योहोसु 20

शरण नगरक ठरायो जानु

11

पछु योहोवा योहोसु सी कयो, 2“इसराएलीया सी यो कयो, ‘हाव मुसाक द्वारा तुमु सी शरण नगरक जी चर्चान हती ओकान अनसारे ओकाह ठराव लेवु, 3जेका सी कुई ओसोज बिना समझ जाने काहनाक म्हार न्हाख्या, चु ओकाम रईन काहना मा डास जासे; एरकरता चा शरण नगर खुनक पलटाव लेनेवाळा सी वाचने करता तुमरा चरणस्थान ठरसे। 4चु उना नगर मा सी काहनु डास जासे, आरु उका नगरक फाटक मा सी उबा होईन ओकान डाहलाक आपनो मुकद्दमु कय सोमवाळे; आरु चा ओकाह आपना नगर मा आपने जु टिकाळ ले, आरु उकाह कुई स्थान आपे, जेकामा उनाक साथ रवे। 5आरु कदाम खुनक पलटाव लेनेवळा ओकान पीछा करे, ते चा यो जानीन ओको आपना साथेवावा बिना जानेक, आरु पेहले ओका सी बैर मेकीन देदो, ओकाह खुनीक ओकान हाथ मा आप। 6आरु जव तक ची मण्डलीक सामने न्यायक करता उबो नी होसे, आरु जव तक उना दाहड़ाक महानायक नी मर जासे, तव तक चो उके नगर मा रया; ओकान बाद चु खुनी आपना नगरक वापस आवीन जेका सी चो भाग आयो होसे आपना घर मा पछा रयने लाग्या।’”

7अत: हेका नप्तालीन पहाड़ी देश मा गलीलक केदेश, आरु एपरेमन पहाड़ी देश मा शेकेमक, आरु यहुदाक पहाड़ी देश मा किरयतरबा, जो हेब्रोन भी कयाड़तो छे, आसरान पवित्र जागो बनीयो। 8आरु योरीहोक जु यरदनन पुर्व तरफ हेका रुबेनक गोत्राक भाग मा बेसेरक, जंगल मा चोरस धरती पर बठला छे, आरु गादक गोत्राक भाग मा गिलाद रामोतन, आरु मनश्शेन गोत्राक भाग मा बासान गोलानक ठराया। 9सब इसराएलीयान करता, आरु उकान वीचमा रयनेवाळा परदेशीयान करता भी, जो नगर इना मनसा सी ठराया गया कि जु कुई काहना प्राणी क विसराए म्हार न्हाखे चा ओका मा सी काहना मा डास जासे, आरु जव तक न्यायन करता मण्डलीन सामने उबा नी होसे, तव तक खुनक पलटाव लेनेवाळा ओका म्हार न्हाखनु नी जुवे, चा याज छे।