उत्पत्ति 42

याकुब का आपसा पुर्या क मिसर मुकोलनो

1जब याकुब न सोमळ्यो कि मिसर मा ओन छे, ती हुयो आपसा पुर्या सी कयो, “तुमु एक दिसरान मुय काय देख रोया।” 2ओळी हुयो कोयो, हांव सोमवलु छे की मिसर मा ओन छे; ओतरान कोरिन तुमु होंया जाईन आपने जुगु ओन मुले लि आवु, जेरेसे आपनु नी मोरजे, बाखुन जुवतला रोहजे (प्रेरि 7:12) 3एने: युसुफ क दस भाई ओन मुले लेने क लिय मिसर क गोया। 4बाखुन युसुफ क भाई बिन्यामीन क याकुब न यो विचारीन भाष्‍यो क भेळ नी मुकल्यो कि काहमाईन ओसो नि होये कि हेर पोर काहिन वेला आय पोड़े। 5ओस कोरीन जे मानशे ओन मुले लिन आया ओका सात इस्राएल क पुर्या वी आया; काहकी कनान देश मा वी भारी काव होतु (प्रेरि 7:11) 6युसुफ ते मिसर देश क आधिकारी होतु, आरु हेना देश क सब मानशो क हात हुयोत ओन वेचतो हुतो; ओतरान कोरिन जब युसुफ क भाई आया ती भिमा मुयोन भुरसे पोड़िन ओको वांद्या। 7हेनुक देखिन युसुफ न उळखी ते लेदु, बाखुन हेन्दरे ओगोळ भुळु बोनीन वातड़ु होईन हेनुक पुछ्यु, “तुमु का सी आय रोया?” हुये कोया, “हामु ते कनान देश सी ओन मुले लेने क लिय आवला छे।” 8युसुफ न आपसा भाई क उळखी लेदु, बाखुन हुये हेनाक नी उळख्या। 9ती युसुफ आपसा हेनु सोपना क फोम कोरिन जे हुये हेर वाराम देखला होता, हेनुक कोहने लाग्यु, “तुमु जासुस छे; एना देश न वेला क देखने क लिय आय रोया।” 10हुये हेनाक कोया, “नि, नि, हे पोरबु, तारा दास खानेन चीजे मुले लेने क लिय आय रोया। 11आमु आखा एकुत बाबान पुर्या छे, हामु सुदा मानशे छे, तारा दास जासुस नी होय।” 12हुयु हेनुक कोयु, “नी, तुमु एना देश क वेला देखनेत क आवला छे।” 13हुये कोया, “हामु तारा दास बारे भाईश छे, आरु कनान देशवासी एकुत मानुसक पुर्य छे, आरु नानलो एने टेमे आमरा बाबा क पास छे, आरु एक नी रोयु।” 14ती युसुफ न हेनु सी कोयु हांव ते तुमरे सी कोय देदु, कि जासुस करनिया छे; 15इने रिते तुमु पारखाय जासु, फिरोन क जिवन क शपथ, जोत्यार लोगुन तुमरु नानलु भाईस याँ नी आवे ती लोगुन तुमु याँ सी जाय नि सोकु। 16ओतरान कोरिन आपसा मा सी एक क मुकली देवी कि चू तुमरा भाईस क लि आवे, आरु तुमु मानशो बान्दायन रोहसु; ओस कोरीन तुमरी वात पारखाय जासे कि तुमु छाचा छे की नी। कदाम तुमु खोरा नी निकोळ्या ती ते फिरोनन जीवण शपथ तुमु छाचीन जासुस कोवायसु। 17ती हुयु हेनुक तिन दाहड़ा लोगुन जेलखाना मा बुज रोयु। 18तिसरे दाहड़े युसुफ न हेन्दरे सी कोयु, “एक काम कोरु ती जीवतला रोहसु; काहकी हांव परमेश्वर क बिक मानो; 19काहमाईन तुमु सुदा मानसे होय, ति तुमु आखा भाष्यो मा सी एक जन एना जेलखाना मा बादायलु रोहे; आरु तुमु आपसा घोरवाळा क भुक मिटावने क लिय ओन ली जावु। 20आरु आपसा नानला भाई क मारे पास ली आवु; ओस कोरिन तुमरी वात खोरली कोहायसे, आरु तुमु मारे नी जासु।” ति हुये तोसोत कोर्या। 21हेये हुयेत आपसा-आपसा कोया, “बेफीकुर आपना भाई क वारा मा गुनु छे, काहकी जोत्यार हुयु आपने सी गिड़गिड़ावीन विनती कोर्यु, ती वी आपनु यो देखीन, की हेरो जीवोन कोसो पिड़ा मा पोड़लो होसे, हेरी नी सोमळ्या; ओस कोरीन हामु वी हिमी इनी वेला मा पोड़ला छे।” 22रुबेन न हेरेसी कोयो, “काय हांव तुमरे सी नी कोयु होतु कि पुर्या क गुनावा मा बोनु? बाखुन तुमु नी सोमळ्या। देखु, हिमी तेरा लुहुय क बोदलु भुकती रोया।” 23युसुफ काजे आरु हेरी वात जी एक दुय बुलीन लारे होयती होती; इनासी हेनुक मालुलम नी हुयो कि हुयो हेन्दरी बुली सोमजे। 24ती हुयो हेनका धड़ सी छेटो होईन रड़ने लाग्यो; हेनका पास पोछु आवीन आरु हेन्दरे सि वात कोरीन हेन्दरे मा सी शिमोन क नेवाड़ीन आरु ओको ओगोळ बोन्दी बोनाय लेदु।

