परमेश्वरन सत्य वचन
योहोसु 10
एमोरिया पर विजय
जव यरुशलेमन राजो अदोनीसेदेक सोमव्यु कि योहोसु ऐ कोक करता, आरु ओकान सत्यनाश कर न्हाख्या छे, आरु जोसो ओको योरीहो आरु ओकान राजा सी कर्या हता तोसाज ऐ आरु ओकान राजा सी भी कर्या छे, आरु यो भी सोमव्या कि गिबोनक निवासिया इसराएलीया सी मेल कर्या, आरु उनाक वीच मा रयने लाग्या छे, तव चा बैस बीह गया, काहकी गिबोन मोटलो नगर वरन् राजनगरक तुल्य आरु ऐ सी मोटलो हतो, आरु ओकान सब निवासी शुरवीर हता। एरकरता यरुशलेमक राजा अदोनीसेदेक हेब्रोनक राजो होहामक, यर्मुतक राजो पिराम, लाकीशक राजो यापी, आरु एग्लोनक राजो दबीरक जु यो कोय मोकल्यो: “मार जु आवीन मारी मदत करु, आरु चालु आपु गिबोनक मारु; काहकी ओको योहोसु आरु इसराएलीया सी मेल मिलाप कर लेदा छे।” एरकरता यरुशलेम, हेब्रोन, यर्मुत, लाकीश, आरु एग्लोनक पाँचो एमोरी राजा आपनी आपनी सब सेना एकठी करिन चढ़ाई कर देदा, आरु गिबोनक सामने डेरु न्हाखिन उका सी युद्ध कर पड्या।
तव गिबोनक रयनेवाळा गिलगालक छावनी मा योहोसुक जु यो कोय मुकल्यो, “आपना दासक तरफ सी तु आपनो हाथ नी हटावनु; जल्दी आमरे जु आवीन आमुक वाचाड़ ले, आरु आमरी मदत कर; काहकी बोयड़ा पर रयनेवाळा एमोरियाक सब राजा आमरे विरोध एकठा होया छे।” तव योहोसु सब योद्धा आरु सब शुरवीरक साथे लीन गिलगाल सी चाल पड्या आरु योहोवा योहोसु सी कयो, “उका सी मा बीहये, काहकी हाव उनाक तार हाथ मा कर देदा छे; उनामा सी एक मानुस भी तार सामने टिक नी सके।” तव योहोसु रातोरात गिलगाल सी जाईन एकाएक उना पर टूट पड्यो। तव योहोवा ओसो कर्या कि चा इसराएलीया सी घाबराय गया, आरु इसराएलीया गिबोनक जु उनाक मोटलो संहार कर्या, आरु बेथोरोनक चढ़ाव पर उनाक पछव करिन अजेका आरु मक्केदा तक उकाह देतो देतो गयो। पछा जव चा इसराएलीयाक सामने सी डासीन बेथोरोन की उतराई पर आयो, तव अजेका पुगता तक योहोवा आकाश सी मोटला मोटला दगड़ा करिन उनाक देदा, आरु चो मर गयो; जा ओलो सी मर गया उनाक गिनती इसराएलीयाक तलवार सी मरला होया सी जास्ती हती।
उके टेमे, मतलब जीन दाहड़े योहोवा भगवान एमोरियाक इसराएलीयाक वश मा कर देदा, उके दाहड़े योहोसु योहोवा सी इसराएलीयाक देखता ओका प्रकार कया, “हे सुर्य, तु गिबोन पर, आरु हे चाँदबाबा, तु अय्यालोनक तराईन ऊपर उबो रयो।” आरु सुर्य उके टेमे तक रुकायलो रयो, आरु चाँद भी उके टेमे तक उबो रयो, जव तक उका जातिक लोगहन आपना दुश्मन सी बदलु नी लेदा। काय यी वात याशार नावन किताब मा नी लिखला छे कि सुर्य आकाशमण्डल क वीचमा उबो रयो, आरु लगभग चार पहर तक नी डूबलो? नी ते ओकान पेहेल एकदु ओसलु दाहाडु आरु नी उकान बाद, जेका मा योहोवा काहना मानसन सोमवलो छे; काहकी योहोवा ते इस्राएलक तरफ सी लड़तो हतो।
तव योहोसु सब इसराएलीया समेत गिलगालक छावनीमा वापस गयो।
एमोरियाक पाच राजाक बन्दी बनावनु
चा पाच राजा डासीन मक्केदाक साथे वाळा गुफामा धोपाया। तव योहोसुक यो खबर जोड्यो, “पाचु राजा मक्केदाक साथे वाळा गुफामा धोपायला जोड्या छे।” योहोसु कयो, “गुफाक मुहय पर मोटला मोटला दगड़ा डुव्वीन उकान देखभाव क करता मानसक उकाम जु बठाड़ देवु; पुन तुमु मा उबा रयु, आपना दुश्मनक पछव पड़ीन उनामा सी जा जा पिछड़ी गया छे उनाक मार न्हाखु, एका आपना आपना नगर मा आवनेन टेमे मा आपु; काहकी तुमरु परमेश्वर योहोवा उनाक तुमरा हाथ मा कर देदा छे।” जव योहोसु आरु इसराएली उकान संहार करिन हेका खतम कर देदा, आरु उनामा सी जा वाच गया चा आपना आपना गढ़वाळा नगर मा बोराय गया, तव सब लोगहनक मक्केदाक छावनीक योहोसुक जु वारु आरगाय सी वापस आया; आरु इसराएलीयाक विरुद्ध कुई जीभ तक नी हालाड्या।
