Skip to content
BibleKenya

Gamit Bible

2 થેસ્સાલોનિકીઓને 1

સલામ

પાઉલ એને સિલવાનુસ એને તિમોથી આમા ઈ પત્ર થેસ્સાલોનિક મંડળીલ લોખજેહે, જો આમહે પોરમેહેર આબા એને પ્રભુ ઈસુ ખ્રિસ્તામાય હેય.

ન્યાયા દિહી

આમહે પોરમેહેર આબો એને પ્રભુ ઈસુ ખ્રિસ્ત તુમહાવોય સદા મોયા કોએ એને તુમહાન શાંતી દેય.

ઓ વિસ્વાસી બાહાહાય, આમહાન તુમહે લેદે સાદા પોરમેહેરા ધન્યવાદ બોદા સમાયે કોઅરા જોજે, એને એહેકેન કોઅના આમહેહાટી હારાં હેય, કાહાકા ઈસુ ખ્રિસ્તાવોય તુમહે બોરહો બોજ વોદી રિઅલો હેય, એને તુમા યોક બિજાવોય બોજ પ્રેમ કોઅતાહા. યાહાટી આમા પોતે પોરમેહેરાવોય બોરહો કોઅનારા વિસ્વાસી લોકહા મંડળીમાય તુમહે બારામાય વાહવા કોઅજેહે, કાહાકા તુમા બોજ બોદી સતાવણી એને મુશ્કેલીમાઅને જાતહેં, તેરુંબી તુમા ઈંમાત રાખીન ચ્યાલ સહન કોઅતેહે, એને તુમા આમીબી ઈસુ ખ્રિસ્તાવોય બોરહો કોઅતેહે. ઈ પોરમેહેરા હાચ્ચાં ન્યાયા નિશાણી હેય, કા તુમા પોરમેહેરા રાજ્યાહાટી લાયકે બોના, જ્યાહાટી તુમા ઈ દુઃખ વેઠી રીયહા.

કાહાકા પોરમેહેર સાદા હાચ્ચો ન્યાય કોઅહે, તો ચ્યાહાન યા બોદલો વાળી, જ્યેં માઅહે તુમહાન આબદા પાડતેહે. એને તુમહાન, જ્યેં દુઃખ વેઠી રીયહે આમહે આરે આરામ દી, ઈ તોવે ઓઅરી જોવે પ્રભુ ઈસુ ચ્યા સામર્થી હોરગા દૂતહા આરે, હોરગામાઅને યેઅરી એને તો આગડા જાળેકોય ગેરાલો રોય. એને જ્યેં માઅહે પોરમેહેરાલ નાંય જાંએત, એને આપહે પ્રભુ ઈસુ ખ્રિસ્તા હારી ખોબારેવોય બોરહો નાંય કોએત, તો ચ્યાહાન સજા દેઅરી.

ચ્યે સાદામાટે પ્રભુવા પાઅને આલાગ ઓઅય જાય, ચ્યા મહિમા એને મહાન શક્તિ ભાગીદાર નાંય બોની, એને તો ચ્યાહાન અનંત વિનાશા સજા દેઅરી. યો વાતો તોદિહી ઓઅરી જોવે પ્રભુ ઈસુ ચ્યા બોદા પવિત્ર લોકહાપાઅને મહિમા પામા, પાછો યેઅરી, તુમાબી યા લોકહામાય સામીલ ઓઅહા, કાહાકા જીં તુમહાન આખલા આતા ચ્ચાવોય તુમહાય બોરહો કોઅલો હેય.

યાહાટી તુમહેહાટી આમા સાદા પ્રાર્થના કોઅજેહે કા આપહે પોરમેહેર તુમહાન તી કામ કોઅના લાયકે બોનાવે, જીં કામ કોઅરાહાટી તુમહાન હાદલા હેય, એને તુમહે બોદી હારી ઇચ્છા એને બોરહાકોય કોઅલે બોદે કામે ચ્યા સામર્થ્યાકોય પુરાં કોઅય દેય. આમા પ્રાર્થના કોઅતાહા યાહાટી આમહે પ્રભુ ઈસુ ખ્રિસ્તા નાંવ તુમહેકોય મહિમા પામે એને તુમા ચ્યાકોય આદર પામા, ઈ બોદા કાય આમહે પોરમેહેર એને ઈસુ ખ્રિસ્તા સદા મોયાકોય ઓઅરી.

Gamit Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.