परमेश्वरन सत्य वचन
उत्पत्ति 17
खतना आरु वाचान सोहलानी
जोत्यार अब्राम एक कोम सोव सालोन होय गयो, ति योहोवा न ओको दर्शन दिन कयो, हांव सर्वशक्तिमान ईश्वर छे; मारी हाजरी मा चाल आरु खोरु होयतु जा। हांव तारे साते वायदु बान्दीस, आरु तारा ओवलियाद क बेस वोदाड़ीस। ती अब्राम मुयोन भुरसे हिट पोड़्यु: आरु परमेश्वर हेना सी होसुत वात कोतु रोयु, देख, मारु वायदु तारा सात मा बान्दायलु रोहसे, ओतरान कोरिन तु जाति क टुळा क मुलपिता होय जाईस। ओतरान कोरिन हीमी गोथो तारो नाव अब्राम नी रोहसे, बाखुन तारो नाव अब्राहम होयसे; काहकी मे तुखे जातियो क टुळा क मुलपिता बोनाय देदलु छे। (रोम. 4:17) हांव तुखे घोनु फलवन्त कोरिस, आरु तुसेक जाति जातिन मुल बनाय दिस, आरु तारा ओवलियाद म राजा पोयदा होयसे। आरु हांव तारे पुठी, आरु तारा वाद की पीढ़ी पीढ़ी लोगुन तारा ओवलियाद क सात वी इने आशय क जोलोम जोलोमन वायदु बान्धो, की मे तारे आरु वाद क तारा ओवलियाद क वी परमेश्वर रोहिस। (लुका 1:55) आरु हांव तुखे, आरु तारा वाद तारा ओवलियाद क वी, यो आखो कनान देश जेनामा तु हुलक्र्यु होईन रोहतलु, इने रिते आपीस कि चो होमीशा–होमीशा ओकी घोरुन जागु रोहसे, आरु हांव हेन्दरु परमेश्वर रोहिस (प्रेरि. 7:5) ओळतेन परमेश्वर न अब्राहम सी कयो, “तु वी मारा सात बान्दली वाचा क पाळ्या कोरजी। मारे साते बान्दली वाचा, तेरो पाळन तुसे आरु तारा वाद क तारा ओवलियाद क कोरनो पोड़से, ची यी छे : तुमरे मा सी एक एक मानुसक खतनो होये (रोम. 4:11, प्रेरि. 7:8) तुमु आपनी आपनी खालड़ी क खतनो कोराय लेजु : जु वाचा मारे आरु तुमरे विच मा छे, तेरो यो सोहलानी होयसे। पीढ़ी पीढ़ी मा केवल तारा ओवलियाद काज मानुस नी बाखुन जु तारे घोर पोयदा होयला छे, अथवा परदेशियो सी पोयस्या आपीन मुले लि लेजु। जु तारा घोर मा पोयदा होये, अथवा तारा पोयस्या सी मुले लेदलो रोहे, ओको खतनो वी कोरनो; ओस कोरिन मारा वायदान सोहलानी तुमरा डीलो मा रोहसे हुयो जोलोम जोलोम् रोहसे। जु मानुस विगुर फातोरकाती रोहसे, अर्थात जेरी खालड़ी क खतनो नो होये, चो जीव आपना मानषो मा सी नोष्ट कोर्यो जासे, काहकी हुयो मारे पुठी वायदु बान्दला काजे तुड़ देदो।” ओळी परमेश्वर न अब्राहम सी कयो, “तारी जी लाड़ी सारै छे, ओको तु हिमी सारै झुण कोहे, ओको नाव सारा होयसे। हांव हेनीक बोरकोत आपीस, आरु तुखे ओका द्वारा एक पुर्य आपीस, आरु हांव ओको ओसो बोरकोत आपीस की हुयी जाति जातिन मुलमाता होय जासे; आरु ओका ओवलियाद मा राज्य–राज्य क राजा पोयदा होयसे।” ती अब्राहम मुयोन भुरसे हुट पोड़यु आरु हासने, आरु मोनोत मोनोम कोहने लाग्यु, “काय सोव साल क मानुसक वी ओवलियाद होयसे आरु काय सारा जी नोब्बे साल कि छे पुर्य जोनसे?” आरु अब्राहम न परमेश्वर सी कयो, “इश्माएल तारी निगाह मा बोनलु रोहे! योत बेस छे।” ती परमेश्वर न कयो, “खोरी तारी लाड़ी सारा क तार सी एक पुर्य पोयदा होयसे; आरु तु ओको नाव इसहाक राखजी; आरु हांव ओका सात मा ओसी वाचा बान्धीस जी ओका वाद मा ओकी ओवलियाद क लिय जोलोम जोलोम् कि वाचा रोहसे। इश्माएल क वारा मा वी हांव तारी सोमवलु छे; मे ओको वी बोरकोत आपीस, आरु ओको फलवन्त कोरिस आरु घोनु वोदाड़ीस; हेना सी बारे डाहला पोयदा होयसे, आरु हांव हेना सी एक मोटली जाति बोनाविस। बाखुन हांव आपसी वाचा इसहाक पुठीत बान्दीस जु सारा सी अगले साल इने टेमे पोयदा होयसे।” ती परमेश्वर न अब्राहम सी वात कोरनो बोन्द करीयो आरु ओका चा रोईन उपोर जात रोयो। ती अब्राहम न आपसा पुरया इश्माएल क लिदो; आरु ओका घोर मा जोत्रा वी पोयदा होयला हुता, आरु जोतरा हेरा पोयस्या मुले लेदला हुता, अर्थात् ओका घोर मा जोत्रा मानुस हुता तेनु आखाक लीन तेने दाहड़े परमेश्वर क बुलोन ओनसारे हेन्दरी खालड़ी क खतनो करीयो। जोत्यार अब्राहम क खालड़ी क खतनो हुयो ती अब्राहम एक कोम सोव सालोन होतु। आरु जोत्यार हेरा पुर्या इश्माएल क खालड़ी क खतनो हुयो ती हुयो तेरे सालोन हुतो। अब्राहम आरु ओको पुर्य इश्माएल दुयो क खतनो एकज दाहड़े हुयो; आरु ओका घोर मा जोत्रा मानुस हुता, जे घोर मा पोयदा होयला ओळी जो पोरदेशी क हातो सी पोयस्यान मुले लेदला हुता, सब क खतनो ओकाज सात मा हुयो।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.