ዛሬ ማጻፋ

ዛሬ ማጻፋ

ጊዶ ቆፋ

ዛሬ ማጻፋይ ኢስራኤሌ ኣሳይ ባዞ ቢታን ዳሮ ዎዴ ሄሜቲሼ ካናኔ ጌላናስ ጉ ኣሺዲ ሞኣቤ ዴሬን ጋምኢዳፔ ጉዬ ሙሴይ ኢስታስ ዛሪ ዛሪ ዮቲዳ ዮኦታ ኦይኪዴስ። ዛሬ ማጻፋን ጻፌቲ ዲዛይቲ ዳሮ ጎኢዛ ሚሻታ ጊዶፌ ኢሲ ኢሲ ኦሶቲ ሃይሳፌ ካሊ ዲዛይታ፥ 1. ሙሴይ ካሴ ኣዳ ኦይዱ ታሙ ላይታን ሃኒዳ ዳሮ ጊታ ሃኖታ ዩሺ ቆፒዲ ዮቴስ። ጾሳይ ኢስታ ባዞ ቢታን ዎስቲ ዎስቲ ካሌዳኮ ዴሬዛ ኣኬኪሶን ኣሳይ ጾሳስ ኣማኔቲዛ ኣስ ጊዳና ማላኔ ሱሬቴን ኢዛስ ኣዛዜታና ማላ ቆፍሲዴስ። 2. ሙሴይ ታሙ ኣዛዞታ ዛሪ ዛሪ ዮቲሼ ሃራፔካ ኮይሮ ኣዛዞዛ ቢርሼ ቢርሺ ዮቲዲ ዴሬዚ ጾሳስ ጻላ ጎይናና ማላ ቆፍሴስ፤ ሄሳራካ ጋዲ ኢስራኤሌ ኣሳይ ኢስታስ ሂዶታን ኢሜቲዳ ዴሬዪን ዲሼ ኢስቲ ናጋናስ ቤሲዛ ዎጋታ ዱማ ዱማ ዎጋታ ቆንጪሲ ዮቲዴስ። 3. ሙሴይ ጾሲ ኢዛራ ጫቄቲዳ ቃላይ ኣይ ማላኮ ዴሬዛስ ቢርሺ ዮቲዲ ዴሬዚ ሄሳ ሄ ቃላስ ባ ኣማኔቴ ኦራጺሳና ማላ ኢስታ ቆፍሲዴስ። 4. ኢያሶይ ሙሴሶሆን ጊዲዲ ጾሳ ዴራ ካሌና ማላ ሹሜቲዴስ። ሙሴይ ጾሳ ኣማኔቴ ጊሻስ ጊጊዳ ጊንጾ ዬጺዳፔ ጉዬ ኢስራኤሌ ዴራ ኡባ ኣንጂዳፔ ጉዬ ዮርዳኖሴ ሻፋፔ ኣርሼይ ዉሊዛ ባጋራ ዲዛ ሞኣቤ ዴሬን ሃይቂዴስ። ሃ ማጻፋስ ኣይፌ ዮኦይ ጾሲ ባ ዶሲዳይታኔ ዶሬቲዳ ባ ዴሬታ ኢዚ ኣሺዳይሳኔ ኣንጂዳይሳ ዮቴስ። ዴሬዚካ ጾሳ ኣንጆይ ኢዛፔ ሻኬቶንታ ሼምፖራ ፓጻ ዳና ማላ ጾሲ ኣሳስ ኦዳ ኦሶ ኡባ ዎዴ ኣኬኪዲ ኢስቲ ጾስ ሲቃናሲኔ ኢዛስ ኣዛዜታናስ ቤሲዛይሳ ኣሳ ቆፍሲዴስ። ሃ ማጻፋስ ኣይፌ ቆፋታ ኦይኪዳ ጺቂሴቲ ሃ ማጻፋን ሼምፖ 6፡4-6 ጋካናስ ዲዛይታ ጊዲሺን ሄይቲካ ዬሱሲ፥ «ኣዛዞታ ኡባታፔ ኣዛ ጊታ ኣዛዞታ» ጊዲ ኢስታስ ዮቲዳ ቃላታ ኦይኪዳይታ። ሄይቲካ፥ «ኔኒ ኔ ጎዳ ኩሜ ዎዚናፔ፥ ኩሜ ሼምፖፌ፥ ኩሜ ዎልቃፌ ሲቃ» ጊዛይሳ።

ሃ ማጻፋይ ኦይኪዳ ኩሜ ቆፋ

ሙሴይ ኮይሮ ሃሳይዳ ሃሳያ

ሙሴይ ናምኣን ሃሳይዳ ሃሳያ

ታሙ ኣዛዞታ

ዎጋታ፥ ማራታኔ ሴራታ

ኢስቲ ካናኔ ጌላናፔ ካሴ ኢስታስ ኢሜቲዳ ካሌ ዎጋታ

ጫቆ ቃላ ኦራጺሶ

ሙሴይ ዉርሴን ሃሳይዳ ቃላ

ሙሴ ሃይቆ