परमेश्वरन सत्य वचन
योहोसु 19
शिमोनक गोत्राक आप्यो गयो भाग
दिसरी चिट्ठी शिमोनन नाव पर, मतलब शिमोनियाक कुलक अनसारे ओकान गोत्राक नाव पर निकळी; आरु ओकान भाग यहुदियाक भागन वीच मा ठरे 1 ओकान भाग मा या नगर छे, मतलब बेरसेबा, शेबा, मोलादा, हसर्शआल, बाला, एसेम, एलतोलद, बतुल होर्मा, सिकलग, बेत्मर्काबोत, हसर्शुसा, बेतलबाओत, आरु शारुहेन; या तेरा नगर आरु ओका गाव हेका जोड़े। फिर ऐन, रिम्मोन, एतेर, आरु आशान, या चार नगर गाव समेत; आरु बालत्बेर जु दक्खिन देशक रामा भी कयाड़तो छे, चा तक इना नगर चार तरफ सब गाव भी हेका जोड्या। शिमोनियाक गोत्राक भाग उनाक कुलक अनसारे यी ठरी। शिमानियाक भाग ते यहुदियाक अंश मा सी आप्या गयो; काहकी यहुदियाक भाग ओकान करता बैस हतो, ओका शिमोनियाक भाग हेका भागक वीच मा ठर्यो।
जबुलुनन गोत्राक आप्यो गयो भाग
तीसरी चिट्ठी जबुलुनियाक कुलक अनसारे ओकान नाव पर निकळी। आरु ओकान भागक सीमा सारीद तक पुगी; आरु ओकान सीमा पश्चिम तरफ मरलाक चढ़ीन दब्बेशेतक पुगी, आरु योकनामक सामनेन नदी तक पुग गई; पछा सारीद सी चा उगवनी वोगे तरफ फिरीन किसलोत्ताबोरक सीमा तक पुगी, आरु चा रईन जाता जाता दाबरत मा निकळी आरु यापीक तरफ जाय निकळी; चा रईन चु उगवनी वोगेन तरफ ओगव जाईन गथेपेर आरु इत्कासीनक गई, आरु ओका रिम्मोन मा निकळी जो नेआ तक पसर्यो छे; चा सी चु सीमा ओकान उत्तर तरफ सी फिरीन हन्नातोन पर पुगी; आरु यिप्तहेलक तराई मा जाय निकळी; कत्तात, नहलाल, शिम्रोन, यिदला, आरु बैतलहम; या बारा नगर ओकान गाव समेत ओका भागक ठर्या। जबुलुनियाक भाग ओकान कुलक अनसारे यो ठहरे; आरु ओकामा आपना आपना गाव समेत यो नगर छे।
इस्साकारक गोत्राक आप्यो गयो भाग
चोथी चिट्ठी इस्साकारियोक कुलक अनसारे ओकान नाव पर निकळी। आरु ओकान सीमा यिज्रेल, कसुल्लोत, शुनेम, हपारेम, शीओन, अनाहरत, रब्बीत, किश्योन, एबेस, रेमत, एनगन्नीम, एनहद्दा, आरु बेत्पस्सेस तक पुगी। पछु ची सीमा ताबोर, शहसुमा आरु बेतशेमेश तक पुगी, आरु ओकान सीमा यरदन नदी पर जाय निकळी; ओका प्रकारन ओकाह सोलह नहर आपना आपना गाव समेत जोड़ी। कुलक अनसारे इस्साकारियाक गोत्राक भाग नगर आरु समेत यी ठरी।
आशेरक गोत्राक आप्यो गयो भाग
पाचवी चिट्ठी आशेरियोक गोत्राक कुलक अनसारे ओकान नाव पर निकळी। ओकान सीमा मा हेल्कात, हली, बेतेन, अक्षाप, अलाम्मेल्लेक, अमाद, आरु मिशाल हता; आरु ची पश्चिम तरफ कार्मेल तक आरु शीहोर्लिब्नात तक पुगी; पछी ची उगवनी वोगे तरफ फिरीन बेतदागोनक गई, आरु जबुलुनक भाग तक, आरु यिप्तहेलक तराई सी उत्तर तरफ होईन बेतेमेक आरु नीएल तक पुगी; आरु उत्तर तरफ जाईन काबुल पर निकळी, आरु