስካ ቃታና።5

37ጎዳይ ባ ኣሳ፥

«ኢስቲ ኣማኔቲዛ

ኢስታ ጾሳቲ

ኣዋን ዲዞ?

ኢስቲ ባቃቲ ኣቲዛ ዛላቲ

ኣዋን ዲዞ?» ጊ ኦይቻና።

38ኢስቲ ያርሾስ

ሺሺዛ ቶልዛ ሚዳይቲ፥

ኢስታ ዎይኔ ኡሻ

ያርሾዛ ኡዪዳ

ኢስታ ኤቃ ጾሳቲ

ኣኔ ሃኢ ኢንቴና

ዴንዲ ማዴቶ፤

ቃሴካ ኢንቴስ

ዱሳሶ ኢሜቶ።

39«ታኒ ጻላ

ጾስ ጊዲዳይሳ ኤሪቴ፤

ታፔ ሃራ ጾሲ ዴና፤

ዎዛይካ ፓጻ

ዎዛይካ ታና፤

ታኒ ማዱንይሲኔ

ፓይስ፤

ታ ኩሼፔ ኦኒካ

ኢንቴና ኣሼና።

40ታኒ ታ ኩሼ

ፑዴ ሳሎ ዴንዳ፥

‹ታ ሜርናስ ዴኣይስ።

41ዋዋጪ ጊዛ

ታ ጊ ማሻ ሌፋና፤

ታ ኩሼይ ፒርዳስ ኦይካና፤

ታ ሞርኬታ ቦላ

ሃሎ ኬሳና፤

ታና ኢጺዛይታስ

ታ ኢስታ ኦሶ ማላ

ኢስታስ ኢማና።

42ሞርኬታ ሃላቃታ፥

ማዱንጺዳይታኔ

ዲኤቲዳይታ ሱን

ታ ዎንዳፌታ

ታ ማሳና፤

ታ ጊ ማሻቲካ

ታ ሞርኬታ ኣሾ ማና›

ጋ ጫቃና።

43«ኢንቴኖ ካዎቴቶ!

ጎዳይ ባ ኦሳንቻታ

ሱ ኣጫና፤

ሞርኬታ ቦላ ሃሎ ኬሳና፤

ባና ኢጺዛይታ ቃጻያና፤

ባ ዴሬዛ ናጋራ ዉርሳና፤

ቢታዮካ ቱናቴፌ ጌሻና፤

ሄሳ ጊሻስ

ኢንቴ ኢዛ ኣሳራ

ኢሲፌ ኡፋዬቲቴ» ጊዲ፥6

44ሙሴይኔ ናዌ ና ኢያሶይ ዴሬዚ ሲዪሺን ሃ ዬዛ ዮቲዳ።

ዉርሴን ሙሴይ ኢሚዳ ዞሬ

45ሙሴይ ሃይታ ሃ ቃላታ ኩሜ ኢስራኤሌ ኣሳ ሲሲዳፔ ጉዬ፥ 46ኢዚ፥ «ሃይሳ ዎጋ ቃላ ኡባ ኢንቴ ናይቲ ሎኤ ናጋና ማላ፥ ኢስቲ ኦና ማላኔ ኢንቴ ናይታ ኢንቴ ኣዛዛና ማላ ሃች ታ ኢንቴስ ማርካቲዛ ቃላ ኡባ ኢንቴ ዎዚናን ዎቴ። 47ሃ ቃላይ ኢንቴስ ዴኦፔ ኣቲን ጮ ሜላ ቃላ ጊዴና፤ ሃ ቃላ ናጊኮ ኢንቴ ዮርዳኖሴ ፒኒዲ ላታና ቢታንካ ኣዱሳ ላይ ኢንቴ ዴኣና» ጊዴስ።

ሙሴ ሃይቆ ጊሻስ ዮቴቲዳ ቲንቢቴ

48ሄ ጋላስ ጎዳይ ሙሴስ ሂዝጊዴስ፥ 49«ሞኣቤ ዴሬን ኢያርኮ ካታማ ጊናራ ዲዛ ኣባሪሜ ዙማታ ጊዶፌ ኔቦ ዙማ ቦላ ኬዛ፤ ሂስታዳ ታኒ ኢስራኤሌ ኣሳስ ኢማና ጊዳ ካናኔ ቢታ ሄ ፒንን ጼላ። 50ኔ ኢሻ ኣሮኔይ ሆሬ ዙማ ቦላ ሃይቂዲ ካሴ ሃይቂዳ ባ ኣሳታን ጋይቲዳ ማላ ኔካ ሄ ዙማ ቦላ ሃይቃዳ ኔ ኣሳታን ጋይታና። 51ኢንቴ ናምኣይካ ኢስራኤሌ ኣሳ ሲንን ታስ ኣማኔቲቤኬታ፤ ጺኔ ባዞን ቃዴሴ ካታማ ማታን ዲዛ ማሪባ ሃ ኣቻን ታ ጌሻቴ ኢስራኤሌ ኣሳ ቤሲቤኬታ። 52ሄሳ ጊሻስ ኔኒ ሄ ቢታዮ ሃሆን ዳሼ ቤኣና ኣቲን ታኒ ኢስራኤሌ ኣሳ ላቲሳና ቢታዮ ኔኒ ጌላካ።»7