परमेश्वरन सत्य वचन
योहोसु 11
राजा याबीन आरु उकान मदत योहोसु द्वारा पराजित
यो सोमवीन हासोरक राजा याबीन मादोनक राजा योबाब, आरु शिम्रोन आरु अक्षाप राजाक, आरु जा जा राजा उत्तरक तरफ पहाड़ी देश मा. तरफ किन्नेरेत दोखेवरे अराबा मा, आरु नेड़ला देश मा, आरु पश्चिमक तरफ दोर क देश मा रयता हता, उनाक, आरु पुरब पश्चिम दोनो तरफन रयनेवाळा कनानियो, आरु एमोरियो, हित्तियो, परिज्जियो, आरु पहाड़ी यबुसियो, आरु मिस्पा देश मा हेर्मोन बोयड़ाक नेड़ा रयनेवाळा हिब्बीया क कय मुकल्यो। आरु चा आपनी आपनी सेना समेत, जा दरियाक धोड़ेन बालु क किनकाक समान बैस हती, भेवाईन निकळ आया, आरु उनाक साथ घण सवटा घुल्ला आरु घुड़ सवारी भी हुती। तव चा सब राजा सम्मति करिन एकठा होया, आरु इसराएलीया सी लड़नेक मेरोम नावन तालक जु आवीन एक संग छावनी न्हाखि।
तव योहोवा योहोसु सी कयो, उना सी मा बीहयु, काहकी काल इके टेमे उना सभाक इसराएलीया क वश मा करिन माराव न्हाखाड़ दिस; तव तु उनाक घुल्लान क माणडान माईन नस कटाड़जी, आरु हेनका घुड़सवारीयान क खतम कर देजी। आरु योहोसु सब योद्धा समेत मेरोम नावन तालक जु अचानक पुगीन उना पर टूट पड्या। आरु योहोवा उनाक इसराएलीया क हाथ मा कर देदा, एरकरता हेकाक हेका मार लेदा, आरु मोटला नगर मा सीदोन आरु मिसर पोतमैम तक, आरु पुर्वक तरफ मिस्पेक मैदान तक उनाक पछव कर्या; आरु ओकाक मार्या, आरु उनामा सी काहना क जीवता नी छुड़नु। तव योहोसु योहोवा क आदेश क अनसारे उना सी कर्या. मतलब उनाक गुल्लाक घुटनाक नस कटाड़ीया, आरु उनाक रथ आग्ठा मा धोपाड़ीन भस्म कर देदा।
उके टेमे योहोसु फिरीन हासोर क जा पेहेल उना सब राज्य मा मुखी हता ली लेदा, आरु उकान राजाक तलवार सी म्हार न्हाख्या। आरु जोतरा जनावरे ओकामा हता उन सभाक हेका तलवार सी मारीन सत्यनाश कर्या; आरु हासोर काजे योहुसु जनावर नी ओगव लागाड़ीन फुँकवा देदा। आरु उना सब नगरक उनाक सब राजा समेत योहोसु नी ली लेदा, आरु योहोवाक दास मुसान हुकुमोक अनसारे उनाक तलवार सी घात करिन सत्यनाश कर्या। पुन हासोरक छुड़ीन, जेको योहोसु आगठो लगाड़ीन धपाड़ दीदो, आरु इस्राएल कोय दिसरा नगर क जा टिला पर बनलो हुतो उको नी धोपाड्या। आरु इना नगर क जीव जनवारीयान क इनाक सब लुटक इसराएलीया आपना कर देदा; पुन मानसक हेका तलवार सी मार न्हाख्या, या तक उनाक सत्यनाश कर न्हाख्या कि एक भी जनावरक जीवता नी छुड्या गया। जो आदेश योहोवा आपना दास मुसाक आप देदी हती उकान अनसारे मुसु योहोवाक आदेश देदो हतो, आरु ठीक तोसाज योहोसु कर्यो भी; जो जो आदेश योहोवा मुसाक देदो हतो उनामा सी योहोसु कुई भी पुरी करे बिना नी छुड़ी।
योहोसुन लारे जीकला देश
तव योहोसु उका सब देशक, मतलब पहाड़ी देश, आरु सब दोखेवरे देश, आरु कुल गोशेन देश, आरु नेड़ला देश, अराबा, आरु इस्राएलक पहाड़ी देश, आरु उकान नेडलावाळा देशक, हालाक नावन पहाड़ सी ले, जो सेईर क चढ़ाई पर छे, बालगाद तक, जा लबानोन मैदान मा हेर्मोन बोयड़ान नेड़ा छे, जोतरा देश छे उना सबक जीत लेदा आरु उना देशक सब राजाक धरीन मार न्हाख्या। उना सब राजा सी युद्ध करता करता योहोसुक बैस दाहाड़ा लाग गया। गिबोनक निवासी हिब्बीयाक छुड़ आरु एकदा नगर क लोगहन इसराएलीया सी मेलमिलाप नी कर्या; आरु सब नगरक हेका लड़ लड़ीन जीत लेदा। 1 काहकी योहोवाक जी मनसा हती, कि आपनी उको हुकुमोन अनसारे जी ओको मुसाक आपी हती उना पर काहय भी दया नी करे, वरन् सत्यनाश कर न्हाखे, ओका कारण ओको उनाक मन ओसा वातड़ो कर देदा, कि हेका इसराएलीयाक सामना करिन उनाक युद्ध कर्या। उके टेमे योहोसु पहाड़ी देश मा आवीन हेब्रोन, दबीर, अनाब, वरन् यहुदा आरु इस्राएल दुयोक सब पहाड़ी देश मा रयनेवाळा अनाकिया क खतम कर्या; योहोसु नगर समेत उनाक सत्यनाश कर न्हाख्या। इसराएलीया क देश मा कुई अनाकी नी रय गया; केवल अज्जा, गत, आरु अशदोद मा कुई कुई रय गया। जोसो योहोवा मुसा सी कयो हतो, तोसोज योहोसु चा सब देश ली लेदा; आरु उका इस्राएलक गोत्रा आरु कुलोक अनसारे बाँट करिन हेका आप देदा। आरु देशक लड़ाई सी शान्ति जोड़ी।
Source notes (1)
- Cross-reference व्यवस्थाविवरण 7:16
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.