Matius

O Yesus Kristus Awi Jarita

O Matius walefo

O Singangasu ma Demo

Ngaroko, o Yesus womasingopa gena o Yahudika ma nyawano, de wooho sidago lo wilamo gena Awi oḋo de Awi udo maro ka o Yahudika ma nyawa moi. Sababu o Yesus gena upa lo potemo cawali ma meta ka o Yahudika ma nyawa bato, duma ma ngale lo o bi nyawa yangodu o dunia ma ḋokuka.

Matius awi buku ma rabaka walelefo gena wafara de wafato ḋaloha. So wosolano de o Yesus Awi sibuo ma jarita, kagena asa Una lo wiosi. Ḋabolo de o Iblis iwidahake ma ngale wisitura. Kanagali Awi manara o Galilea ma Tonaka o bi nyawa waleleanika, so kagena Una wodoto sidago lo o nyawa yasisiri eko yopopanyake wasiloha.

Kanaga lo walefo wonasingangasu o Yesus Awi dodagi o Galilea ma Tonaka de sidago lo waado o Yerusalemka, de o bi moi-moi idadadi to Una Awi oho ma rabaka. De komagena lo o sangisara ḋatotubuso wamoku-moku o nahadi ma dodoguka ma wange sidago lo wisangisara de wisidasangahadi ma bati wosone, duma wooho kali.

Nakoso o Matius awi mamalo, de to Una Awi oho ma rabaka kanaga o hali moi foloisi iḋoku, ena gena o Yesus Una magena igogou o Guru wilalamo moi. So aku Una wonadoto ngoneka, igogou o Gikimoi wonapareta maro o kolano moi, de o Yesus lo Awi kuasa gena ifoloi so ngone o nyawaka aku wonadoto itiai ma ngale o Gikimoi Awi bobita ma nabi Musa walelefoka gena. O Yesus Awi dodoto ngoneka gena idala so kanaga o Matius wapolu de wafara so waaka o bolumoi-bolumoi la idadi o dodoto ma bolu ilalamo gena ngai motohaka.

(1)

(2)

(3)

(4)

(5)