याकुब क पुर्या क कनान पोछो आवनो

25ती युसुफ न हुकुम आप्यो, की हेन्दरा थोयला ओनो सी भोर देवु आरु एक एक जन क थोयला मा ओका रिपिया वि मेक देवु, ओळी हेन्दरे वाट्ये क लिय खानेन चीज आपु। एने: हेन्दरे पुठी ओसोत कोर्या। 26ती हुये आपसा ओनन थोयला आपसा गोदड़ा पोर मेलीन होंया सी चाल देदा। 27सराय मा जब एक न आपसा गोदड़ा क च्यारु आपने क लिय थोयलो उगाड़ियो, ती ओको रिपिया थोयला क मुयो पोर मेकलो हुतो देखा पोड़्यो। 28ती हुयो आपसा भाष्यो सी कोयो, “मारा रिपिया ते पोछा आप देदलो छे, देखु, हुयो मारा थोयला मा छे,” ती हेन्दरा जिवो मा जिव नी रोयु, आरु हुये एक दिसरा क आरु बिक सी ताकने लाग्या, आरु कोया, “परमेश्वर न यो आमरे सी काय कोरलु छे?” 29ती हुये कनान देश मा आपसा बाबा याकुब क पास आया, आरु आपसी आखी वात क ओस कोरीन कोया: 30“जो मानुस हेना देश क स्वामी छे, हुयो आमुक घोनो वातड़ो क सात वात कोर्‌यो, आरु आमुक देश क भेदिया कोयो। 31ती हामु हेरेसी कोया, ‘हामु सुदा मानशे छे, भेदिया नी। 32हामु बारे भाईष एकुत बाबान पुर्या छे, एक ते जातु रोयु, बाखुन नानलु एने टेमे कनान देश मा आमरा बाबा क पास छे।’ 33ती होयु मानुसन, जो हेना देश क स्वामी छे, आमुक कोयु, एनासी मालुम होय जाय की तुमु सुदा मानसे होय; तुमु आपसा मा सी एक क मारे पास छुड़िन आपसा घोरवाळा क भुख मिटावने क लिय थुड़ोक ली जावु, 34आरु आपसा नानला भाई क मारे पास ली आवु। ती मेसे विश्वास होय जाय कि तुमु भेदिया नी, सुदा मानशे छे। ओळी हांव तुमरा भाईष क तुमुक आप दीस, आरु तुमु एना देश मा लेनो देनो कोर सोकसु।” 35यो कोहीन हुये आपसा-आपसा थोयला सी ओन निकाळने लाग्या, ती, काय देख्या, की एक एक जन क रिपिया क थोयली ओकाज थोयला मा मेकली छे। ती रुप्या क थोयलिया क देखीन हुये आरु हेन्दरो बाबा बेस बिह गोयु। 36ती हेन्दरो बाबो याकुब न हेनु सि कोयो, “मेसेक तुमु विगुर ओवलियाद नु कोर देदा, देखु, युसुफ नी रोयु, आरु शिमोन वी नी आयु, आरु हिमी तुमु बिन्यामीन क वी ली जाने हिय रोया। यी आखी पीड़ा मारे उपोर आय पोड़ली छे।” 37रुबेन आपसा बाबा सी कोयु, “काहमाईन हांव हेनाक तारे पास नी लावो, ती मारा दुयु पुर्या क मार देजी; तु ओको मारा हातो मा सोप दे, हांव हेनाक तारेन्चा ओळी पुगाड़ दिस।” 38हुयो कोयो, “मारु पुर्यु तुमरे पुठी नी जासे; काहकी हेरु भाईस मोर गोयलु छे, आरु हुयो एखलो हिमी रोय गोयलो छे: ओतरान कोरिन जेने वाट्ये सी तुमु जासु, हेरेमा काहमाईन हेरे पोर काई वि पीड़ा आवे, ती तुमरे कारण हांव इना डाहवारा क टेमे मा शोक क सात अधोलोक मा उतरी जाईस।”