ኣሞጼ ቲንቢቴ 9

ኢስራኤሌ ቦላ ያና ፒርዳ

1ጎዳይ ያርሾ ያርሺዛሶዛ ሚሌን ኤቂ ዲሺን ታ ቤያዲስ፤

ኢዚካ ታና፥

«ጾሳ ኬ ዮቻይ

ቃጻና ጋካናስ

ኬ ቁስቴ

ሾጫ ላላዳኔ

ኣሳ ቦላ ኩንዳና ማላ ኦ፤

ሄሳፌካ ኣቲዳይታ

ታኒ ኢስታ ማሻራ

ዎ ይሳና፤

ኢስታፌ ኦኒካ ባቃቴና፤

ባቃቲኮካ ታፔ

ኬሲ ኤኪ ኣቴና።

2ኢስቲ ዱፎ ቦኪ ጌሊዳኮካ

ታ ኩሼይ

ኢስታ ሄፔ ሾዲ ሃ ኬሳና፤

ኢስቲ ፑዴ ሳሎ ኬዚዳኮካ

ታኒ ኢስታ ሄፔ

ሃ ዱጌ ጎቻ ዎና።

3ኢስቲ ፑዴ ቃርሜሎሴ ዙማ ቦላ

ኬዚ ቆቴቲዳኮካ

ታ ካሌታ ባዳ

ኢስታ ሄፔ ዎና፤

ኢስቲ ዱጌ ጪማ ኣባ ጊዶ

ጌሊዲ ታፔ ቆቴቲዛኮካ

ሄን ኢስታ ሾሺ ዱካና ማላ

ታ ኣዛዛና።

4ኢስቲ ባ ሞርኬታ ኩሼን

ዲኤቲ ቢኮካ

ሄን ኢስቲ ማሻን

ሃይቃና ማላ

ታ ኣዛዛና፤

ታኒ ኢስታ ቦላ

ታ ኣይፌ ሎኦስ ጊዶንታ

ኢታስ ዛራና» ጊ ኣዛዚዴስ።

5ኡባ ሃሪዛ ጎዳይ

ኢዚ ቢታዮ ቦቼስ፤

ኢዛካ ሴራዉስ፤

ኢዚን ዲዛ ኡባይ ዬኬስ፤

ናይሌ ሻፋይ

ኪጺ ጉሚዛ ማላ

ቢታ ኡባይ ቃጼስ፤

ቃሴ ዛሪዲ ኪጻ ሃ

ዎዛ ማላ ዎና።

6ባ ዱሳሶ ሳሎ ኦዳይ፥

ሳሎካ ሳኣፔ ቦላን

ሚንዳይ፥

ኣባ ሃ ኣዛዚዲ

ቢታ ቦላ ጎጊሲዛይ

ኢዛስ ሱንይ ጎዳ።

7ጎዳይ፥ «ኢስራኤሌ ኣሳዉ!

ኢንቴ ታስ

ቶጵያ ኣሳ ማላ ጊዴኬቲ?

ታኒ ኢንቴና

ጊብጼፔ ኬሶይሳ

ፊሊስጼሜ ኣሳ ቃርጼሴፔ

ቃሴ ሶሪያ ኣስ

ቂሬፔ ኬሳቤኪና?

8ታኒ ኡባ ሃሪዛ ጎዳይ

ጌዴ ናጋራንቻ

ኢስራኤሌ ኣሳ

ካዎቴኮ ጼላይስ፤

ታ ኢዛ ቢታፌ ሙሌራ ይሳና፤

ጊዶ ኣቲን ያቆቤ ዜሬ

ኡባ ይሲኬ» ጌስ።

9«ቤኢቴ ካ

ዛይዛሬን ዛይዛሪዛ ማላ

ኢስራኤሌ ኣሳ

ኣይዛቤ ካዎቴ

ጊዶን ዛይዛራና ማላ

ታ ኣዛዛና፤

ጊዶ ኣቲን ኢስታፌ ኢሳዴይካ

ዎራ ዎ ዬና።

10‹ኑ ቦላ ኣይኮ ኢታይካ ጋኬና

ዎይኮ ኑና ቦቼና› ጊዛ

ታ ዴሬ ኣሳ ጋርሳን ዲዛ

ናጋራንቻቲ ኡባይ

ኦላን ሃይቃና» ጌስ ጎዳይ።

ኢስራኤሌ ኣሳ ሲሞ ሂዶታ

11«ጮ ኩንዲ ላሌቲዳ ኬ ማላ ጊዲዳ

ዳዊቴ ዜሬታ ካዎቴስ

ታኒ ዛራ ኤሳና ዎዴይ ያና፤

ታኒ ጊምቤዛ ዛራ ጊምባና፤

ላሌቲዳይሳካ ኦራጺሳና፤

ካሴይሳ ዛራ ኦና።

12ሄሳካ ኤዶሜ ዴሬን

ኣቲዳይታኔ

ታ ሱንን ጼይጌቲዳ ዴሬታ

ኡባ ኢስቲ ላታና»

ጌስ ጎዳይ።1

13«ካ ማጺዛይቲ ማጺ ዉርሶንታ

ዲሺን ጎሻ ዎዴይ ጋኬስ፤

ዎይኔ ኣይፌ ጉምኢዛዴይ

ጉምኢ ጊጎንታ ዲሺን

ዎይኔ ፑቴ

ቶኪዛ ዎዴይ ጋኬስ፤

ሄ ዎዴ ማልኢዛ ሎኦ ዎይኔ

ኡሺ ዙማፔ ፑልታና፤

ዙምቡላታፔካ ጎጋና።

14ዲኤቲ ቢዳ ኢስራኤሌ ኣሳ

ሃ ኢስታ ዴሬ ዛራ ኤሃና፤

ላሌቲዳ ካታማታ ዛሪ

ኬጺዲ ኢዛን ዴኣና፤

ኢስቲ ዎይኔ ቶኪዲ

ኢዛፔ ኣጌቲዳ ኡሹ ኡያና፤

ዱማ ዱማ ኣይፊዛ ሚ

ቶኪዲ ኢዛ ኣይፌ ማና።

15ታ ዴሬ ኢስራኤሌ ኣሳ

ታኒ ካሴ ኢስታ ቢታን

ዛራዳ ቶካና፤

ታኒ ኢስታስ ኢሚዳ ቢታፌ

ኢስቲ ናምኣን ቃሌቲ

ዬቴና»

ጌስ ጎዳይ ሳሎ ጾሳይ።