Gamit Bible
1 થેસ્સાલોનિકીઓને પત્ર 5:16
Verse 16 is marked below, with the whole chapter around it. Read from the start
પ્રભુવા પાછા યેયનાહાટી તિયાર રોઅના
ઓ વિસ્વાસી બાહાહાય, પ્રભુ ઈસુ પાછા યેઅના બારામાય તુમહાન લોખના ગોરાજ નાંય હેય. કાહાકા તુમહાન પુરી ખોબાર હેય, કા જેહેકેન બાંડ રાતી યેહે, તેહેકેન પ્રભુ ઈસુ પાછા યેઅના દિહી અચાનક ઓઅરી. જોવે માઅહે આખતેહે કા આમી બોદા હારાં હેય, આમી દાક નાંય, તોવે અચાનક, ચ્યે મોઠા દુઃખા અનુભવ કોઅરી, ઈ ઓલા જલદ્યાજ ઓઅરી કા જેહેકેન અચાનક મોયનાવાળી થેએયે બુકામાય દુખતા મુંડહે, એને ચ્યા લોક ચ્યા મોઠા દુઃખામાઅને બોચી નાંય હોકી.
બાકી, ઓ વિસ્વાસી બાહાહાય, તુમા યે વાતે બારામાય તે આંદારામાય નાંય હેય, કા પ્રભુ ઈસુ પાછા યેયના દિહી, તુમહેપાય જેહેકેન બાંડ અચાનક યેહે તેહેકેન યેય જાય એને યાથી તુમા ચમકાય નાંય જાતા. કાહાકા તુમા બોદા ઉજવાડા લોક એને દિહયા લોક હેતા, આપા રાતી લોક નાંય એને આંદારાવાળા લોક નાંય હેજે. યાહાટી આપહાન તિયારી વોગાર લોકહા હારકા હુતલા નાંય રા જોજે, બાકી ચ્યા યેઅના વાટ જોવીન તિયારીમાય એને હાચવીન રોજા. કાહાકા જ્યેં માઅહે હૂવી જાતહેં ચ્યે રાતી હૂવી જાતહેં એને જ્યેં દારવા પીયને સાકલે ઓઅતેહે ચ્યે બી રાતી ઓઅતેહે.
બાકી આપા જ્યા દિહયા હેય, બોરહો એને પ્રેમા યોક જીલમા હારકા હેય ચ્યાલ પોવીલા જીં બચાવેહે એને તારણા આશા ટોપ પોવીન હાચવીન રા. કાહાકા પોરમેહેરાય આપહાન સજા બોગવાહાટી નાંય, બાકી ચ્યાય આપહાન પ્રભુ ઈસુ ખ્રિસ્તા કોઇન તારણ મિળવાહાટી નિવડ્યેહે. ઈસુ ખ્રિસ્ત આપહેહાટી યાહાટી મોઅઇ ગીયો, યાહાટી આમા જો જીવતા હેય યા મોઅઇ ગીયા ચ્યાઆરે કાયામ લોગુ જીવન વિતાવજે. ચ્યાહાટી તુમા યોકબિજાલ દિલાસો દા, એને બોરહામાય યોકાબીજાલ મજબુત કોઆ, જેહેકેન તુમા કોઅય બી રીયહા.
મંડળી લોકહાન ઉપદેશ
ઓ વિસ્વાસી બાહાહાય, આમા તુમહાન વિનાંતી કોઅજેહે, કા જ્યા તુમહેહાટી બોજ મેઅનાત કોઅતાહા, એને પ્રભુમાંય તુમહે આગેવાન હેય, એને તુમહાન માર્ગદર્શન કોઅતાહા, ચ્યાહાન માન દા. જીં કાય ચ્યા તુમહેહાટી કોઅતાહા, ચ્યા લીદે ચ્યાહા બોજ આદર કોઆ એને ચ્યાહાન બોજ પ્રેમ કોઆ, એને યોકાબીજા આરે શાંતિથી રા. ઓ વિસ્વાસી બાહાહાય, આમા તુમહાન વિનાંતી કોઅજેહે, કા જ્યેં આળહયે હેય ચ્યાહાન ચેતાવણી દા, જ્યેં બીખર્યે હેય ચ્યાહાન ઈંમાત દા, જ્યેં નોબળે હેય ચ્યાહાન મોદાત કોઆ, એને બોદહાઆરે ધીરજથી રા.
દિયાન દા કા કાદે તુમહેઆરે ખોટાં કોઅયા ઓરી, તો ચ્યા બોદલામાય ચ્યા ખોટાં નાંય કોઅના, બાકી તુમા સાદા વિસ્વાસી લોકહા એને બોદહાહાટી હારાં કામ કોઅરાહાટી કોશિશ કોઆ. સાદા આનંદામાય રોજા. પ્રાર્થના કોઅનામાય લાગલા રોજા. બોદી પરિસ્થીતીમાય પોરમેહેરા ધન્યવાદ કોઆ, કાહાકા તુમહેહાટી ઈસુ ખ્રિસ્તામાય ઈંજ પોરમેહેરા મોરજી હેય.
લોકહા જીવનામાય કામ કોઅરાહાટી પવિત્ર આત્મા કામાલ મા રોકહા. ભવિષ્યવાણ્યેહે નાકાર મા કોઅહા. બોદી વાતહે ખાત્રી કોઆ, કા ઈ પોરમેહેરાપાઅને હેય કા નાંય, જીં હારાં હેય તી માના એને ચ્યા પાલન કોઆ. બોદી જાતી ખારાબી પાઅને દુઉ રોજા.
બોરકાત
શાંતી દેનારો પોરમેહેર ખુદ તુમહાન પુરીરીતે પવિત્ર બોનાવી દેય, તુમહે આત્મા એને જીવ એને શરીર આપહે પ્રભુ ઈસુ ખ્રિસ્ત પાછો યી તોદિહી લોગુ નિર્દોષ રોય. તુમહાન નિવડી લેનારો પોરમેહેર બોરહાવાળો હેય, એને તો એહેકેનુજ કોઅરી.
ઓ વિસ્વાસી બાહાહાય, આમહેહાટી બી પ્રાર્થના કોઆ. બોદા વિસ્વાસી બાહહાન પવિત્ર સલામ કોઆ. આંય તુમહાન પ્રભુમાંય ઓધિકારકોય આગના દેતહાવ કા ઈ પત્ર બોદા વિસ્વાસી બાહહાન વાચીન વોનાડલા જાં જોજે.
આમહે પ્રભુ ઈસુ ખ્રિસ્તા સદા મોયા તુમા બોદહાઆરે ઓઅતી રોય.
Gamit Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.