परमेश्वरन सत्य वचन
फिलिप्पियो 4
अतरान करीन हे मारा मोंगावु भाईस्यो, जिनमा मारो जीव लागी रोवतो छे, जी मारी खुशी आरू मुकूट होय, हे मोंगावु भाईस्यो, पोरबु मा इन प्रकार स्थिर रयो।
व्यावहारिक निर्देश
हाव यूओदिया क भी समझाता छे आरू सुन्तुखेन भी, कि वो पोरबु मा एक मन रयो। हे सच सहकर्मी, हाव तुखे छे भी रावन्या करता छे कि तु तीनु बायरन मदत कर, काहकि चे मारे खुश खबर पुगाने मा, क्लेमेंस आरू मारा दिसरा सहकर्मियो सहावत मेहनत कर्या, जिन्दरो नाव जीवनन किताब मा लिखलो छे।
पोरबु मा हहावशा खुश रवु; हाव पछु कयता छे, खुश रवु।
तुमरी कोमलता सब मानसे पर प्रगट होय। पोरबु निकट छे। काही भी वातन चिंता मा करू; पुन हर एक वात मा तुमरो निवेदन, प्रार्थना आरू रावन्यान द्वारा धन्यवादन साथे यहोवा–भगवानन सम्मुख हजुर होयती जाय। तव यहोवा–भगवानन शांती जो सारी समझ छे बाहर छे, तुमरे दिल आरू तुमरो विचारन मसीह ईशु मा सोरक्षित राखछे।
अतरान करीन हे भाईस्यो, जी जी वात सच्चाई छे, आरू जी जी वात विजुत बढ़े छे, आरू जी जी वात न्यायी छे, आरू जी जी वात चुखलो छे, आरू जी जी वात मनभावनी छे, मतलब जो भी सद्गुण आरू वाहवाय की वात छे तीनु पर ध्यान लागाड़ ्या करू। जी वात तुमू ने मखे छे सिकली, आरू मान्य करी, आरू सोमवी, आरू मखे मा देख, तीन्दरो पालन कर्या करू, तव यहोवा–भगवान जी शांतीन आपे छे जु हामरे साथे रोवसे।
दानन करीन धन्यावद
हाव पोरबु मा घोणा खुशी छे कि हिमी ओतरा दाहड़ान बाद तुमरी चिंता मारे विषय मा पछु जागृत होयी; छाचो तुमू शुरू मा भी ऐरो विचार होतो, पर तुमू मेखे नी मिव्यो। यो नी कि हाव आपसी घटीन कारण यो कयतो छे; काहकि हाव ने यो सिक्यो छे कि जिन दशा मा छे; ओको मा सन्तोष करू। हाव दीन भी होयनो जानतु छे आरू बढ़ने भी जानतु छे; हर एक वात आरू सब दशा मा हाव ने तृप्त हुयने, भूकलो रोवने, आरू वदने घटने सिक्यो छे। जो मखे शक्ति देतो छे तीनामा हाव सब काही कर सकतो छे।
तवभी तुमू ने भला कर्या कि मारो पीड़ा मा मारो भागीदार हुयो। फिलिप्पियो, तुमू आप भी जानता होय कि खुश खबर खबरन शुरू मा, जव हाव मकिदुनिया छे विदा हुयो, तव तुमू छुड़ आरू काही मंडळी ने लेना देनान विषय मा मारी मदत नी करी। इनीये प्रकार जव हाव थिस्सलुनीके मा होतो, तव भी तुमू ने मारी घटी पूरी करनेन करता एक बार काय वरना दुय बार काही मुकल्या हुता। यो नी कि हाव दान आपने जूवतो छे पुन हाव ओसो फोव आपने जूवतो छे जो तुमरो लाभन करता बढ़तो जाय। मारे साथे सब काही छे, वरना बहुतायत छे भी छे; जो चिज तुमू ने इपफ्रुदीतुस हात छे मुकली होती तीनुक देखीन हाव तृप्त होय गयो छे, वो तो सुखदायक सुगन्ध, मान्य करने योग्य बलिदान छे, जो यहोवा–भगवानन भाता छे। मारो यहोवा–भगवान भी आपसा तिना धनन लारे जो महिमा सहित मसीह ईशु मा छे, तुमरी हर एक कमी घटीक पूरी करसे। हामरा यहोवा–भगवान आरू बासन महिमा युगानयुग हयती रवे। आमेन।
आखरी नमस्कार
हर एक चुखलो जनन, जो ईशु मसीह मा छे नमस्कार कयो। जो भाईस मारे साथे छे, तुमू नमस्कार कयता छे। सब चुखलो मानछे, विशेष करीन जो कैसरन घरानान छे, तुमूक नमस्कार कयता छे।
हामरा पोरबु ईशु मसीहन फोकटन दया तुमरी आत्मान साथे रोवे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.