Matius 4

O Yesus gena o Iblis widahake iwibaja

(Markus 1:12-13, Lukas 4:1-13)

1Ḋaboloku de o Gikimoi Awi Gurumi magena o Yesus wingaho o tona ibobeleuka la o Iblis iwibaja la ma ngale o dorouku wisitura. 2O orasi magena o Yesus gena ma deka o putu moruha de o wange moruha wooḋowa de woudowa, so ḋabolo Una wisapika.

3So kagena de o Iblis yahino de iwibaja itemo Unaka, <<Ngona gena igogou o Gikimoi Awi Ngopa. So hika o bi teto manena nasulo la imadadi o roti la aku naoḋo.>>

4Duma Una wosango wotemo, <<Kanaga o Gikimoi Awi Jaji ma Bukuka isilefoka, <Nako o bi nyawa gena upa ka cawali o ino so ioho, duma ka cawali o Gikimoi Awi demo la yasigise de yaaka.> >>

5Kagena ḋabolo de o Iblis o Yesus iwingaholi o Yerusalemka, eko o kota ḋatetebika, de iwihado kadaku o Gikimoi Awi Tahu ma ponaka, 6de itemo Unaka, <<Igogou! Ngona o Gikimoi ma Ngopa. Hika kagena de kudahu nomatura, sababu o Gikimoi Awi Jaji ma Bukuka isilefoka,

<Ma ngale Ngona gena Una asa Awi malaikat wapareta,

la ona magena asa inigubare,

ma ngale Ani ḋohu lo o tetoku upa yadahe.> >>

7So o Yesus wosango wotemo, <<Kanagasi o Bukuka isilefoli komanena, <Ani Jou Gikimoi gena upa nowidahake.> >>

8Kagena de o Iblis iwingaho kali o tala moi ikukuru-kuruye, so ma ḋokuka de wisikelelo o dunia ma bi bangsa ḋangodu ma loha de ma kaya Unaka, 9de itemo, <<O moi-moi ḋangodu manena asa tonihike Ngonaka, hitilahi nobukuku de nosuba ngohika.>>

10Magena de o Yesus wotemo, <<Hiwa, Iblis! Ngosoku ma deda noloḋa. Sababu kanaga o Bukuka isilefoka, <Bilasu nowisuba nanga Jou Gikimoika de cawali Una nowileleani.> >> 11Gila-gila o Iblis magena iloḋa so o Yesus widongosaku, de imatodoka o bi malaikat yahino so asa Una iwileleanika.

O Yesus Awi manara

wasolano o Galileaka

(Markus 1:14-15, Lukas 4:14-15)

12Ma orasi magena de o Yesus wogiise o Yohanes gena wibuika, so Una o Yudea ma daeraka de womasirese wokahika o Galilea ma tonaka. 13So o Nazaret ma doku wodongosa de wokahika o Zebulon de o Naftali ma daeraka o Galilea ma talaga ma dateka, so wogoge o Kapernaum ma dokuka. 14Komagena waaka sidago idadi de isiganapu o kia maro iḋomaka o Gikimoi Awi demo ma nabi Yesaya wosilefo ḋaboloka, ena gena,

15<<Ona o Yahudika ma nyawa de lo o Yahudika ma nyawa yasowo

la kanaga igogoge o Galilea ma tonaka o talaga ma dateka,

kagena o Yordan ma Selera ma sonongaka,

kiaka o Zebulon ma nyawa de lo o Naftali ma nyawa to ona manga tonaka.

16Iḋomaka ona magena o sakaputu ma rabaka ioho

de yamodo done ona dede o Gikimoi imakitingaka.

Duma o orasi manena o nita ma siwa ilalamo asa yakeleloka,

sababu igogou o wange moi ibaoka de yadisiwa onaka.>>

17Ma orasi magena de isikahino o Yesus wodoto wotemo, <<He! Nimatoba de nimatoduba la nia dorou niodongosa, sababu o Gikimoi wopareta maro o kolano moi gena he womasidiado.>>

Ma nonoma-nomaka o Yesus

o nyawa yaruha waaso la

idadi to Una Awi muri

(Markus 1:16-20, Lukas 5:1-11)

18So ma moiku o Yesus wotagi-tagi o Galilea ma Talaga ma dateka, de Una wamake o nyawa yasinoto o nao isasari, ona magena o Simon (iwisiaso lo o Petrus) de ma nongoru moi awi ronga o Andreas. Ona yasinoto o talaga ma dateno o nao yosoma. 19Kagena de o Yesus waaso de wotemo onaka, <<He! Hino la nimote Ngohi. Nako ngini gena Ngohi aku tinidoto ma ngale ngini o bi nyawa asa niadoto la imote Ngohika, imatero maro o nao niasoma la niatolomu.>> 20Gila-gila ona manga soma yodongosaka, so asa itagi Una iwimoteka.

21So kagena de Una wotagi wogila-gila, de wamake kali o nyawa yasinotoli ma ria de ma nongoru, ena o Yakobus de o Yohanes. Ona magena de manga baba o Zebedeus manga soma isidiahi o deru ma rabaka. De ona lo o Yesus waaso, 22so gila-gila ona manga baba de manga deru yodongosa de asa Una iwimoteka.

O Yesus o nyawa wadoto de yasisiri wasiloha

(Lukas 6:17-19)

23Ḋabolo de o Yesus o Galilea ma bi doku wakiloli so wahika manga puji ma bi tahuka wodoto de o habari ḋaloloha wosihabari ma ngale o Gikimoi asa wopareta. De lo o nyawa yasisiri de yopopanyake gena yangodu wasiloha. 24Mutuwade o habari ma ngale o Yesus gena o bi nyawa yogiise de yanako sidago o bi doku o Siria ma daera ma sigilolino, so o nyawa yadadala yahino Unano. O nyawa ona magena yangaho o nyawa yasisiri yadala moi-moi de manga panyake imaketerowa. O nyawa ona magena kanaga manga siri isangisara poli, yakokitoka, yamumusu de lo manga rohe isosone yangodu ona magena Una wasilohaka. 25Sidago lo o nyawa yadala icarawa gena ka ituo-tuo Una wimote-mote. Ona magena o Galilea ma tonano, o Doku Mogiowo ma daerano, o Yerusalemno, o Yudea ma daerano de lo o Yordan ma Selera ma sonongano.