तव योहोसु आदेश देदु, “गुफान मुहय उगाड़ीन उना पाचो राजाक मार निकाड़ लावु।” हेका ओसाज कर्या, आरु यरुशलेम, हेब्रोन, यर्मुत, लाकीश, आरु एग्लोनक उना पाचु राजाक गुफा मा सी ओका जु निकाड़ आया। जव चा उना राजाक योहोसु इस्राएलक सब मानसक बुलावीन आपने साथे चालने वाळा योद्धाक प्रधान सी कया, “साथे आवीन आपना आपना पाये इना राजान भुचारा पर मेकु।” आरु हेका नाट जाईन आपना आपना पायक उनाक भुचारा पर मेक्या। तव योहोसु उनाक कयो, “बीहयु मा, आरु नी तुमरो मन कच्चो होए; हियाव बाँधीन पक्को होय; काहकी योहोवा तुमरा सब दुश्मन सी जिना सी तुमु लड़नेवाळा होसे ओसाज करसे।” ओका बाद योहोसु उनाक म्हार न्हाखाड्यो, आरु पाच झाड़का पर लटकाड़ देदा। आरु चा साँजु तक उनाक झाड़का पर लटकाड़ रया। दाहड़ु बुड़ता बुड़ता योहोसु सी आदेश लीन लोगहन नी हेका उना झाड़का पर सी उतारीन उका गुफा मा जा चा धोपाय गया हता न्हाख देदा, आरु उका गुफान मुहय पर मोटला मोटला दगड़ा मेक देदा, चा आज तक चा मेकला छे।
आरु जास्ती एमोरी राज्य पर विजय
उके दाहड़े योहोसु मक्केदाक ली लेदो, आरु ओकाह तलवार करिन म्हार देदो, आरु राजान सत्यनाश कर्यो; आरु जोतरा प्राणी ओकामा हता उना सभा मा सी काहनाक नी जीवता नी छुड्यो; आरु जोसो ओको योरीहोक राजान साथे कर्या हता तोसोज मक्केदाक राजा सी भी कर्या।
तव योहोसु सब इसराएलीया समेत मक्केदा सी चालीन लिब्नाक गया, आरु लिब्ना सी लड़ायो; आरु योहोवा उकाह भी राजा समेत इसराएलीया क हाथ मा कर देदा; आरु योहोसु उकाह आरु उकामा क सब जनावर क तलवार सी म्हार्या; आरु ओकामा सी काहना भी जीवता नी छुड्या; आरु ओकान राजा सी तोसोज कर्यो जोसो ओको योरीहो क राजाक साथे कर्या हता।
पछु योहोसु सब इसराएलीया समेत लिब्ना सी चालीन लाकीशक गयो, आरु ओकान विरुद्ध छावनी न्हाखिन लड्या; आरु योहोवा लाकीशक इस्राएलक हाथ मा कर देदा, आरु दिसरे दाहड़े ओको उकाह जीक लेदा; आरु जोसो ओको लिब्नाक सब जनावरक तलवार सी म्हार्या हता तोसाज ओको लाकीश सी भी कर्या।
तव गेजेरक राजा होराम लाकीशक मदत करिन चढ़ आया; आरु योहोसु प्रजा समेत ओकाह भी ओसा मारा क ओकान करता काहनाक नी छुड्या।
पछा योहोसु सब इसराएलीया समेत लाकीश सी चालीन एग्लोनक गया; आरु ओकान विरुद्ध छावनी न्हाखिन युद्ध करने लाग्या; आरु उके दाहड़े हेका उकाह ली लेदा, आरु ओकाह तलवार सी म्हार्या; आरु उके दाहड़े जोसो उकाह लाकीशक सब जनवारीयान क सत्यनाश कर न्हाख्या हता तोसोज उका एग्लोन सी भी कर्या।
पछा योहोसु सब इसराएलीया समेत एग्लोन सी चालीन हेब्रोनक गयो, आरु उका सी लड़ने लाग्या; आरु हेका उका ली लेदा, आरु ओकाह आरु ओका राजो आरु सब गावक आरु उनामा सब जनावर तोलवार सी म्हार्या; जोसो योहोसु एग्लोन सी कर्या हता तोसोज हेब्रोन मा भी काहनाक जीवता नी छुड्या; उको ओकाह आरु उकामा सब जीव जनवार क सत्यनाश कर न्हाख्या।
तव योहोसु सब इसराएलीया समेत फिरीन दबीरक गया, आरु उकाह लड़ने लाग्या; आरु राजा समेत उका आरु सब गावक ली लेदा; आरु हेका उनाक तलवार सी घात कर्या, आरु जोतरा जनावर उनामा हता सबन सत्यनाश कर न्हाख्या; काहना क जीवता नी छुड्या, जोसु योहोसु हेब्रोन आरु लिब्ना आरु ओकान राजा सी कर्या हता तोसोज ओका दबीर आरु ओकाह राजा सी भी कर्या।
ओका प्रकार योहोसु उका सब देशक, मतलब पहाड़ी देश, दोखेवरे देश, नेड़ला देश, आरु ढालु देशक, उनाक सब राजा समेत म्हार्या; आरु इस्राएलक परमेश्वर योहोवाक हुकुमोक अनसारे एकाह भी जीवता नी छुड्या, वरन् जोतरा जनावर हता सभाक सत्यनाश कर न्हाख्या। आरु योहोसु कादेशबर्ने सी ली ले अज्जा तक, आरु गिबोन तक सब गोशेन देशक लोगहनक म्हार्यो। इना सब राजाक उनाक देशो समेत योहोसु एकुज टेमे मा ली लेदा, काहकी इस्राएलक परमेश्वर योहोवा इसराएलीयाक तरफ सी लड़ता हता। तव योहोसु सब इसराएलीया समेत गिलगालक छावनी मा वापस आयो।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.