चु एब्रोन, रहोब, हम्मोन, आरु काना सी होईन मोटला सीदोनक पुगी; चा रईन ची सीमा फिरीन रामा सी होयता सोर2 नावन गढ़वाळा नगरतक जात रई; पछी सीमा होसाक तरफ फिरीन आरु अकजीनक जु देश मा होईन दरिया पर निकळी, महलेब उम्मा, अपेक, आरु रहोब भी ओकान भाग मा ठर्या; ओका प्रकार बाईस नगर आपना आपना गाव समेत ओकाह जोड्या। कुलक अनसारे आशेरियाक गोत्राक भाग नगर आरु समेत यी ठर्यो।
नप्तालीक गोत्राक आप्यो गयो भाग
छटवी चिट्ठी नप्तालियाक कुलक अनसारे ओकान नाव पर निकळी। आरु ओकान सीमा हेलेप सी, आरु सानन्नीम वांज्यो झाड़का सी, अदामीनेकेब आरु यब्नेल सी होईन, आरु लक्कुम जाईन यरदन पर निकळी; चा रईन ची सीमा पश्चिम तरफ फिरीन अजनोत्ताबोर गई, आरु चा सी हुक्कोक गई, आरु दोखेवरे, आरु जबुलुनक भाग तक, आरु पश्चिम तरफ आशेरन भाग तक, आरु उगवनी तरफ यहुदान भागन जुन यरदन नदी पर पुगी। आरु ओकान गढ़वाळा नगर या छे, मतलब सिद्दीम, सेर, हम्मत, रक्कत, किन्नेरेत, अदामा, रामा, हासोर, केदेश, एद्रेई, एन्हासोर, यिरोन, मिगदलेल, होरेम, बेतनात, आरु बेतशेमेश; या उन्नीस नगर गाव समेत ओकाह जोड्या। कुलक अनसारे नप्तालियाक गोत्राक भाग नगर आरु ओकान गाव समेत यी ठरी।
दानन गोत्राक आप्या गयो भाग
सातवी चिट्ठी कुलक अनसारे दानियाक गोत्राक नाव पर निकळी। आरु ओकान भागन सीमा मा सोरा, एशताओल, ईरशेमेश, शालब्बीन, अय्यालोन, यितला, एलोन, तिम्ना, एक्रोन, एलतके, गिब्बतोन, बालात, यहुदा, बनेबराक, गत्रिम्मोन, मेयर्कोन, आरु रक्कोन ठहरे, आरु याफा क सामनेन सीमा उकान हती। आरु दानियोक भाग ओका सी जास्ती होय गया, मतलब दानी लेशेम पर चढ़ीन ओका सी लढ़े, आरु उका लीन तलवार सी म्हार न्हाख्यो, आरु ओकाह आपनो हक मा करीन ओकामा बठ गया, आरु आपना महापुरुषक नाव पर लेशेमक नाव दान मेक्या। कुलक अनसारे दानियोक गोत्राक भाग नगर आरु गाव समेत यी ठहरे।
योहोसुक भी जमीनन भाग जोड्यो
जव देशन वाटनु सीमान अनसारे पुरो होय गयो, तव इसराएलीया नुनक पोर्यो योहोसुक भी आपना वीचमा एक भाग आप्यो। योहोवान कयनर क अनसारे हेका ओकाक उकान मांगलोचो नगर आपला, यो एपरेमक पहाड़ी देश माहयलो तिम्नत्सेरह छे; आरु चो उका नगरक बठाड़ीन रयने लाग्यो।
जु जु भाग एलीयाजर याजक, आरु नुनक पोर्यो योहोसु, आरु इसराएलीयाक गोत्राक घरानान पुर्वजन मुखी मुखी मानसे शीलो मा, मिलापवाळा तम्बु क झोपला पर, योहोवाक सामने चिट्ठी न्हखिन वाट देदा चा याज छे। ओका प्रकार हेकान देश वाटनेन काम पुरो कर्या।
Source notes (2)
- Cross-reference 1 इतिहास 4:28-33
- Footnote सोर तीरस
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.