उत्पत्ति 25

अब्राहमन दिसरी ओवलियाद

(1 इतिहास 1:32,33)

1ती अब्राहम न एक आरु लाड़ी बनायो जेरो नाव कतुरा हुतो। 2हेरेसी जिम्रान, योक्षान, मदान, मिद्यान, यिशबाक, आरु शुह पोयदा हुया। 3योक्षान सी शबा आरु ददान पोयदा हुया; आरु ददान क ओवलियाद मा अश्शुरी, लतुशी, आरु लुम्मी लुग हुया। 4मिद्यान क पुर्या एपा, एपेर, हनोक, अबीदा, आरु एल्दा हुया, ये सब कतुरा की ओवलियाद हुया। 5इसहाक क ते अब्राहम न आपसो आखो काय आप्यो। 6बाखुन अब्राहम आपसी रखेलियो क पुर्या क काहीन आपीन आपसा जिवतात आपसा पुर्या इसहाक क पास सी उगेवनो देश मा मोकली देदो।

अब्राहम क मौत

(1 इतिहास 1:28-31)

7अब्राहम क पुरी ओमोर एक सोव पचहत्तर साल क हुयो। 8अब्राहम क डोबोल ओमोर होयने क कारण अर्थात् आखा डाहवारा क टेमे जीव छूट गयो, आरु हुयो आपसा मानषो मा जाय भेटायु। 9हेरा पुर्या इसहाक आरु इश्माएल न, हित्ती सोहर क पुर्या एप्रोन क मम्रे क ओगोळवाळी जागा मा, जी मकपेला क गुफा हुती, ओको गाड़्या; 10अर्थात् जु जागु अब्राहम न हित्तियो सी मुले लेदो हुतो; ओकाज मा अब्राहम आरु ओकी लाड़ी सारा दुयो क गाड़ दिदा। (उत्पत्ती 23:16) 11अब्राहम क मोरने क वाद मा परमेश्वर न ओका पुर्या इसहाक क जु लहेरोई नावोन कुवा क पास रोहतो हुतो, बोरकोत आप्यो।

इश्माएल क ओवलियाद

(1 इतिहास 1:28-31)

12अब्राहम क पुर्य इश्माएल जु सारा क मिसरी दासी हाजिरा सी पोयदा हुयो होतो, ओकी यि ओवलियाद छे। 13इश्माएल क पुर्या क नाव आरु ओवलियाद यि छे: अर्थात् इश्माएल क मोटलो पुर्य नबायोत, ओळी केदार, अद्बेल, मिबसाम, 14मिश्मा, दुमा, मस्सा, 15हदद, तेमा, यतुर, नापीश, आरु केदमा। 16इश्माएल क पुर्या ये ओतरात हुया, आरु ईनु क नावो क ओनसारे इन्दरो गाँव, आरु छावनियो क नाव वी पोड़्यो; आरु येत बारे आप आपसा कुक का डाहला हुया। 17इश्माएल क पुरी ओमोर एक सोव तीन कोम चावीस साल क हुयो; ती ओका जीव छूट गयो, आरु हुयो आपसा मानषो मा भेसकाय गोयो। 18ओका ओवलियाद हवीला सी शुर लोगुन, जे मिसर क ओगोळ अश्शुर क वाटो मा छे, बोस गोया; आरु हेन्दरु वाटू ओका भाई बोन्या क ओगोळ पोड़्यो।

इसहाक क पुर्या क उबेजनेन वर्णन

19अब्राहम क पुर्या इसहाक क ओवलियाद यी छे : अब्राहम सी इसहाक पुयदा हुयो; 20आरु इसहाक न चावीस साल क होईन रिबका सी, जी पद्दनराम क वासी, अरामी बतुएल क पुराय आरु अरामी लाबान क बहनीष हुती; इयाव कोर लेदु। 21इसहाक क लाड़ी वान्टी होती, ओतरान कोरिन हुयो हेरा योहोवा सी विनता कोर्‌यो; आरु योहोवा न ओकी विनता सोमळीयो, ओसकोरीन ओकी लाड़ी रिबका भारपाये होयी 22पुर्या ओका पेटो मा आम्बासाम्बा थाबाईन एक दीसरा क कुटने लाग्या। ति हुयी कोहि, “मारी जी ओसी वेला रोहसे ती हांव कोसी जोवत्ली रोहिस?” आरु हुयी योहोवा क मोरजी पुछने क गोय। 23ती योहोवा न हेनी सीइ कयो, “तारा पेटो मा दुय जाति छे, आरु तारा कुखो सी जोसा निकोळसे दुय राज्य क मानुस आंग्ये होयसे, आरु एक राज्य क मानुस दुसरा सी वोदु ताकोतवाळा रोहसे, आरु मोटलो पुर्यु नानला क होको मा रोहसे।” 24जोत्यार हेरो पोखड़ायने क टेम आयो, ती काय देखा पोड़्यो की ओका कुखो मा जोवळीया पुर्या छे। 25पेहलु जु पोयदा होयु चू रातलु निकोळ्यु, आरु ओको आखो डील काम्बवा क जोसो रोममय हुतो; ओतरान कोरिन ओको नाव एसाव पाड़्या। 26पोछोळ ओको भाई आपसा हातो सी एसाव क पायोनपाटली क धोरीन पोयदा हुयो; आरु ओको नाव याकुब पाड़्या। जोत्यार रिबका न हेनुक जोन्म देदी ती इसहाक साठ साल क हुतो। 27ओळतेन हुये पुर्या मोटा होयने लाग्या, आरु एसाव ते जोन्गोलो मा रोहीन चतुर शिकार खेलनेवाळो हुय गोयो, बाखुन याकुब सुदो मानुस हुतो आरु तोम्बुत मा रोया कोरतु होतु। 28इसहाक एसाव क अहेर क मांस खाया कोरतो हुतो, ओतरान कोरिन हुयो हेनासी मोंग रोखतो हुतो; बाखुन रिबका याकुब सी मोंग राखती हुती। 29एक दाहड़ो याकुब खाने क लिय काहीन दाळ चुड़ेवतु होतु; आरु एसाव जोन्गोल सी घाबरायीन आयु। 30ती एसाव न याकुब सी कयो, “हुयी जी रातली चीज छे, हेनी रातली चीजों मासी मेसे काहीन खावाड़, काहकी हांव घाबराय रोयु।” ओस कोरिन हेरो नाव एदोम वी पोड़्यो। 31याकुब न कयो, “आपसा पहिलौठेक होक आज मारे हातोम वेच दे।” 32एसाव न कयो, “देख, हांव ते हीमी मोरने पोर छे : ओतरान कोरिन पहिलौठे क होक सी मारो काय फायदु होयसे?” 33याकुब न कयो, “मार सी हीमी शपथ खा,” अत: हुयो हेना सी शपथ खादो, आरु आपसा पहिलौठा क होक याकुब क हात वेच देदो। 34इना पोर याकुब न एसाव क रुटा आरु चुड़वली मसुर कि दाळ आप्यो; आरु हुयो वी खादा पीदा, आरु उठीन जात रोयो। यो एसाव न आपसो पहलौठे क होको क भुण्डोत जान्यो।